ഉലകം

വീകേയെസ്

2011-02-01T11:47:00.000-08:00

ഇന്നാണ് യൂട്യൂബില്‍ നിന്ന് ഈ വീഡിയോ കണ്ടത്.

എപ്പോഴാണ് വീ കേ എസിനെ ആദ്യമായി കേട്ടത്?
രാധാകൃഷ്ണന്‍ സാറിന്റെ വീട്ടില്‍ വച്ചാണ്. എട്ടാം ക്ലാസില്‍ പഠിയ്ക്കുന്നു.

“അക്ഷരം വെളിച്ചമാണ്..അതഗ്നിയാണ് പൊള്ളലാണ്,
അക്ഷരം പടയ്ക്കൊരുങ്ങി നില്‍പ്പവന്റെ മൂര്‍ച്ചയാണ്”

"ആരാ സാറേ ഇത് പാടുന്നത്.."
"അത് വീ കേ എസ് ആണ് . എന്താ സ്വരം. എന്താ ഈണം.വീ കേ എസ് കൊട്ടിയം പോളിടെക്നിക്കിലെ സാറായിരുന്നു. മണി അണ്ണനെ ഒക്കെ പഠിപ്പിച്ചിട്ടുണ്ട്."

ഈ പാടുന്നയാള്‍ അച്ഛനെ പഠിപ്പിച്ചിട്ടുണ്ടെന്നോ. എങ്കില്‍ വല്യ പുള്ളിയായിരിയ്ക്കും. അച്ഛനെ ഒന്ന് പഠിപ്പിയ്ക്കാന്‍ ഞാനെത്ര നോക്കുന്നു...

"അച്ഛാ കൊട്ടിയം പോളിയില്‍ വീ കേ എസ് എന്നൊരു സാര്‍ ഉണ്ടായിരുന്നോ? "
"വീ കേ എസോ? അങ്ങാനാരേം ഞാന്‍ കേട്ടിട്ടില്ലല്ലോടാ. എന്താ മുഴുവന്‍ പേര് "
"വീ കേ ശശിധരന്‍. പാട്ടൊക്കെ പാടും."
"ഓ ശശിധരന്‍ സാറോ. പിന്നെ. എനിയ്ക്ക് ഏറ്റം ഇഷ്ടപ്പെട്ട സാറാണ്. ക്ലാസില്‍ വച്ചൊക്കെ ചിലപ്പോ ഇങ്ങനെ നിന്ന് ചുമ്മാ മൂളും. പിള്ളേരൊക്കെ അത് കേള്‍ക്കാന്‍ മിണ്ടാതിരിയ്ക്കും.നിങ്ങടെ പാര്‍ട്ടിക്കാരനാ.. "

പത്തിലെത്തിയപ്പോ സ്വാതന്ത്ര്യ പ്രഖ്യാപനം നടത്തിയത് ചിങ്കു അണ്ണനെക്കൊണ്ട് വായനശാലയില്‍ പരിഷത്തിന്റെ യൂണിറ്റ് തുടങ്ങിപ്പിച്ചാണ്.അണ്ണന്‍ പ്രസിദേന്തി, ഞ്യാ സെക്രട്രി, സന്തോഷ് ഖജാ‌ന്‍‌ജീ. കാലും കയ്യും പിടിച്ച് പതിനഞ്ച് ഇല്ലാമെമ്പര്‍ഷിപ്പും ഒപ്പിച്ചെടുത്തു.

ചാത്തന്നൂരിലൊരു തെരുവു ക്ലാസിനു പോയപ്പോള്‍ പാട്ടുപെട്ടി പാടുന്നു..”ഭജനം പൂജനമാരാധനയും സാധനയും ഹേ നിര്‍ത്തുക സാധോ..”
ഇത് ഗീതാജ്ഞലിയല്ലേ വീ കേ എസ് ആണോ പാടുന്നത്.?
അന്ന് വേണുവണ്ണന്റെ കയ്യില്‍ നിന്ന് കാസറ്റ് വാങ്ങി വീട്ടിലെത്തി എത്ര തവണ കേട്ടെന്നറിയില്ല.

പിന്നെ വീ കേ എസ് സംഗീതം നല്‍കി പാടിയ പൂതപ്പാട്ടിന്റെ "ഉണ്ണിയെവേണോ ഉണ്ണിയെ വേണോ ആളുകളിങ്ങനെയെങ്ങുംചോദിച്ചാടിപ്പിപ്പൂ പാവത്തെപ്പല പാടും അതിന്റെ തുടിയ്ക്കും കരളില്‍...."എന്ന് ഏതോ സിനിമയില്‍ നാലുവരി കേട്ടപ്പോള്‍ ഓടിപ്പോയി കൊല്ലത്തെ തട്ടിന്മുകളിലുള്ള ഹൌസ് ഓഫ് മ്യൂസിക്കില്‍ പോയി പതിനഞ്ച് രൂപായ്ക്ക് റെക്കോഡ് ചെയ്യിപ്പിച്ചു.

മയ്യനാട്ട് ഒരു ക്യാമ്പില്‍ പോയപ്പോ വിജയന്‍ എന്ന ഒരു അണ്ണന്റെ വീട്ടിലായിരുന്നു താമസം. കായലിനരികില്‍ വീട്. വിജയയണ്ണന്‍ ഒരു സാക്ഷരതാ പ്രവര്‍ത്തകനായി പരിഷത്തില്‍ വന്നതാണ്. സാക്ഷരതയുടെ വക കുറേ കാസറ്റുകളിരിയ്ക്കുന്നു. കുറേ പാട്ടുകളുണ്ട്. അ അമ്മ അന്നം അറിവ് ആ ആനയെഴുന്നള്ളത്ത്.....ഉ ഉണരുക ഉയരുക വാനില്‍....
എന്തിന്നധീരത ഇപ്പോള്‍തുടങ്ങണം എല്ലാം നിങ്ങള്‍ പഠിയ്ക്കേണം.....എവിടെയോ ഉള്ള ബ്രെഹ്ത് ഹൃദയത്തിലേക്ക്.
അക്ഷര ജ്ഞാനം അറിവല്ല..അറിവിന്റെ രക്ഷാകവാടമാണെന്നുള്ളാതോര്‍ക്കുക. വിജയണ്ണനും ഉറക്കെ പാടി. അണ്ണന്റെ ഒത്തിരി വയസായ ഒരുപാട് ഞൊറിവുകളുള്ള അമ്മയിരുന്ന് ചിരിച്ചു.

സന്തോഷ് എന്ന ആല്‍‌മാവു പറങ്കിമാവു കൂട്ടുകാരനും അപ്പോഴേയ്ക്ക് വീ കേ എസ് ഭക്തനായിരുന്നു.ഞങ്ങള്‍ ഏറ്റവും കൂടുതല്‍ കേട്ട കവിത അതായിരിയ്ക്കും ഞാന്‍ പോലുമറിയാതെ വീകേയെസ് സിരകളിലൊഴുകി.

ചിങ്കു അണ്ണനോട് എന്നും പറയും. അണ്ണാ നമുക്ക് പരിഷത്ത് യൂണിറ്റ് വാര്‍ഷികത്തിന് വീ കേ എസിനെ കൊണ്ട് വരണം.
"എടാ അതിന്‍ അദ്ദേഹത്തെ കിട്ടുകയൊന്നുമില്ല. പിന്നെ ഇവിടത്തെ വാര്‍ഷികത്തിന്‍ വീ കേ എസിനെ കൊണ്ട് വന്നാല്‍ അത് അങ്ങേരെ കളിയാക്കുന്ന പോലെയല്ലേടേയ്. നാലും മൂന്നും ഏഴ് പേരു വരും. നമുക്ക് ഒരു മേഖലാ ബാലവേദി ക്യാമ്പ് സംഘടിപ്പിയ്ക്കാം. അപ്പൊ വിളിയ്ക്കാം.."

ബാലവേദി ക്യാമ്പ് ഒരു വിദൂര പ്രതീക്ഷയാണ്. എങ്ങനെ നടത്താന്‍. പിള്ളേരു വന്നാല്‍ പോരല്ലോ. അതിനൊപ്പം പിള്ളേര് നാട്ടീന്ന് വേണ്ടേ. എന്നാലല്ലേ കുട്ടികള്‍ക്ക് താമസിയ്ക്കാന്‍ വീടാവൂ. നാട്ടിലാണേല്‍ പരിഷത്ത്കാരെന്നാല്‍ ദൈവമില്ലെന്ന് പഠിപ്പിയ്ക്കുന്ന ഭീകരരും.

ജനകീയാസൂത്രണത്തിന്റെ പരിപാടികള്‍ കാട്ടുമ്പോ ദൂരദര്‍ശനിലാണ് പിന്നീട് "ആത്മാഭിമാനക്കൊടിക്കൂറ പൊക്കുവാന്‍ കൂട്ടുകാരേ നമുക്കൊത്തുചേരാം" എന്ന പാട്ടു കേട്ടത്.

കൊല്ലത്ത് സീ പീ എമ്മിന്റെ പാര്‍ട്ടി സമ്മേളനം നടക്കുമ്പോ വീ കേ എസ് ബോള്‍ഷെവിക് ഗാനസംഘത്തോടൊപ്പം പാടി

“പഴയകാലത്തികവില്‍ നിന്നും പുതിയ നാടുണര്.
പഴയ തിന്മകള്‍ തീണ്ടിടാത്തൊരു പുതിയ നാടുണര്...
പറകൊട്ടിപ്പാടിയുണരുക തുയിലുണാര്‍ത്തുക നാം..
പടയൊരുക്കുക നാളേയാവുകിലേറെ വൈകീടും. "
നാളെയാവുകിലേറെ വൈകീടും......”

പ്രീഡിഗ്രി രണ്ടാം കൊല്ലം പഠിയ്ക്കുമ്പോഴാണ് മേപ്പങ്കോട് വിദ്യാധരന്‍ സാറ് ശ്വാനനെ ആവശ്യമുണ്ട് എന്ന പുസ്തകം ഇറക്കുന്നത്. പുസ്തക പ്രകാശനത്തിന് വീ കേ എസ് പൂതപ്പാട്ട് അവതരിപ്പിയ്ക്കുന്നു. മരിപ്പ്. പുളകിതഗാത്രനെന്ന്* കളിയാക്കിയിരുന്നെങ്കിലും വിദ്യാധരന്‍ സാറിനോട് അതിയായ സ്നേഹം തോന്നി.

“ഒന്ന് നേരത്തേ വരണേ. ഒരുപാട് കാര്യങ്ങള്‍ ഓര്‍ഗനൈസ് ചെയ്യാനുണ്ട്. നിങ്ങളൊക്കെച്ചേര്‍ന്നാണിത് വിജയിപ്പിയ്ക്കേണ്ടത്.“ മേപ്പങ്കോടന്‍ സുഖിപ്പിച്ചു.

"എത്തി സാറേ. "

വീകേഎസിനെ ആദ്യമായി കാണാന്‍ കിട്ടുന്ന അവസരം വെറുതേ വിടാനോ.ശനിയാഴ്ച. ട്യൂഷനു രാവിലേ നാലു മണിയ്ക്കു തന്നെ പോയി. ട്യൂഷന്‍ കഴിഞ്ഞ് സന്തോഷിനേയും കൂട്ടി തിരിച്ച് പള്ളിമണ്‍ ബസു പിടിച്ചു ആണ്ടാമുക്കത്തൂന്ന്. ചിന്നക്കടയില്‍ നിന്ന് ആകെ നരച്ച ഒരപ്പൂപ്പന്‍ കയറി ഞങ്ങളുടെ പിറകിലത്തെ സീറ്റിലിരുന്നു. വലിയ തിരക്കൊന്നുമില്ലായിരുന്നു.

പത്ത് മണിയുടേ ചെറുചൂടില്‍ ബസ് ഒഴുകി.നല്ല കാറ്റും. പതുക്കെ പിറകിലെ സീറ്റില്‍ നിന്ന് ഒരു പാട്ടിന്റെ മൂളല്‍...“തുളസി വെറ്റില കൊട്ടടായ്ക്കാ പൊകല ചുണ്ണാമ്പ്..ചവചവയ്ക്കണ മുത്തശ്ശിയ്ക്കൊരു മൂളിപ്പാട്ട്..”

ഞാനും സന്തോഷും തമ്മില്‍ നോക്കി.കാലാകാലങ്ങളായി കേള്‍ക്കുന്ന സ്വരം.വ്യക്തമായ തെളിച്ചമായ ശബ്ദം. പക്ഷേ ഞന്‍ ഉദ്ദേശിച്ച ആളിങ്ങനെയല്ലല്ലോ.ഊഹിച്ചതില്‍ നിന്ന് കുറച്ചുകൂടെ പ്രായമുണ്ട്. ഞങ്ങള്‍ പരസ്പരം നോക്കി. പിറകില്‍ നിന്ന് പതിയെ അപ്പോഴും പാടുന്നുണ്ട്.

അവന്‍ പതുക്കെ ചോദിച്ചു. വീ കേ എസ് ആണോടാ. അവന്‍ ആകെ വിയര്‍ക്കുന്നുണ്ടായിരുന്നു. ജനകീയഗായകന്‍ ഞങ്ങളുടെ തൊട്ടു പിന്നിലിരിയ്ക്കുന്നു. ഞങ്ങള്‍ കേള്‍ക്കെ പാടുന്നു. ഞാന്‍ അപ്പൊത്തന്നെ ബോധം കെട്ടു പോകുമോ എന്ന് തോന്നി. സകല ധൈര്യവും സംഭരിച്ച് പിറകിലേയ്ക്ക് നോക്കി.

എന്ത് ചോദിയ്ക്കു..വീ കേ എസ് ആണോന്ന് ചോദിയ്ക്കാമോ...ശശിധരന്‍ സാറാണോന്ന് ചോദിച്ചാ‍ലോ..വേണ്ട..

ചോദിച്ചു : “ശശിസാറാണോ.. "
"അതേല്ലോ.."
"സാറ് എങ്ങോട്ടാ.."(വിറയല്‍)
"ഞാന്‍ പള്ളിമണില്‍ ഒരു പുസ്തക പ്രകാശനമുണ്ട് അതിനാണ്. "
"അതേയോ ഞങ്ങള്‍ സംഘാടന സമിതിയിലുണ്ട്. സാറെന്താ നേരത്തേ.."
"നേരത്തേയിങ്ങ് പോന്നു." ചിരിച്ചു.

പള്ളിമണില്‍ ബസിറങ്ങി.സഞ്ചിയൊക്കെ ഞങ്ങള്‍ കൈക്കലാക്കിയിരുന്നു. പള്ളിമണില്‍‌ വന്നിട്ട് വീ കേ എസ് സ്വയം സഞ്ചി ചുമക്കാനോ. സാറിനേയും കൂട്ടി സ്കൂളിളേയ്ക്ക് നടന്നു. അവിടേയാണ് പ്രകാശനം.

വൈകുന്നേരം ആറുമണിയ്ക്കാണ് തുടങ്ങുന്നത്. ഇതിപ്പൊ ഉച്ചയായതേയുള്ളൂ.
ആരും എത്തിയിട്ടില്ല."ആരും ഇല്ലേ ഇവിടെ. മേപ്പങ്കോട് വിദ്യാധരന്റെ വീടെവിടെയാ? "

"അടുത്താണ് സാര്‍. അങ്ങോട്ട് പോണോ? "

"വേണ്ടാ ഞാനിവിടെ ഈ ബഞ്ചില്‍ കുറച്ച് നേരം കിടക്കട്ടെ. "
"എങ്കില്‍ ഞാന്‍ പോയി വിദ്യാധരന്‍സാറിനെ വിളിച്ചുകൊണ്ട് വരാം. "

പോയി നോക്കിയപ്പോ മേപ്പങ്കോടന്‍ ഉറങ്ങുകയാണ്.
"സാറേ..വീകേഎസ് സ്കൂളില്‍ വന്നിരിയ്ക്കുന്നു. "
"ഇത്ര നേരത്തേയോ. "
ഉടുപ്പൊക്കെയിട്ട് മേപ്പങ്കോടന്‍ എത്തി.

"എങ്കി ഞങ്ങള് വീട്ടിലേയ്ക്ക് പോട്ടേ.ബുക്കൊക്കെ കൊണ്ട് വച്ചിട്ട് വരാം."
"നേരത്തേ വരണം ബാനറ് കെട്ടണം, ഡെസ്കും ബഞ്ചും പിടിച്ചിടണം " മേപ്പങ്കോടന്‍ പറഞ്ഞു....

"അച്ഛാ വീ കേ എസ് വന്നിട്ടുണ്ട്. മേപ്പങ്കോടന്റെ പുസ്തകപ്രകാശനത്തിന് ...അച്ഛന്‍ വരുന്നോ. "

"ഞാനെങ്ങും വരുന്നില്ല .. ഹും. കണ്ട വായിനോക്കികളോടൊക്കെ നെരങ്ങി നടക്കുന്ന കൊള്ളാം. പരിഷത്തെന്നൊക്കെ പറഞ്ഞത് ഞാന്‍ സഹിച്ചു അവരില്‍ ചില വിവരമുള്ളവരൊക്കെയുണ്ടെന്ന് തോന്നുന്നുണ്ട്. നാളെ മാര്‍ക്സിസ്റ്റ് പാര്‍ട്ടിയെന്നൊക്കെ പറഞ്ഞ് നെരങ്ങാന്‍ നടന്നാല്‍ കാലുതല്ലിയൊടിയ്ക്കും".
പഴയ മകരവിളക്കായ ഹൈക്കമാന്റ് വക സ്ഥിരം അന്ത്യശാസനം.

ചന്തികൊണ്ടൊരു ചിരി പാസാക്കിയിട്ട് സ്കൂളിലേയ്ക്ക് ചവുട്ടി.

മേപ്പങ്കോടനും ഇളവൂര്‍ ശ്രീകുമാറും എന്തൊക്കെയോ തള്ളിത്തകര്‍ത്തു.ശ്വാനനെ ആവശ്യമുണ്ട് പ്രകാശിപ്പിച്ചു.പ്രസംഗത്തിനിടയില്‍ വീ കേ എസിനെ ഗാന ഗന്ധര്‍വനെന്നോ മറ്റോ വിശേഷിപ്പിച്ചപ്പോ അദ്ദേഹം പാടുന്നതിനു മുന്‍പായി പറഞ്ഞു

”ഞാന്‍ ഗാന ഗന്ധര്‍വനൊന്നുമല്ല. ഇവിടെ ഭൂമിയില്‍ അധ്വാനിയ്ക്കുന്നവരുടെയിടയില്‍ നിന്ന് അവര്‍ക്കുവേണ്ടി
പാടുകയാണ് ഞാന്‍. വേണമെങ്കില്‍ ഒരു ജനകീയ ഗായകന്‍ എന്നു വിളിച്ചോളൂ.”

വീകേസ് പാടി. ഒന്നും കേട്ടില്ല. പൂതപ്പാട്ട് മാത്രം ഒഴുകിയൊഴുകിയിങ്ങനെ.
എല്ലാം കഴിഞ്ഞ് വീ കേ എസ് പോയി.

വീട്ടിലോട്ട് നടന്ന് ചെന്നപ്പോ വെട്ടുവഴിയുടെയറ്റത്ത് ആരോ ഇരുട്ടത്തങ്ങനെ ഒറ്റയ്ല് നില്‍ക്കുന്നു.
"അച്ഛനെന്ത് ചെയ്യുന്നു ഈ ഇരുട്ടത്ത്. "
"അല്ല പാട്ടൊക്കെ ഒന്ന് കേള്‍ക്കാമെന്ന് വച്ചു.."

പുളകിതഗാത്രന്‍=എന്തൊരു രസമെടെയ് എന്ന് പറയേണ്ടയിടത്ത് ഞാന്‍ പുളകിതഗാതരനായി ഭവിച്ചു എന്നൊക്കെ പറയുന്ന കരയന്മാരെ നാട്ടില്‍ വിളിയ്ക്കുന്ന പേര്.

ഒറ്റ വൈക്കോല്‍ വിപ്ലവം - 2

2010-11-28T10:14:00.000-08:00

ഒറ്റ വൈക്കോല്‍ വിപ്ലവം - 2

ഒറ്റ വൈക്കോല്‍ വിപ്ലവം ഒന്നിന്റെ തുടര്‍ച്ച.
ഒന്നാം ഭാഗം ഇവിടെ_______________________________

"ഈ കുടിലുകളിലെത്തുന്ന യുവാക്കളില്‍ ആശയറ്റവരും ആത്മാവിലും ശരീരത്തിലും ഒരുപോലെ ദരിദ്രരും ഉണ്ട്.അവര്‍ക്കൊരു ജോടി ചെരുപ്പു കൊടുക്കാന്‍ പോലും കഴിവില്ലാത്തൊരു കിഴവന്‍ കൃഷിക്കാരന്‍ മാത്രമാണു ഞാന്‍.എന്നാല്‍ എനിയ്ക്കു നല്‍കാന്‍ ഒരു സാ‍ധനമുണ്ട്.

ഒരിഴ വൈക്കോല്‍!

കുടിലിനു മുന്നില്‍ നിന്ന് ഒരിഴ വൈക്കോലെടുത്തു ഞാന്‍ പറഞ്ഞു..
“ഈ ഒരിഴ വൈക്കോലില്‍ നിന്നു തുടങ്ങാം വിപ്ലവം.”

“മാനവരാശിയുടെ വിനാശം ആസന്നമായിരിയ്ക്കേ ആശയോടെ പിടിച്ചു തൂങ്ങാന്‍ നിങ്ങള്‍ക്കൊരിഴ വൈക്കൊലെങ്കിലുമുണ്ടെന്നോ?” ഒരു ചെറുപ്പക്കാരന്‍ അല്‍പ്പം കടുപ്പത്തില്‍ ചോദിച്ചു.

ഈ വൈക്കോലിഴ ചെറുതും ലഘുവുമാണ്.എന്നാല്‍ അതിന്റെ കനം മിക്കവര്‍ക്കുമറിയില്ല.ഈ വൈക്കോലിന്റെ ശരിമൂല്യമെന്തെന്ന് ആളുകള്‍ക്കറിയാമെങ്കില്‍ ഈ രാജ്യവും, ലോകവും മാറ്റാന്‍ തക്ക കരുത്തുറ്റൊരു വിപ്ലവം സാധ്യമായേനേ."

(മസനോബു ഫൂക്കുവോക്ക . ഒറ്റ വൈക്കോല്‍ വിപ്ലവം)

അമ്പിയണ്ണാ..എന്താ ഈ വൈക്കോലും വിപ്ലവവുമായുള്ള ബന്ധമെന്ന് ഇനിയും എനിയ്ക്ക് മനസ്സിലായിട്ടില്ല..

ഒന്നുമില്ല..വെറും ലളിതം "ഒരിഴ വൈക്കോല്‍ പോലും കളയരുത്..കാര്യമില്ലാതെ ഒരു ചുവട് പോലും വയ്ക്കരുത്.."ഇതാണ് ഫുക്കുവോക്കയുടെ മന്ത്രം..
നമുക്ക് കഥ പറയാം ..ബാക്കി വഴിയേ പറയാം:)

അപ്പൊ നമ്മളെവിടെയാ നിര്‍ത്തിയത്? അനുഭവം വരെ..
അതുതന്നെ..അതിനുശേഷം അദ്ദേഹം എന്തു ചെയ്തു?

അദ്ദേഹം അതിന്റെ പിറ്റേന്ന് ജോലി രാജിവച്ചു..

ജോലി രാജിവച്ചോ !! ? എന്താ പുള്ളിയ്ക്ക് വട്ടായോ..:)

അങ്ങനെതന്നാ എല്ലാരും വിചാ‍രിച്ചിരുന്നത്..യാ‍ത്രാ വിരുന്നില്‍ ഫുക്കുവോക്ക പറഞ്ഞതുകൂടെ കേട്ടപ്പോഴേയ്ക്കും സുഹൃത്തുക്കളൊക്കെ ഉറപ്പിച്ചു..അവര്‍ മനസ്സില്‍ പറഞ്ഞു കാണും”പാവം നല്ലൊരു പയ്യനായിരുന്നു“ :)

എന്താ യാത്രയയപ്പ് വിരുന്നില്‍ ഫുക്കുവോക്ക പറഞ്ഞത്?

അത് നല്ല രസമാണ് പുസ്തകത്തില്‍ നിന്നു തന്നെ എടുത്ത് പറയാം.

“ഈ ഭാഗത്ത് പാതാറ്, അപ്പുറത്ത് നാലാം കടല്‍പ്പാലം.ഈ ഭാഗത്ത് ജീവിതം എന്നാണ് നിങ്ങളുടെ കരുതലെങ്കില്‍ ആ ഭാഗത്താണ് മരണം. മരണ ഭയത്തില്‍ നിന്നു മുക്തനാകണമെങ്കില്‍ ഈ ഭാഗത്താണ് ജീവിതമെന്ന ധാരണയുപേക്ഷിയ്ക്കണം..ജീവിതവും മരണവും രണ്ടും രണ്ടു സംഗതിയല്ല..“
ഇതുകൂടി കേട്ടപ്പോള്‍ എല്ലാവര്‍ക്കും എന്നെക്കുറിച്ച് വേവലാതി കൂടി.ഇയാ‍ള്‍ എന്താണീ പറയുന്നത്?മനസ്സിന്റെ സമനില തെറ്റിക്കാണും ..
അവരങ്ങനെ കരുതിയിട്ടുണ്ടാകും.അനുതാപപൂര്‍ണ്ണമായ മുഖങ്ങളോടെ അവരെന്നെ യാത്രയാക്കി.നല്ല ചുറുചുറുക്കോടേ പുറത്തിറങ്ങിയവന്‍ ഞാന്‍ മാത്രമായിരുന്നു."

ഹ.ഹ.ഹ ഇത് കേട്ടാല്‍ ആരും വിചാരിച്ചു പോകും വട്ടാണെന്ന്..
പിന്നെ?

പിന്നെ കുറെ നാള്‍ അവിടെയുമിവിടെയുമൊക്കെ അലഞ്ഞുതിരിഞ്ഞു നടന്നു.അവസാനം സ്വന്തം ഗ്രാമത്തില്‍, കുടുംബത്തിലേയ്ക്കുതന്നെ തിരിച്ചു പോയി.

അവിടെ അച്ഛന് തോട്ടങ്ങളുണ്ടായിരുന്നു.സന്തോഷത്തോടെ അച്ഛന്‍ ഒരു മധുരനാരകത്തോട്ടത്തിന്റെ ചുമതല ഫുക്കുവോക്കയ്ക്ക് വിട്ടുകൊടുത്തു.ഒന്നും ചെയ്യേണ്ടാ എന്നാണല്ലോ ഫുക്കുവോക്കയുടെ ആദര്‍ശം. വിളവെടുപ്പ് എളുപ്പമാക്കാനായി തോട്ടത്തിലെ നാരകങ്ങള്‍ വെട്ടി ഒരുക്കുന്ന ശീലമുണ്ടായിരുന്നു അക്കാലത്ത്..(ഇക്കാലത്തും.).പണിയൊന്നുമില്ലാ കൃഷിയില്‍ വെട്ടലും വേണ്ടാ എന്നു ഫുക്കുവോക്ക പറഞ്ഞു. അതോടെ നാരകങ്ങളുടെ ചില്ലകള്‍ കൂ‍ടിപ്പിണഞ്ഞു വളര്‍ന്നു..തോട്ടമാകെ കീടങ്ങള്‍ നിറഞ്ഞു.തോട്ടം നശിച്ചു.

അദ്ദേഹത്തിന്റെ അച്ഛന്‍ ആകെ വിഷമിച്ചുകാണും..

അദ്ദേഹം വിഷമിച്ചു. ഗ്രാമത്തലവനായിരുന്നു അദ്ദേഹം .ഫുക്കുവോക്കയാണെങ്കില്‍ മറ്റാള്‍ക്കാരുമായി ഇണങ്ങിപ്പോവുകയുമില്ല.മൊത്തത്തിലെല്ലാം ഒന്ന് ശരിയാവുന്നതുവരെ വേറേയെന്തെങ്കിലും ചെയ്യാന്‍ അദ്ദേഹം മകനെ ഉപദേശിച്ചു.

അപ്പോള്‍ രണ്ടാം ലോകമഹായുദ്ധം നടക്കുന്ന സമയമായിരുന്നു ‍. സൈന്യത്തിലേക്ക് ആളെ ആവശ്യമുണ്ട്.പക്ഷെ സൈന്യസേവനം അദ്ദേഹം ഇഷ്ടപ്പെട്ടില്ല.ആ സമയത്താണ് ക്വോച്ചി ജില്ലയിലെ ഗവേഷണ കേന്ദ്രം കീട രോഗ നിയന്ത്രണത്തില്‍ മുഖ്യ ഗവേഷകനായി അദ്ദേഹത്തെ ക്ഷണിച്ചത്.പിന്നെ എട്ടുകൊല്ലത്തോളം ആ ഗവേഷണ കേന്ദ്രത്തിലെ ശാസ്ത്രീയ കൃഷിവിഭാഗത്തിലെ മേല്‍പ്പരിശോധകനായി അദ്ദേഹം ജോലിനോക്കി.യുദ്ധ കാലമായതുകൊണ്ട് ഭക്ഷ്യോല്‍പ്പാദന വര്‍ദ്ധനവ് വന്‍ തോതില്‍ ആക്കാനുള്ള ഗവേഷണങ്ങളും നടത്തി.

യുദ്ധം കഴിഞ്ഞു......

ഹിരൊഷിമയിലും നാഗസാക്കിയിലും അണുഗുണ്ട് പരീക്ഷിച്ചു.

അണുബോബ് പരീക്ഷിച്ചോ..യുദ്ധത്തില്‍ പരാജയപ്പേടുത്താന്‍ അണുബോംബ് ഇട്ടതല്ലേ..

പരീക്ഷണം തന്നെയായിരുന്നു ടോം..യുദ്ധത്തില്‍ ജര്‍മ്മനിയും സഖ്യകക്ഷികളും ഏതാണ്ട് പൂര്‍ണ്ണമായും പരാജയപ്പെട്ട അവസ്ഥയിലായിരുന്നു.പരാജയപ്പെട്ടവന്റെ തലയില്‍ എന്തിനായിരുന്നു അണുഗുണ്ട് കൊണ്ടിട്ടത്..? പല പല കാരണങ്ങള്‍ പറയപ്പെടുന്നു.ശാസ്ത്ര സാഹിത്യ പരിഷത്തിന്റെ “ആയിരം സൂര്യന്മാര്‍ “എന്ന പുസ്തകത്തില്‍ ഈ കാര്യങ്ങളൊക്കെ വിശദമായി ചര്‍ച്ച ചെയ്യുന്നുണ്ട്.നമുക്ക് ദേവന്‍ മാമനോട് എഴുതാന്‍ പറയാം.നിഷ്പക്ഷമായി സത്യമറിയണേല്‍ അതേ പറ്റൂ:)

ആര്‍ വീ ജീ മേനോന്‍ സാര്‍ ഒരു പുസ്തകമെഴുതിയിട്ടുണ്ട്. ഡിറ്ററന്‍സ് എന്ന ആണവയുദ്ധതന്ത്രത്തിന്റെ മണ്ടത്തരങ്ങളെപ്പറ്റി..പേരു മറന്നു പോയി..

ഞാനും വായിച്ചിട്ടുണ്ട്..

അണുബോംബിനെപ്പറ്റിയൊക്കെ ഫുക്കുവോക്കയുടെ പുസ്തകത്തില്‍ പറഞ്ഞിട്ടുണ്ടോ?

ഏയ് , ഇല്ല..ആണവയുദ്ധവും അമിത ശാസ്ത്രീയത , സാങ്കെതികതയുമൊക്കെ വരുത്തുന്ന കുഴപ്പങ്ങള്‍ വിവരിയ്ക്കുന്നുണ്ട് . ഹിരോഷിമയിലേയും നാഗസാക്കിയിലേയും അണുഗുണ്ട് ഇടലിനെപ്പറ്റിയൊന്നും പ്രത്യേകമായി പറഞ്ഞിട്ടില്ല.

എന്തായാലും യുദ്ധത്തിനു ശേഷം ഫുക്കുവോക്ക ഗ്രാമത്തിലേക്കു തന്നെ തിരിച്ചെത്തി.കൃഷിപ്പണി തുടരാനായി...

“പിന്നെ ഒരു മുപ്പതുകൊല്ലം എനിയ്ക്ക് കൃഷി തന്നെ ജീവിതം.പുറം ലോകവുമായി ഞാന്‍ ബന്ധപ്പെട്ടിരുന്നില്ലെന്നു തന്നെ പറയാം.അക്കാലമത്രയും ഇടം വലം നോക്കാതെ പണി വേണ്ടാത്ത കൃഷിരീതിയുടെ നേര്‍ക്കായിരുന്നു എന്റെ കുതിയ്ക്കല്‍.

ഇതു ചെയ്താലെന്താ , അതു ചെയ്താലെന്താ എന്നീ ചോദ്യങ്ങള്‍ക്കു പിന്നാലെ വിദ്യകള്‍ ഓരോന്നായി നടപ്പില്‍ വരുന്നു. സാധാരണ പുതിയ ഒരു സമ്പ്രദായം രൂപപ്പെടുന്ന വഴിയിതാണ്. പരിഷൃത കൃഷിയും രൂപപ്പെട്ടത് ഈ വഴി തന്നെ.ഈ പരിപാടിയില്‍ കൃഷിക്കാരനെപ്പോഴും തിരക്കിട്ട പണിയായിരിയ്ക്കും.

പക്ഷേ നേരേ എതിരാണ് എന്റെ വഴി.സന്തോഷകരവും സ്വാഭാവികവുമായ ഒരു കൃഷിരീതിയായിരുന്നു എന്റെ ലക്ഷ്യം.കൃഷിയില്‍ പണി ക്രമത്തില്‍ കൂടരുത്.. കുറയുകയും വേണം.“അത് ചെയ്തില്ലെങ്കിലെന്താ..ഇത് ചെയ്തില്ലെങ്കിലെന്താ..” എന്നായിരുന്നു എന്റെ ചിന്താഗതി. ഓടുവില്‍ ഞാനെത്തിച്ചേര്‍ന്നത് ഉഴമ വേണ്ടാ, കമ്പോസ്റ്റ് വേണ്ടാ, യന്ത്രം വേണ്ടാ, രാസവളവും കീടാനാശിനികളും വേണ്ടാ എന്ന നിലപാടിലാണ്.ഈ തലത്തിലെത്തിയാല്‍ യഥാര്‍ത്ഥത്തില്‍ വേണ്ടതായ കൃഷിപ്പണികള്‍ ഒത്തിരി കുറവാകും.“

(പണി വേണ്ടാത്ത കൃഷി, ഒറ്റ വൈക്കോല്‍ വിപ്ലവം , മസനോബു ഫുക്കുവോക്കാ)

കീടനാശിനി വേണ്ടാ, രാസവളം വേണ്ടാ എന്നൊക്കെ മനസ്സിലായി. ഞങ്ങളുടെ അടുക്കളത്തോട്ടത്തില്‍ രാസവളവും കീടനാശിനികളും ഉപയോഗിയ്ക്കാറില്ല.പക്ഷേ കമ്പോസ്റ്റും ഉഴവും വേണ്ടാ എന്നു പറഞ്ഞാല്‍ എങ്ങനെ അംഗീകരിയ്ക്കാന്‍ പറ്റും ? ഉഴവില്ലാതെ എങ്ങനെ കൃഷി ചെയ്യും?

അതു തന്നെയാ‍ണ് എല്ലാവരും ചോദിയ്ക്കുന്നത്. പക്ഷേ ഫുക്കുവോക്ക പറയുകയല്ല ചെയ്തത്. പ്രവര്‍ത്തിച്ചു കാണിച്ചു തരുന്നു. മുപ്പതു കൊല്ലമായിട്ട് അദ്ദേഹത്തിന്റെ വയലുകളില്‍ മണ്ണിളക്കിയിട്ടില്ല.വളങ്ങള്‍ ചേര്‍ത്തിട്ടില്ല.ഒന്നും ചെയ്തിട്ടില്ല.എന്നാലും ജപ്പാനിലെ പ്രമുഖ കൃഷിയിടമായ ഐഹം ജില്ലയിലെ ഏറ്റവും മുന്തിയ വിളവിനൊപ്പം നെല്ല് ഫുക്കുവോക്കയ്ക്ക് ലഭിയ്ക്കുന്നു.മറ്റ് വിളകളും അങ്ങനെ തന്നെ.

അങ്ങനെയെങ്കില്‍ അദ്ദേഹം എങ്ങനെയാണ് ഞാറു നടുന്നത്?
സന്തോഷിന് ഞാറുനടലെന്നൊക്കെ അറിയാമോ?
ഞങ്ങള്‍ക്ക് വയലുണ്ട്.ചെല പൂവിനു കൃഷിയിറക്കും.

ഫുക്കുവോക്കയുടെ രീതിയില്‍ ഞാറുനടലില്ല..വിതയേയുള്ളൂ.തണുപ്പുകാലത്ത് ധാന്യങ്ങള്‍ കൊയ്യാറാവുന്നത് മേയ് മാസം ഒടുവിലാണ്. കൊയ്ത്തിനു രണ്ടാഴ്ച മുന്‍പ് ബാര്‍ലിയും വരകും നില്‍ക്കുന്ന കണ്ടങ്ങളില്‍ നെല്ലു വിതയ്ക്കും.
ബാര്‍ലിയും വരകും കൊയ്തു കഴിഞ്ഞ് വൈക്കോല്‍ വയലില്‍ തിരികെ കൊണ്ടിടും.വിത തീര്‍ന്നു.

കൊയ്ത്തിനു മുന്‍പ് വിതയ്ക്കുകയോ.അപ്പോ....ആകെ പ്രശ്നമായല്ലോ..എനിയ്ക്കൊന്നും മനസ്സിലായില്ല..

എടാ..ഒരു പൂവു കൊയ്യുന്നതിനു മുന്‍പ് അതേ വയലില്‍ കൊയ്യാറായി നില്‍ക്കുന്ന വിളയുടെ മുകളില്‍ അടുത്ത പൂവിനുള്ള കൃഷിയിറക്കുന്നു..പരമ്പരാഗതമായോ ആധുനികമായോ നമ്മള്‍ കേട്ടിട്ടേയില്ലാത്ത രീതിയായതുകൊണ്ടാണീ അത്ഭുതം.

കൃഷി എന്നു പറഞ്ഞാല്‍ നമുക്ക് പൂട്ടല്‍, മരമടി ,കിള, വെട്ട് കുത്ത് ഇതൊക്കെയാണല്ലോ..ഇതില്‍ അതൊന്നുമില്ല വെറുതേ വിതയ്ക്കുക ..കൊയ്യുക..അത്രന്നെ.

അപ്പൊ വേരുപടലങ്ങള്‍ക്ക് വളരാനൊന്ന് മണ്ണിളക്കുക കൂടി വേണ്ടേ..?

അതില്‍ പല കാര്യങ്ങളുണ്ട്.ഗവേഷണ ശാലകള്‍ പുറത്തിറക്കുന്ന വിത്തുകള്‍ സാധാരണയായി ഈ രീതിയില്‍ ഉപയോഗിയ്ക്കാറില്ല.അത് രാസവളവും കീടനാശിനികളും നല്‍കിയാല്‍ മാത്രം അതിജീവിയ്ക്കാന്‍ ഉണ്ടാക്കിയതാണെന്നതാണ് കാരണം..ഒരോരോ പ്രദേശങ്ങള്‍ക്കും അതിന്റെ തനതായ കാലാവസ്ഥയിലൂടെയും ഭൂപ്രകൃതിയിലൂടെയും ഉരുത്തിരിഞ്ഞു വന്ന വിത്തു വര്‍ഗ്ഗങ്ങളുണ്ടാകും.അത്തരം വിത്തുകളായിരിയ്ക്കും പ്രകൃതികൃഷിയില്‍ ഉപയോഗിയ്ക്കുക.അവയ്ക്ക് ആ പ്രദേശത്തെ മണ്ണില്‍ നില്‍ക്കാനാവശ്യമായ വേരുപടലങ്ങളുണ്ടാ‍കും.അവയില്‍ നിന്ന് ആ നിലത്തിനു വേണ്ടിയുള്ള ഏറ്റവും നല്ല വിത്തിനം കൊല്ലങ്ങള്‍ കൊണ്ട് ഉണ്ടാക്കിയെടുക്കണം.കൊല്ലങ്ങളായി തിരഞ്ഞെടുത്തുള്ള പ്രജനനം വഴി.

അപ്പൊ ഐ ആര്‍ എട്ട്, ജയ, കാവേരി ഇതൊന്നും പറ്റൂലേ?

പറ്റില്ലെന്നു പറയാനാകില്ല. രാസവളമില്ലാതെ ആ വിത്തിനങ്ങള്‍ നല്ല വിളവു തരുന്നുണ്ടെങ്കില്‍ നല്ലത്. ഈ ഐ ആര്‍ എട്ടിന്റേയും മറ്റും തള്ളിച്ചയില്‍ എത്രയെത്ര പഴയ വിത്തിനങ്ങള്‍ നമുക്ക് നഷ്ടപ്പെട്ടിരിയ്ക്കുന്നു?

ശരിയാണ്..പഴയ വിത്തുകളെപ്പറ്റി അമ്മമ്മ ഇന്നലെ പറഞ്ഞതേയുള്ളൂ..എന്താ..ചേറായിയൊ?

അത് ചേറാടിയായിരിയ്ക്കും..വെള്ളക്കെട്ടുണ്ടായാലും നശിച്ചുപോകാത്ത ഒരിനം വിത്തായിരുന്നത്..ഇപ്പൊ കിട്ടാനേയില്ല..അങ്ങനെപലതും...
മരങ്ങളില്‍ ഒട്ടുമാവുകളും നാടന്‍ മാവുകളും നൊക്കൂ..നാട്ടില്‍ ഒരു സമയത്ത് നാട്ടുമാങ്ങാ പലതരം, മൂവാണ്ടന്‍, കൊളമ്പി, കിളിച്ചുണ്ടന്‍, മൊന്തന്‍, വെള്ളരിമാങ്ങ തുടങ്ങി എത്രയെത്ര മാങ്ങകളായിരുന്നു.ഇന്ന് എല്ലായിടത്തും ഒട്ടുമാവുകള്‍ മാത്രം.
ഒട്ടുമാവില്‍ നിന്ന് ഒറ്റ മാങ്ങ പുഴുവില്ലാതെ കിട്ടില്ല..പിന്നെ പുഴു വരാതിരിയ്ക്കാന്‍ മരുന്നടി, പുകയ്ക്കല്‍ , തീയിടല്‍..എന്തെല്ലാം ജോലികളാണ്...മരുന്നടിച്ച മാങ്ങ തിന്ന് അസുഖം വരും. പിന്നെ അസുഖം മാറ്റാന്‍ ആശുപത്രി, മരുന്ന്..ആ മരുന്ന് തിന്നുണ്ടായ അസുഖം മാറ്റാന്‍ വീണ്ടും മരുന്ന്.....
നാട്ടുമാവില്‍ ഒറ്റ പുഴുവിനെ കണ്ടിട്ടുണ്ടൊ?

അതേ ..ഒരു ഓഫ് ..:) പണ്ടേ ആരോടെങ്കിലും ചോദിയ്ക്കണമെന്ന് വിചാരിച്ചതാണ്..എങ്ങനാ വെളീയിലൊരു തുള പോലുമില്ലാതെ മാങ്ങയ്ക്കകത്ത് പുഴു കയറുന്നത്?

പുഴു കയറുന്നതല്ല മഹേശാ..മാവിന്റെ പൂവില്‍ പുഴുവിന്റെ അമ്മപ്പക്കി മുട്ടയിടും..പൂവ് വളര്‍ന്ന് മാങ്ങയാകുമ്പോള്‍ മുട്ട വിരിഞ്ഞ് പക്കിയുടെ ലാര്‍വയായ പുഴുവാകും..അതങ്ങനെ മാങ്ങയ്ക്കകത്താകും..പിന്നെ വലുതാകുമ്പോ മാങ്ങ തുളച്ച് പക്കിയായി പുറത്ത് കടക്കും..അതാണ് കാര്യം..

പക്കിയെന്താ നാടന്‍ മാവിന്റെ പൂ‍വില്‍ മുട്ടയിടാത്തേ?

ആവോ അറിയില്ല..ചിലപ്പൊ ഇഷ്ടമല്ലായിരിയ്ക്കും..അല്ലേല്‍ ചിലപ്പോ പക്കിയെ ആ‍കര്‍ഷിയ്ക്കുന്ന ഏതെങ്കിലും രാസവസ്തു ആ മാങ്ങയിലില്ലായിരിയ്ക്കും..ഗവേഷിയ്ക്കേണ്ട കാര്യം തന്നെ. കാലാ കാലങ്ങളായി അതാതു നാടുകളിലെ കീടവും മാവും തമ്മിലുള്ള ഒരു മത്സരത്തിന്റെ സ്വാഭാവികമായ പരിണാമമാണ് ഇന്നത്തെ അതാതു നാട്ടിലെ മാവുകള്‍. ആ നാട്ടിലെ കീടങ്ങള്‍ വ്യാപകമായൊരു നാശം വരുത്തുന്ന വര്‍ഗ്ഗം ആ നാട്ടില്‍ വളരില്ല..അത് വേറേ നാട്ടിനുള്ളതാണ്. പ്രകൃതിയില്‍ അങ്ങനെയൊരു സംതുലനമുണ്ട്..ആവശ്യമില്ലാതെ അതില്‍ ഇടപെടുമ്പോഴാണ് നാം പ്രശ്നക്കുരുക്കില്‍ പെട്ടു പൊകുന്നത്..

ഓഹോ ഇതാണ് നാച്ചുറല്‍ സെലക്ഷന്‍ അല്ലേ..അതിജീവനം..പരിണാമം..

എന്നു വേണമെങ്കില്‍ പറയാം..പരിണാമ സിദ്ധാന്തത്തിന്റെ കാതല്‍ ഇതു തന്നെ.

നമുക്ക് പ്രകൃതി കൃഷിയുടെ നാലു തത്വങ്ങള്‍ ഫുക്കുവോക്ക പറയുന്നത് നോക്കാം..

(ഒന്ന്) മണ്ണിളക്കരുത്അതായത് കിളയ്ക്കാനോ ഉഴാനോ പാടില്ല..

എനിയ്ക്കിനിയും ഈ തത്വത്തിനെ അങ്ങോട്ട് വിശ്വാസമായിട്ടില്ല..മണ്ണിളക്കാതെ എങ്ങനെ?
മഹേശന്‍ കാട്ടില്‍ പോയിട്ടുണ്ടോ?

ഉണ്ട്..ടൂറിനു പോയപ്പൊ നെല്ലിയാമ്പതിയില്‍ പോയിട്ടുണ്ട്..
കാട്ടിലെ ചെടികളില്‍ എന്തെങ്കിലും കുഴപ്പം കണ്ടിട്ടുണ്ടോ?ആരും അവിടെ മണ്ണിളക്കുന്നില്ലല്ലോ,അടിക്കാട്ടില്‍ പല തരം പുല്ലുകള്‍, അനേകായിരം കുറ്റിച്ചെടികള്‍, ചെറുവൃക്ഷങ്ങള്‍, മേല്‍ക്കാട്ടില്‍ വന്‍ മരങ്ങള്‍, വള്ളികള്‍ ഇവയൊക്കെ ഏതു തോട്ടത്തേക്കാളും പുഷ്ടിയോടെ നില്‍ക്കുന്നില്ല്ലേ..അതാണ് പ്രകൃതിയുടെ കൃഷി.നമ്മളത് അനുകരിച്ചാല്‍ മതി...

മണ്ണില്‍ ആവശ്യത്തിനു ജൈവാംശമുണ്ടേല്‍ മണ്ണിര, പലതരം പ്രാണികള്‍, സൂക്ഷ്മ ജീവികള്‍ ഇവയൊക്കെ നന്നായി വളരും.അവിടെയൊക്കെ ഏത് ഇളക്കിയ നിലത്തെക്കാളും നന്നായി ഇളകിയ മണ്ണായിരിയ്ക്കും. മണ്ണിരയെ കര്‍ഷകന്റെ ഉഴവുകാരന്‍ എന്നു തന്നെയാണല്ലോ വിളിയ്ക്കുന്നത്.ഏറ്റവും വലിയ ഉഴവുകാരന്‍ അവന്‍ തന്നെ.

അപ്പൊ മണ്ണിര കമ്പോസ്റ്റും ചേര്‍ക്കണ്ടേ?

ഒരു കമ്പോസ്റ്റും വേണ്ടാ എന്നാണ് ഫുക്കുവോക്കയുടേ മതം. ജൈവാംശം കൂട്ടിക്കൊടുത്ത് മണ്ണിന്റെ പുഷ്ടി കൂട്ടിയാല്‍ അതാതിടത്തിനു പറ്റിയ തരം മേല്‍മണ്ണിളക്കലുകാര്‍ തനിയേ ഉണ്ടായി വരും.അതിനു കമ്പോസ്റ്റൊന്നും വേണ്ടാ..ജൈവ വസ്തുക്കളായ വൈക്കോല്‍, ഇലകള്‍ ഇവയൊക്കെ കൊണ്ട് പുതയിട്ടാല്‍ തന്നെ മതി..

ഫുക്കുവോക്കയുടെ രണ്ടാമത്തെ തത്വം രാസവളമോ മറ്റേതെങ്കിലും വളമോ ചേര്‍ക്കരുത് എന്നാണ്..നമ്മള്‍ എത്രകണ്ട് കാര്യങ്ങള്‍ ചെയ്ത് പ്രകൃതിയില്‍ നിന്നകലുന്നോ അത്രത്തോളം തിരിഞ്ഞ് ചുറ്റേണ്ടി വരുമെന്നാണ് ഫുക്കുവോക്ക പറയുന്നത്.സസ്യ ജന്തുജീവിതത്തിന്റെ ചാക്രിക പ്രവര്‍ത്തനം വഴി മണ്ണ് താനേ പുഷ്ടിപ്പെട്ടോളും എന്നാണ് അദ്ദേഹത്തിന്റെ അഭിപ്രായം.വയലില്‍ നിന്നെടുക്കുന്നതെല്ലാം വയലിലേയ്ക്ക് തിരിച്ചെത്തിക്കണം എന്ന അഭിപ്രായക്കാരനാണ് അദ്ദേഹം. വൈക്കോല്‍ വയലില്‍ തന്നെ വിതറുന്നത് ഒരുദാഹരണം..

വൈക്കോലൊ,,അത് പശുവിനു തിന്നാല്‍ വേണ്ടേ..?

പശുവിന് പച്ചപ്പുല്ല് മതി.പിന്നെ ഉണക്കുകാലത്തേയ്ക്ക് പശുവിനു വൈക്കോല്‍ വേണമെങ്കില്‍ മുഴുവന്‍ ചാണകവും തിരിച്ച് വയലിലെത്തിയ്ക്കുക..ഓരോരോ സ്ഥലത്തും അതാതിടത്തിന്റെ സാംസ്കാരിക , ഭൂപ്രകൃതിയ്ക്കനുസരിച്ച് കൃഷി ചെയ്യണമെന്നാണ് അദ്ദേഹം പറയുന്നത്.

കള നശിപ്പിയ്ക്കരുത് എന്നാണ് മൂന്നാം തത്വം..കള നശിപ്പിയ്ക്കരുത് നിയന്ത്രിയ്ക്കാം.അതിനായി പയറുവര്‍ഗ്ഗങ്ങളുടെ വിരിപ്പ്, വൈക്കോള്‍ പുതപ്പ് , വയലിലാണേല്‍ വെള്ളം നിര്‍ത്തല്‍ തുടങ്ങിയ പരിപാടികള്‍ ഉപയോഗിയ്ക്കാം.

വൈക്കോല്‍ വിരിപ്പ് എങ്ങനെ കളയെ നശിപ്പിയ്കും?

വളര്‍ന്നു വരുന്ന കളകള്‍ക്ക് സൂര്യപ്രകാശം കിട്ടില്ല ..അങ്ങനെ അത് നശിച്ചു പോകും..

പയറുവര്‍ഗ്ഗങ്ങള്‍ കൊണ്ട് പുതയിടല്‍ എന്നാലെന്താ?

കളകളായി പയറുവര്‍ഗ്ഗച്ചെടികള്‍ ഉപയോഗിയ്ക്കുക...വെറുതേ പയറ് വിതച്ചുകൊടുത്താല്‍ മതി..കുറച്ചു കഴിയുമ്പോള്‍ പയറുചെടികള്‍ മറ്റ് കളകളുടെ സ്ഥാനമേറ്റെടുക്കുകയും മണ്ണ് ഫലപുഷ്ടിയുള്ളതായിത്തീരുകയും ചെയ്യും.

പയറുവര്‍ഗ്ഗച്ചെടികള്‍ മണ്ണിനെ ഫലപുഷ്ടിയുള്ളതാകുമോ?ചെടി വളരുമ്പോള്‍ മണ്ണില്‍ നിന്ന് വളം വലിച്ചെടുക്കുകയല്ലെ ചെയ്യുന്നത്..?
ആക്കും..അതിനുത്തരം ഞാന്‍ പറയാം..പയറുചെടികളുടെ വേരില്‍ റൈസോബിയം ഇനത്തില്‍ പെട്ട ബാക്റ്റീരിയാകളുണ്ട്..അവ അന്തരീക്ഷത്തില്‍ നിന്ന് നൈട്രജന്‍ വലിച്ചെടുത്ത് ചെടികള്‍ക്ക് ആഗിരണം ചെയ്യാന്‍ പറ്റുന്ന രീതിയിലുള്ള നൈട്രേറ്റുകളായി മാറ്റും..അങ്ങനെ മണ്ണ് ഫല പുഷ്ടിയുള്ളതായിത്തീരും..

അങ്ങനെ മൂന്നു തത്വം കഴിഞ്ഞു..നാലാമത്തെ തത്വം
നിങ്ങള്‍ക്കെല്ലാമറിയാം..രാസവസ്തുക്കള്‍ കൃഷിയ്ക്കായി ഉപയോഗിയ്ക്കരുത്..

അത് പൂര്‍ണ്ണമായും ശരിതന്നെ:)
പിന്നേ ഫുക്കുവോക്ക നെല്ലും പയറും മാത്രമേ ഉണ്ടാക്കാറുള്ളോ?

അല്ലപ്പാ..മധുരനാരങ്ങാത്തോട്ടം നശിപ്പിച്ചുകൊണ്ടാണല്ലോ പുള്ളിയുടെ
രംഗപ്രവേശം.:).എല്ലാത്തരം വിളകളും അദ്ദേഹം ഉണ്ടാക്കുന്നു.നാരങ്ങാ, പച്ചക്കറികള്‍, ഫലവര്‍ഗ്ഗങ്ങള്‍..ഫലവര്‍ഗ്ഗത്തോട്ടത്തില്‍ പുതപ്പുചെടികളായി പയറുവര്‍ഗ്ഗച്ചെടികള്‍ വച്ചുപിടിപ്പിയ്ക്കുക.അവയും പകുതി കാടന്‍ മട്ടില്‍ തന്നെ വളര്‍ത്തുക..പച്ചക്കറികളും അങ്ങനെ തന്നെ. മാത്രമല്ല ഇങ്ങനെയുണ്ടാകുന്ന പച്ചക്കറികളുടെയും പഴങ്ങളുടെയും രുചിയും കൂടുതലായിരിയ്ക്കുമെന്നാണ് ഫുക്കുവോക്കയുടെ അനുഭവം.

മനുഷ്യ രാശിയുടെ ഇന്നത്തെ മൊത്തത്തിലുള്ള രീതികളില്‍ യോജിയ്ക്കാത്തായാളാണ് ഫുക്കുവോക്ക.ഒരു ശാസ്ത്രജ്ഞനായതുകൊണ്ടാവണം ശാസ്ത്രജ്ഞരെ പുള്ളി വെറുതേ വിടാറില്ല. പല ഗവേഷണത്തിന്റേയും മണ്ടത്തരങ്ങളെപ്പറ്റി അദ്ദേഹം പറയുന്നുണ്ട്..ഗവേഷകനുണ്ടാവേണ്ട മൊത്തമായ വീക്ഷണം അദ്ദേഹം എടുത്തു പറയുന്നു.എല്ലാത്തിനേയും വേറേ വേറേ കണ്ട് പഠിയ്ക്കുന്ന രീതി അദ്ദേഹത്തിന് ഒട്ടും ഇഷ്ടമല്ല. എല്ലാത്തിനേയും അതിന്റെ മുഴുവനായും കണ്ട് ഗവേഷണം നടത്തണമെന്നാണ് അദ്ദേഹത്തിന്റെ അഭിപ്രായം.

എനിയ്ക്കൊന്നും മനസ്സിലായില്ലെന്റണ്ണാ..:)

ഞാന്‍ ഫുക്കുവോക്ക എഴുതിയതു തന്നെ വായിയ്ക്കാം

“ ഒരിയ്ക്കല്‍ ഒരു ഗവേഷണ കെന്ദ്രത്തില്‍ നിന്ന് ഒരു മാന്യനിവിടെ വന്നു.എന്റെ വയലിലെ മുഞ്ഞയ്ക്കും ചിലന്തിയ്ക്കും തമ്മിലുള്ള ബന്ധത്തെകുറിച്ചു പഠനം നടത്താന്‍ വന്നതാണ്. അദ്ദേഹത്തോട് ഞാന്‍ പറഞ്ഞു.

“മുഞ്ഞയെ നശിപ്പിയ്ക്കുന്ന അനേകം ജീവികളുണ്ട്.അവയിലൊന്നായ ചിലന്തിയില്‍ മാത്രമാണ് നിങ്ങള്‍ക്ക് താല്‍പ്പര്യം.ഇക്കൊല്ലം ചിലന്തികള്‍ ഒരുപാടുണ്ട്.കഴിഞ്ഞകൊല്ലം ചെറുതവളകളും അതിനും മുന്‍പ് പെരുംതവളകളുമായിരുന്നു ആധിപത്യം പുലര്‍ത്തിയിരുന്നത്.അത്തരം ജാതികളനേകമുണ്ട്.“
പ്രശ്നത്തിന്റെ ഒരുവശം മാത്രം പരിഗണിയ്ക്കുന്ന ഗവേഷണം കൊണ്ട് പ്രാണികള്‍ തമ്മിലുള്ള അന്യോന്യ ബന്ധത്തിന്റെ നൂലാമാലയ്ക്കുള്ളില്‍, ഒരു പ്രത്യേക സന്ദര്‍ഭത്തില്‍ ഒരു പ്രത്യേക ഇരപിടിത്തക്കാരന്റെ പങ്കെന്തെന്നു ഗ്രഹിയ്ക്കുക അസാധ്യം തന്നെയാണ്.
ചിലന്തികള്‍ പെരുകുന്നതിനാല്‍ മുഞ്ഞ കുറഞ്ഞേക്കും. ഒരുപാടു മഴയുള്ളപ്പോള്‍ തവളകളാകും മുഞ്ഞയെ ഒടുക്കുന്നത്.അല്ലെങ്കില്‍ മഴകുറവും മുഞ്ഞയും തവളയും വിരളവുമായ കാലങ്ങളുമുണ്ട്.

ഷഡ്പദ പ്രാണികളുടെ അന്യോന്യ ബന്ധം കണക്കിലെടുക്കാതെയുള്ള കീട നിവാരണ രീതികള്‍ ഫലപ്രദമല്ല.മുഞ്ഞയേയും ചിലന്തിയേയും കുറിച്ചുള്ള ഗവേഷണം ചിലന്തിയ്ക്കും തവളയ്ക്കുമുള്ള ബന്ധത്തെക്കുറിച്ചും ആലോചിയ്ക്കണം..അപ്പോള്‍ ഒരു തവള വിദഗ്ധന്‍ കൂടി വേണ്ടി വരും..അപ്പോള്‍ തവള ചിലന്തി മുഞ്ഞ നെല്ല് ജലനിയന്ത്രണം ഇങ്ങനെ അനേകം വകുപ്പുകളുടെ വിദഗ്ധര്‍ ആവശ്യമാണ് അന്വേഷക സംഘത്തിലെന്നു വരുന്നു..
(ഒറ്റവൈക്കോല്‍ വിപ്ലവം, മസനോബു ഫുക്കുവോക്ക)
ഇപ്പൊ മനസ്സിലായോ?

അങ്ങനെ മര്യാദയ്ക്ക് പറയൂ..:)

നിങ്ങളൊക്കെ ഗവേഷണം ചെയ്യുമ്പോള്‍ ഇങ്ങനെ മൊത്തമായൊരു വീക്ഷണം വച്ചു വേണം കാര്യങ്ങളെ നോക്കാന്‍..കേട്ടോ..അതത്ര എളുപ്പമൊന്നുമല്ല..

ഗവേഷകരാവുമ്പോഴല്ലേ...:) .ചെയ്യാം...എന്നേ ചെയ്തു..ഹ ഹ ഹ

ഞാന്‍ സീരിയസാവുമ്പൊ കളിയാക്കുന്നോ..പോടാ ..ഞാന്‍ ലോഗൌട്ട് ചെയ്തു..

ചുമ്മാതല്ല ലോ ഗൌട്ട് പിടിയ്ക്കുന്നത്..പിണങ്ങാതെ കണ്ണാ..പോവല്ലേ..ചോദിയ്ക്കട്ട് ഈ പ്രകൃതി കൃഷി ജപ്പാനില്‍ മാത്രമേയുള്ളോ?

ഏയ് അല്ലടാ..ഇന്ന് ലോകമെമ്പാടും ഫുക്കുവോക്കയുടെ രീതിയില്‍ ആള്‍ക്കാര്‍ കൃഷി ചെയ്യുന്നു.പ്രകൃതികൃഷി ഭാരതിയര്‍ക്ക് പുത്തനൊരാശയമല്ലെന്ന് റസൂലിയായില്‍ പ്രകൃതികൃഷി നടത്തുന്ന പ്രതാപ് സി അഗര്‍വാള്‍ പറയുന്നു.രിഷി പഞ്ചമി നാളില്‍ ഉപവസിയ്ക്കുന്നവര്‍ കൊഴുവും കിളയുമേല്‍ക്കാത്ത മണ്ണിലുണ്ടായ ആഹാരമാണ് കഴിയ്ക്കേണ്ടതത്രേ..മാമുനിമാരുടെ ഭക്ഷണവും കിളയ്ക്കാത്ത, പൂട്ടാത്ത മണ്ണില്‍ നിന്നുണ്ടാകുന്ന വിളകളായിരുന്നെന്ന് ചില ഗ്രന്ധങ്ങളില്‍ പറയുന്നു......

അതല്ലേലും റൊക്കറ്റ് കണ്ടു പിടിച്ചതും ആറ്റം കണ്ടു പിടിച്ചതും അണുബോബുണ്ടാക്കിയതുമെല്ലാം ഭാരതീയരാരുന്നെന്ന് പറഞ്ഞുനടക്കാറുണ്ട്

ഹ ഹ ഹ..ഇതതുപോലല്ലെടാ..എല്ലാ പഴയ സംസ്കാരങ്ങളിലും ഇത്തരം അറിവുകളുണ്ട്.ജപ്പാനിലും പുരാതനകാലത്ത് ഇതേരീതിയില്‍ തന്നെയായിരുന്നു കൃഷി. പിന്നീടെപ്പോഴോ വാണിജ്യവും കൃഷിയും ഇടകലര്‍ന്ന് വന്നപ്പോഴാണ് കാര്യം കൈവിട്ട് പോയത്..ലളിതമാണ് കൃഷി..ഏറ്റവും നല്ല ജോലിയാണത്..സുന്ദരവും..

ഫുക്കുവോക്ക പറയുന്നു..

പുത്തന്‍ കൃഷിയില്‍ കര്‍ഷകനു കവിതയെഴുതാനോ പാട്ടുകെട്ടാനോ നേരമില്ല..
കഴിഞ്ഞൊരുനാള്‍ ഗ്രാമത്തിലെ അമ്പലം വൃത്തിയാക്കുകയായിരുന്നു ഞാന്‍.ചുവരില്‍ തൂങ്ങുന്ന ചില അലങ്കാരത്തട്ടങ്ങള്‍ എന്നെ അത്ഭുതപ്പെടുത്തി.പൊടി തുടച്ചു നൊക്കുമ്പോള്‍ മായാന്‍ തുടങ്ങുന്ന അക്ഷരത്തട്ടങ്ങളില്‍ കണ്ടത് അനേകം ഹൈക്കു കവിതകളാണ്.
ഇത്തരമൊരുള്‍നാട്ടില്‍ പോലും അനേകം പേര്‍ കവിതച്ചൊല്ലുകളെഴുതി അമ്പലത്തിലേയ്ക്ക് വഴിപാട് ചെയ്തിരിയ്ക്കുന്നു.ആളുകളുടെ അസ്തിത്വ സീമകള്‍ മുങ്കാലങ്ങളില്‍ എത്ര വിശാലമായിരുന്നു എന്നാണിത് വ്യക്തമാക്കുന്നത്.
ഈ കവിതച്ചൊല്ലുകള്‍ പലതിനും പല നൂറ്റാണ്ടുകളുടെ പഴക്കമുണ്ട്.അവയുടെ കെട്ടുകാര്‍ എത്ര ദരിദ്രരായിരിയ്ക്കും? എന്നാല്‍ കവിതയ്ക്ക് പിറക്കാനൊക്കുന്ന മട്ടില്‍ വിശാലമായിരുന്നു അവരുടെ ജീവിത മണ്ഡലം........................
ഇവിടെ ഈ ചെറിയ വയലും കാത്ത് ഓരോ ദിനത്തിന്റെ സമ്പൂര്‍ണ്ണതയും സ്വച്ഛന്തതയും മുഴുവന്‍ സ്വന്തമാക്കി കഴിയുകയാണ് കൃഷിയുടെ നേരായ വഴി..

(ഒറ്റവൈക്കോല്‍ വിപ്ലവം , മസനോബു ഫുക്കുവോക്ക)
നല്ല ആശയം..ലളിതമായ ജീവിതം..കേരളത്തില്‍ ഇത്തരം കര്‍ഷകരുണ്ടോ?

കേരളത്തിലും വളരെയെധികമാള്‍ക്കാര്‍ പ്രകൃതി കൃഷിയിലേയ്ക്ക് ആകൃഷ്ടരായിട്ടുണ്ട്..ആലപ്പുഴയിലെ ശ്രീ കേ വീ ദയാല്‍ (അദ്ദേഹമാണ് ഒറ്റവൈക്കോല്‍ വിപ്ലവത്തിന്റെ മലയാള പരിഭാഷയ്ക്ക് അവതാരിക എഴുതിയിരിയ്ക്കുന്നത്) പ്രമുഖനായ ഒരു പ്രകൃതി കര്‍ഷകനാണ്. അട്ടപ്പാടിയിലെ‍ ഗോപാലകൃഷ്ണന്‍ മാഷും വിജയലക്ഷ്മി ടീച്ചറും നെതൃത്വം നല്‍കുന്ന സാരംഗ് എന്ന കൂട്ടായ്മ മറ്റൊരു ഉദാഹരണമാണ്.

കേരളമൊട്ടാകെ പ്രകൃതി രീതിയില്‍ കൃഷി ചെയ്യുന്ന കൂട്ടായ്മകള്‍ ഉണ്ടായി വരുന്നു.കൂടുതല്‍ കാര്യങ്ങള്‍ നമ്മുടെ ആഷേച്ചി പറഞ്ഞുതരും..

അമ്പിയണ്ണന്‍ പ്രകൃതി കൃഷി ചെയ്തിട്ടുണ്ടോ..?

ഉണ്ടല്ലോ..പണ്ട് പ്രീഡിഗ്രിയ്ക്ക് പഠിയ്ക്കുമ്പോള്‍ വീട്ടില്‍ ഞാ‍ന്‍ ചെറിയ രീതിയിലൊക്കെ ഇത് പരീക്ഷിച്ചിട്ടുണ്ട്..പക്ഷെ പരമ്പരാഗത കൃഷി രീതികളില്‍ നിന്ന് വിട്ടുമാറാന്‍ അമ്മയുമച്ഛനുമൊന്നും സമ്മതിച്ചിട്ടില്ല..അവരെന്നെ ഓടിയ്ക്കും..പിന്നെ നമ്മുടെ വകയായി പുരയിടത്തിന്റെ മൂലയ്ക്ക് അല്‍പ്പം പ്രകൃതിരീതിയില്‍ പരീക്ഷണങ്ങളൊക്കെ നടത്തി നോക്കിയിട്ടുണ്ട്.പക്ഷേ ഏതു ഗവേഷണത്തിന്റെയും അത്യാവശ്യ ഘടകമായ രേഘപ്പെടുത്തല്‍ ഞാന്‍ ചെയ്തിട്ടില്ല..ഒന്നും എഴുതി വച്ചിട്ടില്ല എന്നു സാരം..അതുകൊണ്ട് തന്നെ മനസ്സില്‍ നിന്ന് പറയാനേ പറ്റൂ..പ്രകൃതിരീതി ഫലപ്രദം തന്നെയാണ്..നിങ്ങളില്‍ താല്‍പ്പര്യമുള്ളവര്‍ ചെയ്തു നോക്കൂ..പച്ചക്കറിയില്‍ തുടങ്ങാം ..നിരീക്ഷണങ്ങള്‍ എഴുതി വയ്ക്കാന്‍ മറക്കരുത് കേട്ടോ..

ഫുക്കുവൊക്കയുടെ രീതി ഒരു കൃഷിയുടെ രീതിയെന്നതിലുപരി ഒരു ജീവിതചര്യയാണ്.തത്വശാസ്ത്രമാണ്.. പ്രകൃതിയോടിണങ്ങിച്ചേര്‍ന്ന് അധികമൊന്നും ആയാസപ്പെടാതെ ഉല്ലാസത്തോടെ ജീവിയ്ക്കുന്ന ഒരു ജീവിതചര്യ..അത് ഒരു മുട്ടന്‍ കാര്യമായൊന്നും എടുക്കേണ്ടതില്ല..തനിയേ അതിനുള്ള മാനസികാവസ്ഥ വരും.ഒന്നിനും പിറകേ ഓടാതെ, ഒന്നിനോടും മത്സരമില്ലാതെ, വരുന്നതിനെ സ്വീകരിച്ച് , രസിച്ച് ചിരിച്ച് കളിച്ച്..അങ്ങനെയങ്ങനെ......

“ഈ വൈക്കോല്‍ കൊണ്ട് ഞാനൊറ്റയ്ക്ക് തുടങ്ങും ഒരു വിപ്ലവം..“

നിശബ്ദരായി കേട്ടുകൊണ്ടിരുന്ന യുവാക്കള്‍ ചിരിച്ചാര്‍ത്തു..

“ഒരു ഒറ്റയാള്‍ വിപ്ലവം..നാളെ നമുക്ക് വലിയൊരു ചാക്കു നിറയേ നെല്ല് ബാര്‍ലി ക്ലോവര്‍ വിത്തുകള്‍ ചുമലിലേറ്റുക ഒകു നിനു ഷി-നോ-മിക്കോട്ടയെപ്പോലെ* റ്റെക്കൊഡാ വയലുകളിലെല്ലാം വിത്തു വിതറുക..“

“അതൊരു ഒറ്റയാള്‍ വിപ്ലവമല്ല“ ഞാനും ചിരിച്ചു..“ഒറ്റവൈക്കോല്‍ വിപ്ലവമാകുന്നു.“

കുടില്‍ വിട്ടു പോക്കുവെയിലിലെത്തിയ ഞാന്‍ ഒരു നിമിഷം നിന്നു.ഫലങ്ങളുടെ ഭാരം കൊണ്ട് കുനിഞ്ഞ് നില്‍ക്കുന്ന മരങ്ങള്‍ കണ്ടു.കളകള്‍ക്കും ക്ലോവറിനുമിടയില്‍ ചിക്കിച്ചികയുന്ന കോഴികളെ നോക്കി പതിവിന്‍പടി ഞാന്‍ വയലിലേയ്ക്കിറങ്ങി....
_____________________________________

*ഒരു ജപ്പാനീസ് ഐതിഹ്യ ദേവന്‍.പിന്നാമ്പുറത്ത് തൂക്കിയിട്ട സഞ്ചിയില്‍ നിന്നും സൌഭാഗ്യം വാരിവിതറിക്കൊണ്ടും രോഗം ഇല്ലാതാക്കിയും ഊരുചുറ്റുന്നു..

അവലംബം
1. മസനോബു ഫുക്കുവോക്ക, ഒറ്റ വൈക്കോല്‍ വിപ്ലവം.
(വിവര്‍ത്തനം സി പീ ഗംഗാധരന്‍) ആള്‍ട്ടര്‍ മീഡിയാ, തൃശൂര്‍
2. വിക്കിപീഡിയ
3. പ്ലൌ ബോയിയും ഫുക്കുവോക്കയുമായുള്ള അഭിമുഖം.
4. Organic farming website

ഒറ്റവൈക്കോല്‍ വിപ്ലവം -1

2010-11-28T10:12:00.000-08:00

ഒറ്റവൈക്കോല്‍ വിപ്ലവം -1

അതേ പിള്ളേരേ ഞാനിന്നെന്തോ പറയും?

എന്തോന്ന് പറയുംന്നും കൂടിയറിയാതെയാണൊ വന്നത്..നല്ല കാര്യം..

വലിയ വലിയ വര്‍ത്തമാനമൊന്നും പറയാനറിയില്ല..വിവരവുമില്ല..നിങ്ങള്‍ പറയൂ..എന്ത് പറയണം?

അമ്പിയണ്ണന്‍‍ പുസ്തകമൊന്നും വായിയ്ക്കാറില്ലേ?

ഒണ്ട് ..അല്ലറ ചില്ലറ വായന..അത്രേള്ളൂ..ഇപ്പം ബ്ലോഗ്വായന മാത്രം..:)

എന്നാ വായിച്ച ഒരു പുസ്തകത്തിനെപ്പറ്റി പറഞ്ഞാട്ടേ..

ഞാനെന്തിനാ പറയുന്നേ? നിങ്ങളങ്ങ് വായിച്ചാപ്പോരേ..
അതുവേണ്ടാ ...ഓരോരുത്തരുടേയും വായന വേറേവേറേ ആയിരിയ്ക്കുമെന്ന് പരാജിതനണ്ണന്റെ ഒരു കവിതക്കമന്റിലുണ്ട്..

എവരീ കവിതക്കമന്റും വായിയ്ക്കുമോ..എന്നാലും പോട്ട് ഞാന്‍ വായിച്ച പുസ്തകത്തിനെപ്പറ്റി പറയണം ല്ലേ..എന്ത് പുസ്തകത്തിനെപ്പറ്റിയാണ് പറയുയേണ്ടത്?

ഏതെങ്കിലും.....പിന്നേ ഒരു കാര്യം പറഞ്ഞേക്കാം..പിള്ളെരാണെന്ന് വിചാരിച്ച് പിന്റുമുയലും കള്ളക്കുറുക്കനും എന്ന മട്ടിലുള്ള കഥാപുസ്തകമൊന്നും പറയണ്ടാ..അതൊക്കെ ഞങ്ങള് വായിച്ചോളാം..

അപ്പൊ സീരിയസ് പുസ്തകം വേണോ?
ങും..സീരിയസ്..ഞങ്ങക്കെല്ലാം മനസ്സിലാകും..മനസ്സിലാകാത്തത് വളരുമ്പം പൊറുത്തോളും..:)

എന്നാല്‍ ഞാനിന്ന് മസനോബു ഫുക്കുവോക്കയെപ്പറ്റി പറയാം..

ജപ്പാന്‍ കാരനാണോ?

തന്നെ..നെനക്കെങ്ങനെ മനസ്സിലായി?

പെരുകേട്ടാലറിയില്ലേ?നമ്മുടേ വക്കാരി മാമന്റെ ആരെങ്കിലുമാണോ?

വക്കാരിമാമന്‍ മലയാളിയാ.(ആണോ?:)...ഇത് ജപ്പാനിലുള്ള ഒരു കര്‍ഷകനാകുന്നു..മസനോബു ഫുക്കുവോക്കാ
അദ്ദേഹം ഒരു പുസ്തകമെഴുതിയിട്ടുണ്ട്..ഒറ്റ വൈക്കോല്‍ വിപ്ലവം..

വിപ്ലവം വരുത്തുന്ന ബുക്കാണോ.?.ബോളീവിയന്‍ ഡയറി പോലെ..?

അയ്യടാ..നീ ബൊളീവിയന്‍ ഡയറിയെന്നൊക്കെ കെട്ടിരിയ്ക്കുന്നോ..?

കേള്‍ക്കുക മാത്രമല്ല തൊക്കെ വായിച്ചിട്ടുമുണ്ട്.... ഇതും അതുപോലൊക്കെയുള്ളതാണോ?

ഇതും വിപ്ലവം തന്നെ..പക്ഷേ ഒന്നും ചെയ്തോണ്ടുള്ള വിപ്ലവമല്ല..ഒന്നും ചെയ്യാതെയുള്ള വിപ്ലവം..

ഒന്നും ചെയ്യാതെങ്ങനാ വിപ്ലവം വരുന്നത്?

വിപ്ലവം എവിടുന്നു വരുന്നു..?

ഹൊ ഒരു വാക്കു കിട്ടിയാ അതേക്കേറി പിടിച്ചോണം..എങ്കില്‍ ഒന്നും ചെയ്യാതെങ്ങനാ വിപ്ലവം ഉണ്ടാകുന്നത്?

വിപ്ലവം എന്നാല്‍ പൊടുന്നനെയുള്ള മാറ്റം എന്നാണെന്നു തോന്നുന്നു അര്‍ത്ഥം.മലയാളം അര്‍ത്ഥം അറിഞ്ഞിട്ട് കാര്യമില്ലല്ലോ..റെവലൂഷന്‍ എന്ന വാക്കിന്റെ അര്‍ത്ഥമെന്താണ്?

ഓഫ് ടോപ്പിയ്ക്കടിയ്ക്കരുത്..കാര്യം പറയൂ ഒന്നും ചെയ്യാതെയെങ്ങനാ വിപ്ലവമുണ്ടാകുന്നത്?

അതിന് അദ്ദേഹത്തിന്റെ ജീവിതത്തെപ്പറ്റി അറിയണം..മനുഷ്യന്‍ പരിതസ്ഥിതികളുടെ സൃഷ്ടിയാണെന്നല്ലേ പറയപ്പെടുന്നത്..അതായത് ജീവചരിത്രമറിയണം..

ഇതാ നിങ്ങളീ അണ്ണന്‍ /മാമന്‍ കൊമ്പ്ലക്സുകാരുടെ ഒരു കുഴപ്പം..എന്തു പറഞ്ഞാലും ചരിത്രം..ഭൂതകാലം കാന്‍സല്‍ ചെയ്ത ചെക്കാണെന്ന് ആരോ പറഞ്ഞിരിയ്ക്കുന്നു..കേട്ടിട്ടില്ലേ

എന്നാലും ഒരല്‍പ്പം ചരിത്രം..ച്ചിരി..അല്ലേ ഈ പോസ്റ്റ് വായിയ്ക്കുന്ന നാട്ടാരെന്ത് പറയും..ഞാന്‍ ചുമ്മാ ചാറ്റുവാരുന്നെന്ന് പറയൂലേ.മാത്രമല്ല ചരിത്രത്തെപ്പറ്റിയുള്ള നല്ല ബോധം ഭാവിയെ നന്നായി അഭിമുഖീകരിക്കാനും നമ്മളെ സഹായിയ്ക്കും..ഞാനിത്തിരി കോമ്പളക്സടിച്ചോട്ടെടാ..

അണ്ണാ ഞാനൊരു കാര്യം പറഞ്ഞോട്ടേ..ഈ ഭൂതം ഭാവിയെന്നൊക്കെപ്പറയുന്നതില്‍ വലിയ കാര്യമൊന്നുമില്ല..ആര്‍ക്കറിയാം നാളെയെന്ത് നടക്കുമെന്ന് ?.

വര്‍ത്തമാനത്തില്‍ സന്തുഷ്ടരാകൂ എന്നാണ് മഹാന്മാര്‍ പറഞ്ഞിരിയ്ക്കുന്നത്..അതുകൊണ്ട് അണ്ണന്‍ വര്‍ത്തമാനം പറയൂ..

ടാ..വര്‍ത്തമാനം എന്നത് പ്രെസെന്റ് എന്ന അര്‍ത്ഥത്തിലാ...അല്ലാതെ വര്‍ത്താനമല്ല
പ്രസന്റ് സാര്‍..പറയൂ..ചരിത്രമോ ഭൂമിശാസ്ത്രമോ എന്താന്നുവച്ചാല്‍ പറയൂ..ഞങ്ങള്‍ റെഡി..

ഈ പുസ്തകമെഴുതിയ ഫുക്കുവോക്ക, മസനോബു ഫുക്കുവോക്ക ജപ്പാന്‍ ദ്വീപ് സമൂഹത്തിലെ തെക്കുഭാഗത്തായിട്ടൂള്ള ഷികോകു എന്ന ദ്വീപിലെ,ഒരു ചെറിയ ഗ്രാമത്തില്‍,1914ലാണ് ജനിച്ചത്.ഒരു സാധാരണ കര്‍ഷകകുടുംബത്തില്‍..

അന്ന് ഇതുപോലൊന്നുമല്ല....ഇങ്ങനെ ചാറ്റു ചെയ്യാനൊന്നും പറ്റില്ല..അന്ന് കുട്ടികള്‍ സ്കൂളില്‍ നിന്നു വന്നാല്‍ പാടത്ത് അച്ഛനമ്മമാരെ പണിയ്ക്ക് സഹായിയ്ക്കുമാരുന്നു..

ഞാനും അച്ഛനെ പണിയില്‍ സഹായിയ്ക്കാറുണ്ട്..കഴിഞ്ഞ റിലീസിന് അച്ഛനെഴുതിയ കോഡെല്ലാം ഡിബഗ് ചെയ്തത് ഞാനും ഏട്ടനും കൂടിയാ..

എടാ ഭയങ്കരാ..:) അച്ഛന്‍ നിനക്ക് എന്നിട്ട് കാശുതന്നോ..അങ്ങേര് ശമ്പളം തരണ്ടേ..

ഒന്നും തന്നില്ല..ചില ഹോളീഡേ വാഗ്ദാനങ്ങള്‍ പുഴുങ്ങാന്‍ വച്ചിരിയ്ക്കുന്നു..വേവട്ടേ എന്ന് ഞാനും വിചാരിച്ചു..

അങ്ങനാന്നേ ഞാനും സഹായിച്ചിട്ടുണ്ട്..ഞാനും അച്ഛന്റെ കൂടെ കക്കാവാരാന്‍ പോകും..

ഞാന്‍ അച്ഛന്റെ കണക്കുകള്‍ നോക്കിക്കൊടുക്കും..

മതി..മതി..എല്ലാരും അച്ഛനെ സഹായിയ്ക്കും..കക്കാവാരലുകാരാ..വെള്ളത്തില്‍ ആഴത്തിലേയ്ക്കൊന്നും മുങ്ങാനിപ്പൊ പോകണ്ടാ..കേട്ടോ..ചെവിയ്ക്ക് കേടാണ്..ആഴം കുറഞ്ഞ ഭാഗത്ത് മുങ്ങിയാ മതി..

മുങ്ങാന്‍ അപ്പന്‍ സമ്മതിയ്ക്കൂല..ഞാന്‍ വള്ളത്തേലങ്ങനെയിരിയ്ക്കും..:)ഉച്ചകഴിഞ്ഞാ അപ്പനും ഞാനും വായനശാലേ വന്നിരിയ്ക്കും..അവിടുന്നാ ബ്ലോഗ്ഗുന്നേ..

അത് കൊള്ളാം....അതൊക്കെ പോട്ട് നമുക്ക് ജീവചരിത്രം തുടരാം....
അദ്ദേഹം സര്‍വകലാശാലയില്‍..മൈക്രോബയോളജിയും സസ്യ രോഗങ്ങളെപ്പറ്റിയുമാണ് പഠിച്ചത്..എന്നിട്ട് യോകോഹാമയിലുള്ള കാര്‍ഷിക കസ്റ്റംസ് ആപ്പീസില്‍ ജോലിയ്ക്ക് കയറി..

ഈ കസ്റ്റംസ് ആപ്പീസിന് മലയാളമൊന്നുമില്ലേ?

കുഴഞ്ഞു..
പോയി ഉമേശപ്പൂപ്പനൊട് ചോദിയ്ക്ക്..എനിയ്ക്കറിയത്തില്ല..
അല്ല നില്ല് നില്‍ക്കൂ..പുസ്തകത്തിന്റെ മലയാളം വിവര്‍ത്തനത്തില്‍ കിടക്കുന്നു..ചൌക്കക്കച്ചേരി..

ങാ..അപ്പൊ അദ്ദേഹം ചൌക്കക്കച്ചേരിയുടെ കയറ്റിറക്കു വിഭാഗത്തില്‍ പരിശോധകനായി ജോലിനോക്കുകയായിരുന്നു.കയറ്റിറക്കു ചെയ്യുന്ന സസ്യഭാഗങ്ങളിലോ ഭക്ഷണവസ്തുക്കളിലോ രോഗവാഹികളായ കീടങ്ങളണ്ടോ എന്നു പരിശോധിയ്ക്കലായിരുന്നു പ്രധാന ജോലി...കൂടെ സസ്യ രോഗങ്ങളുണ്ടാക്കുന്ന കുമിളുകളെപ്പറ്റി ഗവേഷണം നടത്തുകയും ചെയ്തു.

കഠിനാധ്വാനിയയിരുന്നു ഫുക്കുവോക്കാ...ശരീരം നോക്കാതെ ഗവേഷണത്തില്‍ മുഴുകി പരീക്ഷണ ശാലയില്‍ കുഴഞ്ഞു വീണ അവസരങ്ങള്‍ പോലുമുണ്ടായിട്ടുണ്ട്..
എന്നാലും ഉന്മാദകരമായ യൌവനത്തിന്റെ നാളുകളായിരുന്നു അവയെന്നാണ് ഫുക്കുവോക്ക എഴുതുന്നത്..

ചിലപ്പോഴൊക്കെ ചുറ്റിയടിയ്ക്കും ചിലപ്പോ നൃത്തശാലയില്‍ ചെന്ന് നൃത്തം ചെയ്യും..അങ്ങനെ പോകുന്ന ദിവസങ്ങള്‍...

അങ്ങനെയിരിയ്ക്കെയാണ് ഫുക്കുവോക്കയ്ക്ക് ഒരു അനുഭവമുണ്ടായത്..
എന്തനുഭവം..?

അത്..എന്തനുഭവമെന്ന് എനിയ്ക്ക് പറയാനറിയില്ല..ഓരോരുത്തരുക്കും അനുഭവങ്ങള്‍ ഓരോന്നല്ലേ..ഞാന്‍ ഫുക്കുവോക്ക പറയുന്നത് അതുപോലെ എഴുതിയിടാം..നിങ്ങള്‍ തന്നെ തീരുമാനിച്ചോ എന്തനുഭവമെന്ന്..

"സംഗതിയെന്തായാലും ധാരാളം പണിയെടുക്കുന്ന ഭാഗ്യവാനായ ഒരു ചെറുപ്പക്കാരനായിരുന്നു ഞാന്‍. സൂക്ഷ്മ ദര്‍ശിനിയുടെ കുഴല്‍ക്കണ്ണിലൂടെ അനാവരണം ചെയ്യപ്പെട്ട വിശ്വപ്രകൃതിയുടെ വിലാസങ്ങളില്‍ വിസ്മയിച്ചു ഞാന്‍ ദിവസങ്ങള്‍ പിന്നിട്ടു.കണ്ണാടിക്കുഴലിലൂടെ കണ്ട അതിസൂക്ഷ്മ ലോകത്തിനും അനാദ്യന്ത പ്രപഞ്ചത്തിനും തമ്മിലുള്ള അപാര സാദൃശ്യമാണെന്നെ അത്ഭുതപ്പെടുത്തിയത്.

സായാഹ്നങ്ങളില്‍ പ്രേമത്തില്പെട്ടിട്ടോ അല്ലാതേയോ വിഹാരലോലനായി ചുറ്റിക്കറങ്ങി ഞാന്‍ സ്വയം രമിപ്പിച്ചു. ലക്കറ്റ ജീവിതവും അമിതാധ്വാനവും എന്നെ തളര്‍ത്തി.അതിനാല്‍ ഞാന്‍ പരീക്ഷണശാലയില്‍ പലവട്ടം കുഴഞ്ഞുവീണു.ഓടുവില്‍ എനിയ്ക്ക് കഠിനമായ ന്യുമോണിയ പിടിപെട്ടു..

പോലീസാശുപത്രിയുടെ മുകള്‍ത്തട്ടിലെ മുറികളിലൊന്നില്‍ ഞാന്‍ കിടപ്പിലുമായി.,മഞ്ഞുകാലം..കിളിവാതിലിന്റെ തകര്‍ന്ന കണ്ണാടിപ്പഴുതിലൂടെ കാറ്റ് ഹിമശകലങ്ങളെ അകത്തേയ്ക്ക് തൂത്തെറിഞ്ഞു.മൂടിപ്പുതച്ച ഉടലില്‍ ചൂടുണ്ട് ..എന്നാല്‍ മുഖം ഐസുപോലെ തണുത്തിരിയ്ക്കുന്നു.നേഴ്സ് വന്ന് പനിച്ചൂട് നോക്കും. തെല്ലിട നില്‍ക്കാതെ അവള്‍ പോകുകയും ചെയ്യും.

കൊടും തണുപ്പിലെന്നെ തള്ളിയിട്ടിരിയ്ക്കുന്നു.തുണയെല്ലാമറ്റ ഏകാന്തതയുടെ ശൂന്യതയില്‍ മുങ്ങിത്താഴുകയാണ് ഞാനെന്നു തോന്നി. മുഖത്തിനു മുന്നില്‍ തന്നെ മരണം വന്നെത്തിനോക്കുന്നതായി ഞാന്‍ പേടിച്ചു. കാര്യം നിസാരമെന്ന് ഇന്നെനിയ്ക്കു തോന്നുന്നുണ്ട്..പക്ഷേ ഗുരുതരമായിരുന്നു അന്നത്തെ നില.“

ഇത് പലപ്പോഴും എനിയ്ക്ക് തോന്നിയിട്ടുള്ളതാണ്..ഇന്ന് വളരെ ഗുരുതരമെന്ന് തോന്നുന്നത് നാളെ നിസാരമായിത്തോന്നും..
അത് ശരിയാ അച്ഛന്റെ ആപ്പീസുമുറിയില്‍ The crisis of today is the joke of tomorrow എന്നെഴുതി വച്ചിട്ടുണ്ട്

അപ്പൊ നാളത്തെ താമാശകള്‍ക്ക് വേണ്ടീ നാമെന്തിനാ ഇത്ര ടെന്‍ഷനടിയ്ക്കുന്നേ അല്ലേ..പക്ഷേ സമയമാകുമ്പോള്‍ ഇതൊക്കെ നാം മറക്കും..എന്റെ കുഴപ്പമതാണ്..ആപ്പീസുമുറിയിലെഴുതിവയ്ക്കുന്നത് നല്ലതുതന്നെ..പ്രശ്നങ്ങളുണ്ടാകുമ്പോ ഓര്‍ക്കുമല്ലോ..

ഞാനത് ഇനി ബുക്കിലെഴുതി വയ്ക്കും..എനിയ്ക്ക് സ്കൂളിലാ ഏറ്റവും പ്രശ്നം..ചിലപ്പോ തല്ലുകിട്ടുമ്പോഴോ മാര്‍ക്ക് കിട്ടുമ്പോഴോ ഒക്കെ അങ്ങ് മരിച്ചാ മതീന്ന് തോന്നും..പിന്നെയാലോചിയ്ക്കുമ്പോ എല്ലാം രസം..

തല്ലോ, ആരാ തല്ലുന്നേ?

സാറന്മാരുതന്നെ..എന്തിനും ഏതിനും തല്ലു തന്നെ..

ഇവിടെ ആരും കുട്ടികളെ തല്ലാന്‍ പാടില്ലെന്നാ നിയമം.

നമ്മുടെ നാട്ടിലുംആ നിയമങ്ങളൊക്കെ കൊണ്ടു വരാം.. ഇപ്പൊ നമുക്ക് വാചകമടി നിര്‍ത്തി വായന തുടരാം..

“ഒടുവില്‍ ആസ്പത്രി വിട്ടെങ്കിലും പിടികൂടിയ വിഷാദത്തില്‍ നിന്നും രക്ഷപെടാന്‍ എനിയ്ക്കായില്ല.
അക്കാലം വരെ എന്നില്‍ ഉറപ്പുനേടിയിരുന്ന വിശ്വാസങ്ങള്‍ക്ക് ആധാരമെന്ത്? എനിയ്ക്കൊന്നിലും കൂസലുണ്ടായിരുന്നില്ല.ഞാന്‍ സംതൃപ്തനായിരുന്നു. ആ സംതൃപ്തിയുടെ പ്രകൃതമെന്ത്? ജനന മരണ രഹസ്യം എനിയ്ക്കുള്ളില്‍ തറഞ്ഞ ശല്യമായി.
ഉറക്കമില്ല...ഒരു പണിയും വയ്യ. തുറമുഖ പരിസരത്തും കീഴ്ക്കാം തൂക്കായ കടലോരത്തുമുള്ള രാത്രി സഞ്ചാരങ്ങള്‍ എനിയ്ക്കാശ്വാസം തന്നില്ല.

അങ്ങനെ തുറമുഖത്തിനു പിന്‍പുറത്തുള്ള കുന്നിലൂടെ അലയുന്നൊരു രാത്രി നേരം ക്ഷീണം മുഴുത്ത ഞാന്‍ കുഴഞ്ഞു വീണു.വലിയൊരു മരം ചാരി ഉദയം വന്നെത്തി നോക്കും വരെ , ഉറങ്ങാതെ എന്നാലുണരാതെ ഞാനാ കിടപ്പു കിടന്നു.മേയ് മാസത്തിലെ പതിനഞ്ചാം പുലരിയായിരുന്നു അന്ന്..എന്റെ മയക്കക്കാഴ്ചയില്‍ തെളിഞ്ഞ ഉദയവും വെട്ടത്തില്‍ ഉണര്‍ന്ന തുറമുഖവും എങ്ങിനേയോ മങ്ങിമാഞ്ഞു.അപ്പോള്‍ നനുത്തൊരു തീരക്കാറ്റില്‍ ഉഷസ്സിന്റെ നെരിയ മഞ്ഞുറ്റുപ്പ് അഴിഞ്ഞുപോയി.

അതാ ഒരു രാക്കൊക്ക് ..ചെവിതുളയ്ക്കുന്ന ഒരൊച്ചയുമിട്ട് അത് പറന്നകന്നു..അകലുന്ന ചിറകടി ശബ്ദം എനിയ്ക്കു വ്യക്തമായി കേള്‍ക്കാം.ആ ക്ഷണം എന്റെ സന്ദേഹങ്ങള്‍ ഒഴിഞ്ഞു. പ്രജ്ഞയെ കലുഷമാക്കിയ വിഷാദത്തിന്റെ പുകപടലവും മാഞ്ഞു.ആ കാറ്റിനൊപ്പം ഉറച്ച വിശ്വാസത്തില്‍ ഞാനുറപ്പിച്ചിരുന്നതെല്ലാം , എനിയ്ക്കു താങ്ങായ് നിന്നിരുന്നതെന്തും പോയ്മറഞ്ഞു.എന്നില്‍ ശേഷിച്ചത് ഇതൊന്നു മാത്രം.
"ഇല്ല ഈ ലോകത്തില്‍ ഒന്നുമില്ല.”

ഇവ വിചാരിയ്ക്കാതെ വന്ന ഉള്ളില്‍ നിന്നു തന്നെയുയര്‍ന്ന വാക്കുകള്‍..ഒന്നും ഞാനറിയുന്നില്ലെന്ന് ഞാനറിഞ്ഞു.
എനിയ്ക്കാധാരമായിരുന്ന ധാരണകള്‍ അസ്തിത്വ സങ്കല്‍പ്പം തന്നെയും കേവലം ഇല്ലാത്തതെന്ന് ഞാന്‍ കണ്ടു..എന്റെ ചേതന മേദസ്സറ്റു തെളിമയുറ്റതായി..ആനന്ദ ലഹരിയില്‍ ഞാന്‍ നൃത്തം ചെയ്തു..മരച്ചില്ലകളില്‍ കിളികള്‍ ചിലയ്ക്കുന്നതെനിയ്ക്കു കേള്‍ക്കാം ..അകലെ കടലലകളില്‍ അരുണകിരണങ്ങളുടെ മിന്നിത്തിളക്കം...അരികെ തുള്ളിക്കളിയ്ക്കുന്ന ഇലകളില്‍ പച്ചത്തിളക്കം.ഇതാ‍ണ് സ്വര്‍ഗ്ഗം..എന്റെ അല്ലലെല്ലാം പാഴ്ക്കിനാവെന്ന മട്ടില്‍ പോയിമറഞ്ഞു..ആ സ്ഥാനത്ത് “ശരിയായ പ്രകൃതി “ എന്ന എന്തോ ഒന്ന് മറനീക്കി പുറത്തുവന്നു.”

(ഒറ്റവൈക്കോല്‍ വിപ്ലവം : മസനോബു ഫുക്കുവോക്കാ..)

ഇനിത്രയും മതി..ബാക്കി നാളെയാവാം..പോരേ?

നല്ല രസമുണ്ടായിരുന്നു..ശരി..ഇത് ഒന്നൂടെ വായിയ്ക്കട്ടേ..

ശരി..വീട്ടില്‍ പോകാറായി..ഇരുട്ടുന്നു..വായനശാല അടയ്ക്കാന്‍ ദാണ്ടേ ബിനുവേട്ടന്‍ വരുന്നു..പോകട്ടേ

ഇവിടെ എനിയ്ക്ക് സ്കൂളില്‍ പോകാനുള്ള നേരമായി..അച്ഛന്‍ റെഡിയായെന്നു തോന്നുന്നുണ്ട്..ഞാനും പോകുന്നു:)

എനിയ്ക്ക് ലഞ്ച് ബ്രേക്ക് കഴിഞ്ഞു..ഞാനും പണിയ്ക്ക് പോകട്ടേ..അപ്പൊ ബൈ..നാളെ..:)

(ഇവിടെ പണ്ടിട്ടതാണ്. എല്ലാം ഒരുമിച്ചിടുന്നെന്നേയുള്ളൂ.)

അലിമേത്തര്‍

2010-11-17T08:16:00.000-08:00

ഫ്യൂഡലിസത്തിന്റെ നന്മപാടുകൊന്നുമല്ല.

നീലാണ്ടച്ചാരേന്ന് വിളിച്ചത് കേട്ടിട്ട് നീലാണ്ടാന്നേ കേട്ടുകാണൂ.
അപ്പൂപ്പന് നീലാണ്ടാന്നാവാമെങ്കി എനിയ്ക്കെന്താന്ന് ചോദ്യം വന്ന് കാണും.
നീലാണ്ടാ ചോറുണ്ണാന്‍ വരികെന്ന് പറഞ്ഞത് മാത്രം ഓര്‍മ്മയുണ്ട്

“പട്ടിക്കഴുവേര്‍ഡാമോനേ നീലാണ്ടന്‍ വേലത്താനേന്ന് വിളിയെടാ. നിന്റെയെളീലിരുത്തിയോ അവന് പേരിട്ടതെന്ന്“ അമ്മൂമ്മ.

വേലത്താനേന്നൊരു വാക്ക് എങ്ങോട്ടോപോയത് ഓര്‍ത്തെന്ന് മാത്രം.
വേലത്താനുമെങ്ങോട്ടോ പോയി.സുന്ദരനായ വേലത്താന്‍.
ഒരൊറ്റത്തോര്‍ത്ത് മാത്രമുടുത്ത് തലയിലെപ്പോഴുമൊരു കെട്ടും കെട്ടിനകത്തൊരുകെട്ട് ബീഡിയും നിറച്ച വേലത്താന്‍.

വേലത്താന്റെ ഭാര്യ മീനാടിയായിരുന്നു.അവര് മേത്തന്റയ്യത്തെ കൈയ്ക്കാരിയായിരുന്നു.കൃഷ്ണകുമാറണ്ണനും മധുവണ്ണനും രവിയണ്ണനൂടെ “കറിയ്ക്കരിഞ്ഞതും കായവറുത്തതും നെയ്യപ്പം ചുട്ടതും നീയറിഞ്ഞോടീ, അടുത്തവീട്ടിലെ കറുത്ത പെണ്ണേ മീനാടീ“ എന്ന് കളിയാക്കുമ്പോ അവരങ്ങ് നിറഞ്ഞ് ചിരിയ്ക്കും.പിന്നേം മൊറത്തില് നോക്കിയിരുന്ന് അരിപാറ്റും.അവരുടെ മകന്‍ സജീവന്‍ ഞങ്ങടെ കൂട്ടുകാരനായിരുന്നു. അവനന്ന് ഒരു സൈക്കിളുണ്ടായിരുന്നു.

അപ്പൂപ്പന്റെ പ്രായമുള്ള നീലാണ്ടന്‍‌വേലത്താന് എന്റെ പ്രായത്തിലൊരു മകനുണ്ടാകുന്നതെങ്ങനെ എന്ന് രസതന്ത്രം അറിയാത്ത കാലത്തെ വലിയൊരു അസ്തിത്വ ദുഖമായി നിലനിന്നിരുന്നു.

അലിമേത്തരും വീട്ടില്‍ തന്നെയായിരുന്നു താമസം. മൊതലാളി എന്ന് വിളിയ്ക്കണമെന്നായിരുന്നു അനുശാസനം. ആറാറരയടി നീളം . വെള്ള മുണ്ടും വെള്ള ഉടുപ്പും. മെലിഞ്ഞ് കോലുപോലെയുള്ള ശരീരം. അപ്പൂപ്പന്റെ കാളവണ്ടിക്കാരനും കയ്യാളുമായിരുന്നു(ത്രേ:)) അലിമേത്തര്‍. അങ്ങേര്‍ക്കൊരു വീട് വേറെയുണ്ടെന്ന് എനിയ്ക്കറിയില്ലായിരുന്നു.

ഉത്രാടത്തിന് പോയി മൊട്ടത്തലയിലെ ബാക്കി മുടിയൊക്കെ വെട്ടി ഓണത്തിന് പുതിയ വെള്ളമുണ്ടൊക്കെയുടുത്ത് അമ്പലത്തീന്ന് കുറിവാങ്ങിച്ച് തൊട്ട് വരും അലിമേത്തര്. എരിത്തിലിന്റടുത്തുള്ള അലിമുറിയില്‍ (ഞങ്ങള്‍ പിള്ളേര് മുതലാളിയുടേ മുറിയ്ക്കിട്ട പേരാണത്) തന്നെയായിരുന്നു എപ്പോഴും. നിഗൂഡാത്മകത എപ്പോഴും ചുറ്റി നിന്ന അലിമുറിയില്‍ മൊതലാളിയവിടില്ലാത്തപ്പോ കുത്തിത്തുറന്ന് കയറും. കുപ്പികളിലിരിയ്ക്കുന്ന എണ്ണകളിലൊക്കെ എന്തോ മന്ത്രവാദവസ്തുക്കളെപ്പോലെ നോക്കിനില്‍ക്കും. ഇഴഞ്ഞ് കയറ്യ ചേരകളെ കണ്ട് എട്ടുകാലികള്‍ ഓടിയൊളിയ്ക്കും.

പശുവിന്റെ കാര്യമൊഴിച്ച് അലിമേത്തര്‍ എന്തെങ്കിലും ചെയ്തിരുന്നതായി എനിയ്ക്കോര്‍മ്മയില്ല. എപ്പോഴും എരുത്തിലിലെ തട്ടൂടിയില് കിടക്കും. ക്രിക്കറ്റ് കളിയ്ക്കുമ്പോള്‍ അങ്ങനെ കിടക്കുന്ന അദ്ദേഹത്തെ ഉന്നം വച്ച് ഞാന്‍ ബാറ്റു ചെയ്യുമായിരുന്നു. സത്യം പറഞ്ഞാല്‍ എത്ര തവണ പന്ത് വന്ന് വീണിട്ടും എന്തെങ്കിലും എങ്ങേര്‍ എന്നോട് സംസാരിച്ചിട്ടുണ്ടോ എന്ന് എനിയ്ക്ക് ഓര്‍ക്കാന്‍ കഴിയുന്നില്ല.എന്റെ പതിനേഴാം വയസ്സു വരെ വീട്ടില്‍ ഉണ്ടായിരുന്ന മനുഷ്യനാണ്.ഞങ്ങള്‍ പിള്ളേരെക്കുറിച്ച് അങ്ങേര്‍ എന്തായിരിയ്ക്കും വിചാരിയ്ക്കുക. പള്ളിയംകാരെ നടുക്കിയിരുന്ന അലിമേത്തര്‍ ഞങ്ങള് റബറുപന്ത് ഉന്നം വച്ച് അടിച്ചിടുമ്പോ എന്തായിരിയ്ക്കും ചിന്തിച്ചിട്ടുണ്ടാവുക.?

വയ്യാതായപ്പോ നീലാണ്ടന്‍ വേലത്താന്‍ വരാതെയായി. എല്ലാ ദിവസിയും എന്റെ വീട്ടില്‍ രാവിലേവന്ന് വൈകിട്ട് പോകുന്ന വേലത്താന്റെ വീട് ഞാനിന്ന് വരെ കണ്ടിട്ട് പോലുമില്ല. കോട്ടയത്ത് പഠിയ്ക്കാന്‍ പോയപ്പോഴാണേന്ന് തോന്നുന്നു ഒരു അവധിയ്ക്ക് വീട്ടില്‍ വന്നപ്പോ അമ്മ പറഞ്ഞു നീലാണ്ടന്‍ വേലത്താന്‍ മരിച്ച് പോയെന്ന്. മൊതലാളിയ്ക്ക് എന്ത് തോന്നിക്കാണും അറിയില്ല.

അപ്പൂപ്പന്‍ മരിച്ചപ്പോ മൊതലാളി എന്ത് ചെയ്യുവാരുന്നു.അപ്പൂപ്പനോട് ഇത്രയും ഇഷ്ടമുണ്ടായി ഞങ്ങളുടെ വീട്ടില്‍ത്തന്നെ താമസമാക്കിയയാള്‍ വിഷമിച്ചു കാണുമോ. ഓര്‍മ്മയുടെ മിക്ക ഷോട്ടുകളിലും വരച്ചു വച്ചൊരാള്‍ എന്നല്ലാതെ അങ്ങേരെപ്പറ്റി എനിയ്ക്കൊന്നുമറിയില്ല.

ഞാന്‍പ്രീഡിഗ്രീക്ക് പഠിയ്ക്കുമ്പോഴാണ് മൊതലാളിയ്ക്ക് വയ്യാതെയായത്. കിടപ്പായപ്പോ മലവും മൂത്രവുമൊക്കെ കിടന്നിടത്തു തന്നെ പോകാന്‍ തുടങ്ങി. ആസ്ത്മാ രോഗിയായിരുന്നിട്ടും വലിച്ച് വലിച്ച് എന്റെ അമ്മ അദ്ദേഹത്തെ ശൃശ്രൂഷിച്ചു. കാശുകൊടുത്ത് ഒരാളെ നിര്‍ത്തുവാന്‍ അപ്പോഴേയ്ക്കും അച്ഛന്‍ നാലു നിലയില്‍ പൊട്ടി പലിശക്കാര്‍ വീട്ടിനു മുന്‍പില്‍ സത്യാഗ്രഹമിരിയ്ക്കാന്‍ വരുന്ന സമയമായിരുന്നു.

അമ്മയുടെ ബുദ്ധിമുട്ട് കണ്ടപ്പോഴാണ് തേങ്ങാ വാങ്ങിയ്ക്കാന്‍ വന്ന ശിഹാബ്കാക്ക മൊതലാളിയുടെ വീട്ടില്‍ പോയി പറഞ്ഞത്. അപ്പോഴാണ് ഞാന്‍ അദ്ദേഹത്തിനൊരു ഭാര്യയും മക്കളും കുടുംബവുമൊക്കെയുണ്ടായിരുന്നെന്ന് മനസ്സിലാക്കിയത്. ഒരു ദിവസം മുതലാളിയെ കൊണ്ട് പോകാന്‍ അദ്ദേഹത്തിന്റെ മകന്‍ വന്നു.

അങ്ങേരെ ആദ്യമായി കണ്ട സരസ്വതിയമ്മ പറഞ്ഞു. “നോക്കെടേ, അയാളേ കണ്ടാ അലിമേത്തരെവിടെപ്പോയെന്ന് ചോദിയ്ക്കണോ? “

അങ്ങേര്‍ എന്നെ നോക്കി ചിരിച്ചു.ഞാന്‍ നോക്കിയപ്പോ തലേക്കെട്ടുള്ള മൊതലാളി. ഞാനും ചിരിച്ചു.മൊതലാളിയെ കാറില്‍ കിടത്തി മകന്‍ പോയി.

ഇടയ്ക്കിടെ അച്ഛന്‍ പോയി കാണുമായിരുന്നു. മൊതലാളിയ്ക്ക് അച്ഛനെ കാണണമെന്നുള്ളപ്പോഴൊക്കെ മകന്‍ വീട്ടില്‍ വിളിച്ച് പറഞ്ഞിരുന്നു.ഒരുദിവസം അച്ഛന്‍ കുറച്ച് കൂടുതല്‍ പൈസയുമായി പോയി. ഖബറടക്കിന് അച്ഛനുമമ്മയും പോയി.

ഫോണ്‍ ചെയ്തപ്പോള്‍ അച്ഛന്‍ പറഞ്ഞു. നമ്മുടെ അലിമേത്തര് മരിച്ചുപോയെടാ.

പറയി പെറ്റ ചാത്തന്‍

2010-02-23T17:17:00.000-08:00

പറയി പെറ്റിട്ട പന്ത്രണ്ട് പേരും കിടിലങ്ങളാരുന്നു..

അതിലീ തെക്കന്മാര്‍ക്കൊരു ചാത്തനുണ്ടാരുന്നു..അകവൂര്‍ ചാത്തന്‍
ചാത്തനെപ്പറ്റി അപ്പൂപ്പന്‍ പറഞ്ഞു തന്നൊരു കഥ.

അകവൂര്‍ മനയിലെ സേവകനായ ചാത്തന്‍..
കുട്ടിയല്ല..നല്ല വമ്പന്‍ മനുഷ്യ ചാത്തന്‍..

അകവൂര്‍ മനയോ? അതെവിടെയാ?
ആലപ്പുഴയടുത്തെങ്ങാണ്ടാണ് മാഷന്മാരേ..
പക്ഷേ..അകവൂര്‍ മനയെന്നാലകവൂര്‍ മന..
കഥയില്‍ ചോദ്യമില്ല..അഥവാ ചോദ്യമുണ്ടേല്‍
അതിലെന്തു കഥ..അല്ലേ..?
ചോദ്യം വന്നാലതു ചരിത്രം....
വേണ്ടാ വേണ്ടാ..ചരിത്രം എന്നു മാത്രമരുത്..അത് കൊലപാ....
നിര്‍ത്തപ്പാ..ആഫ് ടാപിക്കില്ല..കഥ പറ..:)

അങ്ങനെ ചാത്തന്‍ നമ്പൂരിയുടെ സേവകനായി വിരാജിയ്ക്കുന്ന സമത്വ സുന്ദര സമയം..
നമ്പൂരിയ്ക്കൊരു പതിവുണ്ട്..രാവിലേ എഴുന്നേറ്റതു മുതല്‍ തുടങ്ങും കുളി..പൂജ..തേവാരം...
ആറ്റിലിറങ്ങിനിന്ന് മുദ്ര,ഗായത്രി ജപം......
എപ്പോഴും ചാത്തന്‍ കൂടെയുണ്ടാകും..

ചാത്തനവിടെയെന്തു ചെയ്യുന്നു?
നമ്പൂരിയ്ക്കൊത്തിരി കിടുപിടികളൊക്കെയുണ്ടേ..അതൊക്കെ ആരു ചുമക്കും..
ചാത്തന്‍ ചുമക്കും..മുട്ടന്‍ സഞ്ചി
ചാത്തനാ സഞ്ചിയൊക്കെ കരയില്‍ വച്ച് കിളികളോട് വര്‍ത്തമാനം പറയും
എറുമ്പിനോട് പരദൂഷണം പറയും..
മനുഷ്യരെ കണ്ടാല്‍ ചിരിയ്ക്കും..
നീര്‍ക്കോലികളെ കണ്ണിറുക്കിക്കാണിയ്ക്കും
മൂര്‍ക്കനെ കണ്ണുരുട്ടിക്കാണിയ്ക്കും..

അങ്ങനെയങ്ങനെയൊരു ദിവസം ചാത്തനു ബോറടിച്ചു
ബോറടിയുടെ ദൈവമായി.:)

ചാത്തന്‍ നമ്പൂരിയോട് പറഞ്ഞു..
"അങ്ങത്തേ മതിയങ്ങത്തേ.എനിയ്ക്ക്.വെയക്കണ്"
"ഹൈ..ഞാന്‍ ജപിയ്ക്കുന്നത് കണ്ടുകൂടേ ..തനിയ്ക്ക്"
"എന്തു ജവിയ്ക്കണങ്ങത്തേ..വെയിലേറണ്..
നമ്പൂരിയ്ക്ക് ദേഷ്യമായി..ന്നാലും ജപിച്ച് പൂര്‍ത്തിയാക്കി ,
കുളിച്ചേറി കരയില്‍ വന്നു

സഞ്ചിയില്‍ നിന്നൊരു വെറ്റയെടുത്തൊന്ന് മുറുക്കി
"ടോ ചത്താ..ഞാന്‍ പരബ്രഹ്മോപാസന ചെയ്യുകയാണ്.."
"അതെന്തുവാസന ?"
"അതാണ് ചാത്താ ഏറ്റവും മുന്തിയ ഉപാസന..
അരൂപിയും, കാരുണ്യവാനും,
എല്ലായിടത്തും നിറഞ്ഞിരിയ്ക്കുന്നവനുമായ
പരബ്രഹ്മം.."
എന്തു ഗുണമങ്ങത്തേ?
"ടോ..ജനന മരണ ചക്രങ്ങളൊക്കെ പൊട്ടിച്ചിതറും
മോക്ഷം കിട്ടും"
സ്വര്‍ഗ്ഗം കിട്ടുവോ?

സ്വര്‍ഗ്ഗമല്ലേടോ മോക്ഷം..അതിലുമൊക്കെ വലുത്..

"അതൊക്കെപ്പോട്ട് ഈ പരബിരമമെങ്ങനെ ..കാണാന്‍ നല്ലയാണാ?
നമ്മടെ കണ്ണനെപ്പോലെ?
പഗോതിയെപ്പോലെ
ചെമ്പോക്കുട്ടിയെപ്പോലെ
നല്ല സുന്ദരനാണാ"
"ടോ ഈ പരബ്രഹ്മം സകല ലോകവും നിറഞ്ഞു
നില്‍ക്കുന്ന അരൂപിയായ ദൈവമാകുന്നു.."

"അതെന്തോന്ന് തേവര്? രൂപം പോലുമില്ലേ..

ന്നാലും ഒരു രൂപമുണ്ടല്ലാ...ങ്ങനെയിരിയ്ക്കും അങ്ങുന്നെന്നോടൊന്ന് പറ"

"ഈ മരമണ്ടനോടെന്തു പറയാന്‍?
ന്നാ..പരബ്രഹ്മം ഒരു കാളക്കൂറ്റന്‍
നല്ല കൊഴുത്ത മേനിയുള്ള
വമ്പന്‍ കൊമ്പുള്ള ഉഗ്രനൊരു
കാളക്കൂറ്റന്‍"

"അയ്യേ..

ന്നാലും കൊള്ളാം....

കാളയ്ക്കൊരു പരബിരമമുണ്ടല്ലാ"

പിറ്റേന്നു മുതല്‍ ചാത്തനും തുടങ്ങി നമ്പൂരിയോടൊത്ത് ഉപാസന..

ആറ്റിലിറങ്ങി..നമ്പൂരി ചെയ്യുന്ന പോലൊക്കെ ചെയ്യും..
"ടോ താനെന്തവിടെ ചെയ്യുന്നു?
"ഞാന്‍ കാളപ്പരബിരമോപാസനയിലാണെന്റെ അങ്ങുന്നേ"
ചിരിയ്ക്കാതിരിയ്ക്കാനാവുമോ
"കാളപ്പരബിരമം"

നമ്പൂരി ദേഷ്യപ്പെട്ടില്ല..അറിവില്ലാത്തവനോട് ക്ഷമിയ്ക്കാന്‍ അദ്ദേഹത്തിന് കഴിവുണ്ടായിരുന്നു

"പാവം..കാളയെങ്കില്‍ കാള..അത്രയെങ്കിലുമാവട്ട് "..എന്നു വിചാരിച്ചു..

തിരിച്ചുള്ള വഴിയില്‍ നമ്പൂരിയ്ക്കൊന്ന് മുറുക്കണം..
"ടോ ചാത്താ..എവിടെയെന്റെ സഞ്ചി.."
"അതീ കാളേടേ കൊമ്പിലാ അങ്ങത്തേ"
കാളേടേ കൊമ്പോ..എവിടെ? നമ്പൂരി തിരിഞ്ഞു നോക്കി
സഞ്ചി വായുവിലങ്ങനേയാടിയാടി..

"ഭഗവതീ..നീയുമോ ചാത്താ..:)
നിനക്ക് കുട്ടിച്ചാത്തന്‍..നീ കുട്ടിച്ചാത്തന്‍..
ഹൊ..
തനിയ്ക്ക് കുട്ടിച്ചാത്തന്‍ സേവയുണ്ടല്ലേ?"

"കുട്ടിയാ..? ഞാന്‍ വല്യ ചാത്തനെന്റങ്ങുന്നേ

ഇതു കാളപ്പരബിരമം..

ഇന്നലെ ഞാന്‍ വിളിച്ച മുതലെന്റെ കൂടെ..
നമ്മക്കെന്തെങ്കിലുമുപയോഗം വേണ്ടേ
അതുകുണ്ട് ഈ സഞ്ചിയതിന്റെ കൊമ്പില്‍ തൂക്കി.."

നമ്പൂരിയ്ക്ക് കാര്യം മനസ്സിലായി..മദമടങ്ങി..

ചാത്തനെന്തിനുപാസന..?

ചാത്താ..എനിയ്ക്കും കൂടി കാണിച്ചു തരിക..

ഭക്തികൊണ്ട് കണ്ണു നിറഞ്ഞു..രോമാഞ്ചം വന്നു..ദേഹം വിറച്ചു..

സ്നേഹം നിറഞ്ഞു..

"അത്രേയുള്ളോ..അങ്ങുന്നെന്നെയൊന്ന് തൊട്ട് നോക്കിക്കോ.."

തൊട്ടിട്ട് നോക്കി
കാളയൊന്നു ചിരിച്ചു..
നമ്പൂരി കരഞ്ഞു....

കാള ..അടുത്തുള്ളൊരു ചിറയില്‍ ചാടി..
ഓ..ചിറ.....ഓച്ചിറാ....
ഓച്ചിറ തെക്കന്‍ കാശിയെന്നറിയപ്പെടുന്നു.

മൂര്‍ത്തിയും പൂജാരിയുമൊന്നുമില്ലാത്ത ആല്‍ത്തറയില്‍ വാഴുന്ന..പരബ്രഹ്മം.
രൂപമില്ലാതെ , മായയും മായാവിയും മായാവിനോദനുമായ
സര്‍വതിന്റേയും ഉടയോനായ ഭഗവാന്‍..
ഓച്ചിറ പന്ത്രണ്ട് വിളക്ക് പ്രസിദ്ധം...
വൃശ്ചിക മാസത്തിലെ ആദ്യ പന്ത്രണ്ട് ദിവസം..

വൃതമെടുത്ത് ഓച്ചിറയില്‍ കുടിലുകെട്ടി താമസിച്ച് പന്ത്രണ്ട് ദിനം ഭജമമിരിയ്ക്കുമാള്‍ക്കാര്‍

പിന്നെ ഓച്ചിറക്കളിയും..
അമ്പലപ്പുഴ കായംകുളം രാജാക്കന്മാരുടെ പടവെട്ട് ..
ഇന്ന് ഓച്ചിറ പടനിലത്തില്‍ ഓച്ചിറക്കളിയായി കാണിയ്ക്കുന്നു...

കൊല്ലത്തുനിന്ന് നാഷണല്‍ ഹൈവേയില്‍ വടക്കോട്ട് 34കിലോമീറ്റര്‍..കായംകുളമെത്തുന്നതിന് തൊട്ടുമുന്‍പ് ഓച്ചിറ ക്ഷേത്രം കാണാം.

ഇന്നും
നടയിരുത്തിയ വമ്പന്‍ കാളക്കൂറ്റന്മാര്‍ നിര്‍ഭയരായിമേഞ്ഞു നടക്കുന്ന
ആ മതില്‍ക്കെട്ടിനകത്തെ ആല്‍ത്തറകള്‍ക്കിടയില്‍
പിച്ചക്കാര്‍ക്കിടയില്‍...ആരോടും..മിണ്ടാതെ ചില ടീമുകളിരുപ്പുണ്ട്..

പരബ്രഹ്മത്തിന് കയ്യും കാലും വച്ച്
ചിരിച്ചോ ചിരിയ്ക്കാതേയോ..കുളിച്ചോ കുളിയ്ക്കാതേയോ..

അവധൂതന്മാര്‍....

(ഇവിടെയിട്ടിരുന്നതാണ്. എല്ലാം ഒന്നൊരുമിച്ചുകൂട്ടുന്നു എന്നു മാത്രം.)

ശ്രീ ഗുരു‍ഗുഹ

2008-10-20T01:04:00.000-07:00

ശ്രീ ഗുരുഗുഹ ഒരു പഠനകേന്ദ്രമാണ്. സംഗീതം മുതല്‍ ധ്യാനവും ക്വാണ്ടം ഭൌതികവും വരെയുള്ള കലകളുടെ ഒരു പഠനകേന്ദ്രം.

മുത്തുസ്വാമിദീക്ഷിതരുടെ സമാധിദിനമായ ഈ ദീപാവലിനാള്‍ വൈകുന്നേരം അഞ്ചരയ്ക്ക് (ഒക്ടോബര്‍ 27 , തിങ്കളാഴ്ച ) ഇടപ്പള്ളി ചങ്ങമ്പുഴ പാര്‍ക്കില്‍ വച്ച് ഗുരുക്കന്മാരുടേയൊക്കെ അനുഗ്രഹങ്ങളോടെ ഇത് ആരംഭിയ്ക്കുന്നു. അതോടൊപ്പം ഇടപ്പള്ളി സഹോദരന്മാരുടേ സംഗീതക്കച്ചേരിയും ഉണ്ടാവും. എല്ലാവരുടേയും അനുഗ്രഹാശ്ശിസ്സുകള്‍ പ്രാര്‍ത്ഥിയ്ക്കുന്നു.

അഗ്രിഗേറ്ററുകളില്‍ കാണത്തതിനാലാണ് ഈ പോസ്റ്റിടുന്നത്. ഗുരുഗുഹയുടെ ബ്ലോഗിലേയ്ക്ക് ഈ വഴിയേ പോവുക.നന്ദി

ഭീകരത.

2008-07-28T17:46:00.000-07:00

ശ്രീ രാജീവ് ചേലനാട്ടിന്റെ ബ്ലോഗില്‍ കമന്റായി എഴുതിയത്.

സ്ഫോടന പരമ്പര നടന്നു എന്നതില്‍ കൂടുതല്‍ വിഷമമുണ്ടാക്കുന്നു മിസ്റ്റര്‍ ചേലനാട്ട് നിങ്ങളുടെ ഈ ഹിപ്പൊക്രസി വായിച്ചിട്ട്.
ആദ്യമായി ഒരു കാര്യം പറഞ്ഞോട്ടേ, ഹൈന്ദവ സമുദായത്തില്‍(അങ്ങനെയൊന്നുണ്ടേന്ന് അംഗീകരിയ്ക്കാമെങ്കില്‍)ഒരു ശതമാനം പോലും വരാത്ത ആര്‍ എസ് എസുകാര്‍ എന്ന തീവ്രവാദികളുടെ ചെയ്തികള്‍ക്ക് 99 ശതമാനം വരുന്ന ഹൈന്ദവസമുദായം (ഹൈന്ദവ സമുദായം തന്നെ. കമ്യൂണിസ്റ്റുകാരും യുക്തിവാദികളും കൂട്ടാതെ അമ്പലത്തില്‍ പോകുന്ന, കുറിയും കുംകുമവും തൊടുന്ന ഹൈന്ദവര്‍)എങ്ങനെ ഉത്തരവാദികളല്ലയോ അത്രയും തന്നെ മുജാഹിദിനുകളെന്നോ അല്‍ ഖൊയിദയെന്നോ സിമിയെന്നോ ഒക്കെ പേരുള്ള നാണമില്ലാത്തവന്മാരുടെ ചെയ്തികള്‍ക്ക് ഇസ്ലാം സമുദാവവും ഉത്തരവാദികളല്ല.

ഇത് ഭാരതത്തിന്റെ അമേരിയ്ക്കയുമായുള്ള ബന്ധത്തിന്റെ മറുപടിയുമല്ല. അത് നിലനില്‍ക്കുന്നയിടത്തോളം കാലം ഇത്തരം ബോംബുകള്‍ പൊട്ടും അശാന്തി നിലനില്‍ക്കും എങ്കില്‍ മി. ചേലനാട്ട്, എന്തുകൊണ്ടാണ് പ്രഖ്യാപിത അമേരിയ്ക്കന്‍ ശത്രുവായ ചിനയില്‍ ഇസ്ലാമിക തീവ്രവാദം പിടിമുറുക്കിയിരിയ്ക്കുന്നത്?

അമേരിയ്ക്കയുടെ ഏതാണ്ട് ഏഴു ശതമാനം വരുന്ന സമ്പത്ത് കയ്യിലാക്കിയിരിയ്ക്കുന്ന സൌദിയിലേയും താങ്കള്‍ ജോലിചെയ്യുന്ന അറേബ്യന്‍ ഐക്യനാടുകളിലേയും സമ്പന്ന അറബിമാരുടെ മടയില്‍ എന്തുകൊണ്ട് ഒരു പടക്കം പോലും പൊട്ടുന്നില്ല.? എങ്കില്‍, “ലോകത്തിലെ ഏറ്റവും വലിയ ക്രിമിനല്‍ രാജ്യമായ അമേരിക്കയുമായി ഇന്ത്യക്കുള്ള ഇന്നത്തെ അനാശാസ്യബന്ധങ്ങള്‍ നിലനില്‍ക്കുന്നിടത്തോളം കാലം ഇനിയും ഇന്ത്യന്‍ നഗരങ്ങളില്‍ ബോംബുകള്‍ പൊട്ടുകയും, നിരപരാധികളായ മനുഷ്യജീവനുകള്‍ തെരുവില്‍ ചത്തുവീഴുകയും ചെയ്യും“ എങ്കില്‍, ഇത് ആദ്യം ദുബായിലും സൌദി അറേബ്യയിലും പൊട്ടണം.

രാജീവ് ചേലനാട് ഒരു കാര്യം മനസ്സിലാക്കണം ഉപരിതലത്തിലെങ്കിലും ജനാധിപത്യമെന്നും മനുഷ്യാവകാശമെന്നും പറയാന്‍ ഒരിത്തിരി വെളിവുള്ള സ്ഥലമാണ് അമേരിയ്ക്ക. ഭരണകൂടത്തെ തിരഞ്ഞെടുക്കുന്നതില്‍ മാത്രമല്ല ജനാധിപത്യം (ഡെമോക്രസി) നിലനില്‍ക്കുന്നത്. അത് സകലസ്വാതന്ത്ര്യങ്ങളുടേയും ഒരു തുലനാവസ്ഥയാണ്.ലോകമിന്നുവരെ കണ്ടിട്ടുള്ളതിലേറ്റവും മികച്ച ഭരണകൂടവ്യവസ്ഥയായ പാര്‍ലമെന്ററി ജനാധിപത്യം അവിടെ നിലനില്‍ക്കുന്നു. പരിമിതമായ തോതിലെങ്കിലും- പ്രൊപ്പഗാണ്ടയുടെ നടുവിലും-.എതിര്‍ വാദങ്ങളുന്നയിയ്ക്കുന്നവര്‍ കൂട്ടത്തോടെ ജയിലിലാക്കപ്പെടുന്നില്ല. നോം ചോംസ്കിയും, മൈക്കിള്‍ മൂറും, ബാരക് ഒബാമയും(അങ്ങേരേയും ഇരിയ്ക്കട്ടേ എന്ന് വച്ച് പറഞ്ഞതാണ്) ഇന്നും അവിടെത്തന്നെ ജീവിച്ചിരിയ്ക്കുന്നു.ഇതൊന്നും ഞാന്‍ നേരിട്ട് കണ്ടിട്ടില്ലെങ്കിലും.അവിടെയുള്ള ഒത്തിരിപേര്‍ ഈ ബ്ലോഗ് വായിയ്ക്കുന്നുണ്ടാകും ആരെങ്കിലും മറുപടി പറയട്ടേ.

സ്റ്റാലിന്റേയും (കമ്യൂണിസത്തിന്റെ അചാര്യന്മാര്‍ തന്നെയാണ് മി. ചേലനാട്ട് പ്ലഹനോവും ട്രോട്സ്കിയും. പേജുകളില്‍ നിന്നുവരെ അവര്‍ മാഞ്ഞുപോയി), മാവോയുടേയും, കാസ്റ്റ്രോയുടേയും എതിരാളികളെവിടെ? ഇന്നും റഷ്യയിലും ചിനയിലും ഇരുമ്പുമറ എന്തിന്? ഇടതുപക്ഷം ശരിയെങ്കില്‍ പത്ത് നാല്‍പ്പത് കൊല്ലം (മുക്കാല്‍ തലമുറ) കമ്യൂണിസ്റ്റായി ജീവിച്ചിട്ടും ഏറ്റവും കൂടുതല്‍ എണ്ണം എക്സിക്യൂഷന്‍ നടക്കുന്നയിടമായി ചിന എങ്ങനെ തുടരുന്നു.?അവിടുന്ന് ഒറ്റ ബ്ലോഗും വരാത്തതെന്തേ? സുഡാനില്‍ അവരെന്തിന് മര്‍ദനോപകരണങ്ങള്‍ വിതരണം ചെയ്യുന്നു? ആ ചിനയുടെ പ്രതിനിധികള്‍ ഭാരതത്തിലെ ഇപ്പോള്‍ ആണവ - അമേരിയ്ക്കന്‍ കരാര്‍ കാരണം ബന്ധം വിടുതല്‍ ചെയ്ത സീ പീ യെം നേതാക്കളുമായി ഇക്കാര്യം ചര്‍ച്ച ചെയ്യാന്‍ വന്ന ചിത്രം അവരുടെ വെബ്സൈറ്റില്‍ പരസ്യമായി പ്രദര്‍ശിപ്പിച്ചിട്ടുണ്ട്. അതേ സമയം അമേരിയ്ക്കന്‍ പ്രതിനിധികള്‍ ബീ ജേ പീ നേതാക്കളുമായി ചര്‍ച്ച നടത്തിയെന്ന് കേട്ടപ്പോള്‍ അവരെയൊക്കെ അമേരിയ്ക്കന്‍ ചാരരായി സീ പീ യെം കാര്‍ മുദ്ര കുത്തിയില്ലേ. അതുകൊണ്ട് അമേരിയ്ക്ക ബന്ധത്തിന്റെ കാര്യം പറയണ്ടാ.

ഈയിടെ ഇസ്രായേലില്‍ നിന്നു വിടുതല്‍ നല്‍കിയ കൊടും തീവ്രവാദികള്‍ക്ക് (രണ്ട് ജഡങ്ങള്‍ക്ക് പകരം) വന്‍ സ്വീകരണം നല്‍കിയ ലബനോനിലെ ആള്‍ക്കൂട്ടത്തിനിടയില്‍ നിന്ന് പല തീവ്രവാദ സംഘടനകളുടെയും കൊടികള്‍ക്കുമിടയില്‍ ആവേശോജ്വലമായി പാറിക്കളിച്ച അരിവാള്‍ചുറ്റിക നക്ഷത്രം പതിച്ച ചെങ്കൊടികണ്ടതിന്റെ സങ്കടം ഒരു ശരാശരി മലയാളി മുദ്രാവാക്യക്കാരനായ എനിയ്ക്ക് ഇനിയും മാറിയിട്ടില്ല.

അത് വിടുക..

ഒരു ജനാധിപത്യരാഷ്ട്രം മറ്റൊരു ജനാധിപത്യരാഷ്ട്രവുമായി പല ബന്ധങ്ങളും തുടര്‍ന്നെന്നിരിയ്ക്കും, ഉണ്ടാക്കിയെന്നിരിയ്ക്കും. അത് സര്‍ക്കാരുകള്‍ മാറുമ്പോ മാറിമറിയും.. ചില ഭ്രാന്തന്മാര്‍ക്ക് അത് ഇഷ്ടമല്ലെങ്കില്‍ നാം അങ്ങനെയുള്ള ഉഭയകക്ഷി ബന്ധങ്ങള്‍ തുടരണ്ടാ എന്നാണോ? അങ്ങനെയെങ്കില്‍ ഒരു രാഷ്ട്രത്തിന്റെ ഭാവി പാതാളത്തിലായിരിയ്ക്കും എന്നൂഹിയ്ക്കാനുള്ള ചുരുങ്ങിയ വിവരമെങ്കിലും പ്രകടിപ്പിയ്ക്കേണ്ടതായിരുന്നു താങ്കളേപ്പോലെയുള്ള ഒരു മാധ്യമ സിംഹം.

ദസ്തക്കിറൂം മറ്റും പറഞ്ഞപോലെ ഇത് ഏതെങ്കിലും എതിര്‍ഗ്രൂപ്പ് ചെയ്തിട്ട് ഇസ്ലാം ഭീകരവാദം എന്ന ലേബലില്‍ വിറ്റഴിയ്ക്കാന്‍ തുടങ്ങുന്നതാണോ എന്നെനിയ്ക്കറിയില്ല. രാമജന്മഭൂമി പ്രശ്നത്തിന്റെ രാഷ്ട്രീയവല്‍ക്കരണത്തിലൂടെ അങ്ങനെയൊന്ന് ചെയ്യാന്‍ ഉളുപ്പില്ല എന്ന് ധൈര്യസമേതം തെളിയിച്ചവരാണ് ഭാരതത്തിലെ ഹിന്ദു തീവ്രവാദികള്‍. ഗുജറാത്ത് അവര്‍ തിരികൊളുത്തിയ ഒരു ചെറിയ കലാപം മാത്രമായിരുന്നു. യാഥാര്‍ത്ഥ പ്രശ്നം രാമജന്മഭൂമിയിലും ഒത്തുള്ള ബോംബേ കലാപങ്ങളിലും തുടങ്ങുന്നു. അവിടെനിന്നാണ് നൂറ്റാണ്ടുകളായി ചെറിയ തോതില്‍ (വിഭജനത്തിന്റെ മുറിവുകള്‍ ഒഴിച്ചാല്‍) ഇണങ്ങിയും പിണങ്ങിയും കഴിഞ്ഞ ഇന്നാട്ടിലെ രണ്ട് സമുദായങ്ങളുടെയിടയില്‍ ഈ തലമുറയില്‍ ഒരു വലിയ വേര്‍തിരിവ് വന്നത്. അന്നാണ് എന്റെ ഉമ്മമാര്‍ തട്ടം മാറ്റി പര്‍ദയിടാന്‍ തുടങ്ങിയത്. എന്റെ അനുജന്മാര്‍ കുംകുമം ഒരു ഹൈന്ദവ ചിഹ്നമായി അണിയാന്‍ തുടങ്ങിയതും.

അവിടെ വെറുതേ കൈകഴുകിയങ്ങ് പോകാന്‍ കോണ്‍‌ഗ്രസ്സ് ഉള്‍പ്പെടെയുള്ള ഒരു സംഘടനയ്ക്കും കഴിയില്ല.ഇടയ്ക്കു മാറി നിന്ന് രക്തം കുടിച്ച ഇടതുപക്ഷം എന്നു പേരുള്ള ചെന്നായ്ക്കള്‍ക്കും കഴിയില്ല.

എന്താണവര്‍ ചെയ്തതെന്നോ ? അനുധാവനതയോടെ കൈകാര്യം ചെയ്യേണ്ട ഒരു കാര്യത്തെ പേടി ബോംബാക്കുന്നതില്‍ ഏറ്റവും വലിയ പങ്ക് വഹിച്ചത് ഇടതുപക്ഷമാണ്. ഹിന്ദുവിന്റെ വോട്ട് ബീജേപ്പിയും കോണ്‍‌ഗ്രസ്സും ചേര്‍ന്ന് വീതം വയ്ക്കുമ്പോള്‍ ഇന്നാട്ടിലെ സാധാരണ മുസ്ലീമിനെ പുലിവരുന്നേ പുലിവരുന്നേ എന്ന് ഭയപ്പെടുത്തി അവനെ മുഖ്യധാരയില്‍ നിന്നകറ്റി ന്യൂനപക്ഷ വോട്ട് മുഴുവന്‍ ബാങ്കിലാക്കാം എന്ന് കരുതിയ ഏതോ ഇടതുപക്ഷസൂത്രധാരന്‍ ഈ എരിതീയില്‍ ആവശ്യത്തിനു എണ്ണയൊഴിച്ചിട്ടുണ്ട്.

ഒഴിച്ചുകൊണ്ടിരിയ്ക്കുന്നു...ഗുജറാത്ത് കലാപക്കാലത്തെ എന്‍ രാമന്റെ ഫ്രണ്ട്ലൈന്‍ എന്ന മൂരാച്ചി ഇടതുപക്ഷക്കാരനെ മുതല്‍ ദേശാഭിമാനി ഉല്‍പ്പെടെയുള്ള മാധ്യമങ്ങള്‍ എല്ലാം അരിച്ചുപെറുക്കിനോക്കൂ‍. എന്‍ എസ് മാധവന്‍ നീലപ്പെന്‍സില്‍ നല്‍കിയ എഡിറ്ററുടെ വികാരം എന്നൊന്നും പറഞ്ഞ് ഒഴിയണ്ടാ, അതിനെ ഇന്നും മുസ്ലീം കൂട്ടക്കൊല എന്നു വിളിയ്ക്കുന്നത്, അതിനെ ഇന്നും സെന്‍സേഷണലൈസ് ചെയ്ത് അള്‍ക്കാരെ ചാക്കിടുന്നത് താങ്കളെപ്പോലെയുള്ള അഭിവാദനക്കാരാണ്.

ഏത് പാശ്ചാത്യ കൊളോണിയല്‍ മാടാമ്പിയാണ് മി. ചേലനാട്ട്, ഇസ്ലാമിനേയും മുസ്ലീമിനേയും വെറുപ്പോടെ കാണുന്നത്. ഞാന്‍ ഒരു പാശ്ചാത്യ ലോകത്തിന്റെ ഒരു കോണില്‍ ജീവിയ്ക്കുന്നവനാണ്.അറുപതു മില്യന്‍ ജനസംഖ്യയില്‍ ഒന്നര മില്യനോളം ആള്‍ക്കാര്‍ ഇവിടെ ഇസ്ലാമാണ്. സമാധാനത്തോടെ എല്ലാ സൌകര്യങ്ങളോടൂം കൂടെ മുസ്ലീങ്ങള്‍ ഇവിടെയും ജീവിയ്ക്കുന്നു. ഒരു മാധ്യമവും ആ സമൂഹത്തെ താറടിച്ച് കാണിയ്ക്കുന്നതായി തോന്നിയിട്ടില്ല.അവര്‍ അങ്ങനെ പറയുന്നുമില്ല.അമേരിയ്ക്കയില്‍ വേള്‍ഡ് ട്രേഡ് സെന്റര്‍ ആക്രമണത്തിനു ശേഷം ചില സംഭവങ്ങള്‍ ഉണ്ടായിട്ടുണ്ട് എന്നത് നേരുതന്നെ.

സെര്‍ബിയയില്‍ മുസ്ലീം കൂട്ടക്കൊല നടത്തിയയാളെ അന്താരാഷ്ട്രകോടതിയ്ക്ക് കൈമാറിയത് ഇവിടത്തെ മാധ്യമങ്ങള്‍ മുഴുവന്‍ സമയം ആഘോഷിയ്ക്കുന്നത് കാണുമ്പോള്‍ അത് ഡെമോക്രസിയുടെ ഒരു വലിയ വിജയമായി പറയുമ്പോള്‍ ഏത് മാധ്യമത്തെപ്പറ്റിയാണ്/ പാശ്ചാത്യ കൊളോനിയലിനെപ്പറ്റിയാണ്? താങ്കള്‍ പറയുന്നത്.

അധിനിവേശം മനുഷ്യചരിത്രത്തില്‍ ഒരു പുതിയ കഥയല്ല. അമേരിയ്ക്ക എണ്ണയ്ക്കുവേണ്ടി ഇറാക്കിനെ (ശരിയ്ക്കുപറഞ്ഞാല്‍ മിഡില്‍ ഈസ്റ്റിനെ) ആക്രമിച്ചു. അത് ചെയ്തുകൊണ്ടിരിയ്ക്കുന്നു. അത് ഇസ്ലാമിനു നേരേ കൃസ്ത്യാനി നടത്തുന്ന ആക്രമണമായി-കുരിശുയുദ്ധമായി- ലോകത്തിനു മുന്നില്‍ പെരുപ്പിച്ച് കാണിയ്ക്കുന്നത് ഇടതുപക്ഷക്കാരേയുള്ളൂ. എണ്ണയ്ക്ക് വേണ്ടിയാണത് ചെയ്യുന്നതെന്ന് ഏത് മണ്ടനുമറിയാം.ഇവിടെ അതുപോലെ എന്തെങ്കിലും സമ്പത്ത് കണ്ടാല്‍ നാളെ അത് ഇന്‍ഡ്യയിലാകും..ആസാം ഒരു എണ്ണപ്പാടത്തിന്റെ മുകളില്‍ പൊന്തിക്കിടക്കുന്നു എന്ന് എന്റെയൊരു ശാസ്ത്രജ്ഞ സുഹൃത്ത് ക്ലാസിഫൈഡ് വിവരമായി പറഞ്ഞു. സത്യമെങ്കില്‍(കള്ളിന്‍ പുറത്ത് അല്ല എങ്കില്‍???) നോര്‍ത്തീസ്റ്റില്‍ ചൈനയ്ക്കും ഭീകരവാദികള്‍ക്കും മുഖ്യധാരാ ഭാരതത്തിനും എല്ലാം ഉള്ള താല്പര്യവും അതുതന്നെ. .നാളെ അത് വെള്ളത്തിനു വേണ്ടിയാകും. അപ്പോള്‍ കേരളത്തിനും ഗതിയുണ്ടാവില്ല. തമിള്‍നാട് ചുരുങ്ങിയ രീതിയില്‍ അതുതന്നെ ചെയ്യുന്നു. മനുഷ്യന്റെ ഗ്രൂപ്പുകളുടെ സ്വഭാവം അതാണ്. ഈച്ചകളുടെ തമ്പുരാന്റെ മന:ശാസ്ത്ര വിശകലനം ഞാനായി എഴുതേണ്ടല്ലോ?

ഹൈദ്രാബാദിലും ജയ്പൂറിലും അഹമ്മദാബാദിലും സ്ഫോടനങ്ങള്‍ നടക്കുമ്പോള്‍ ഓരോ സ്ഫോടനത്തിനു ശേഷവും, സ്ഫോടനങ്ങള്‍ ഒഴിവാക്കാനാവില്ല, ഗുജറാത്തിനു വാണിങ്ങ് കൊടുത്തു, നേരത്തേ പറഞ്ഞു എന്നൊക്കെയുള്ള കൈകഴുകല്‍ തെമ്മാടിത്തരം വിളിച്ചുപറഞ്ഞ ശിവരാജ് പട്ടീലിന് ഇതിന്റെ ഉത്തരവാദിത്തത്തില്‍ നിന്ന് ഒഴിയാനാകില്ല.ശരിതന്നെ.

അതിനെയൊക്കെ മതത്തിന്റേയും ജാതിയുടേയും ഭാഷയുടെയും ഒക്കെ പേരുപറഞ്ഞ് കൂട്ടിയടിപ്പിക്കുന്നവനെയാണ് ഏറ്റവും പേടിയ്ക്കേണ്ടത്. അവനെയാണ് തുറന്ന്കാട്ടേണ്ടത്.

ഞാന്‍ ബ്രിട്ടണില്‍ ജോലിചെയ്യുന്നവനാണ്. നാളേ എന്റെ വീട്ടില്‍ ഒരു രാജ്യ സ്നേഹതീവ്രവാദി വന്ന് എന്റെ മാതാപിതാക്കളെ പേടിപ്പിച്ച ശേഷം അവന്‍ ബ്രിട്ടണില്‍ ജോലി ചെയ്യേണ്ടാ. അവര്‍ പണ്ട് നമ്മളെ ഭരിച്ചിരുന്നവരാണ്..പരോക്ഷമായി ഇന്നും ഭരിയ്ക്കുന്നു. തിരിച്ചുവന്നില്ലേല്‍ ഇനിയും നിങ്ങളേ ഉപദ്രവിയ്ക്കും എന്ന് പറഞ്ഞാല്‍ ഞാനെന്ത് ചെയ്യണം മി. ചേലനാട്ട്? തിരിച്ചുപോരണോ?പേടിയ്ക്കണോ. കരയണോ???

തീവ്രവാദികളേ ഒറ്റപ്പെടുത്തി അവര്‍ക്ക് അരുനില്‍ക്കുന്നവരെയും അവരേയും ജനമധ്യത്തില്‍ (ജന ആധിപത്യപരമായല്ല) കൊണ്ട് വന്ന് നിയമം അനുശാസിയ്ക്കുന്ന നടപടികള്‍ (ശിക്ഷയല്ല. ശിക്ഷിച്ചിട്ട് ഒരു കുറ്റവും കുറഞ്ഞതായി കണ്ടിട്ടില്ല ) എടുക്കാതെ ഇതിനു പരിഹാരമില്ല.അതിനു ജനങ്ങള്‍ വളരണം നന്മയുള്ളവരാകണം. സിവിലൈസ്ഡ് ആകണം. അപ്പോള്‍ അവരുടെയിടയില്‍ നിന്ന് സിവിലൈസ്ഡ് ആയ ഭരണകര്‍ത്താക്കള്‍ എല്ലാ പാര്‍ട്ടിയിലും നിന്ന് ഉണ്ടായിവരും.പക വളര്‍ത്തുന്നതല്ല- പകയില്ലാത്ത- സ്നേഹത്തിന്റെ വിദ്യാഭ്യാസമാണ് സിവിലൈസേഷന്റെ ആദ്യപടി. അതിലൂടെമാത്രമേ ഇതിനു പരിഹാരമുള്ളൂ. പുറത്തുനിന്ന് എത്ര കെട്ടിവയ്ക്കാന്‍ ശ്രമിച്ചാലും പുഴുത്ത വൃണം മുഴുവനായി കരിയാന്‍, അത് സെപ്റ്റിസീമിയ ആകാതിരിയ്ക്കാന്‍ മരുന്ന് അകത്തൂടെ ചെല്ലണം. ആരെയൊക്കെയോ കൊല്ലാന്‍ പറയുന്ന താങ്കള്‍ക്ക് മനസ്സിലാവുമെങ്കില്‍...എന്റെ ഈ വിഷമം ദേഷ്യമായി എടുക്കാതിരിയ്ക്കുക.

സ്നേഹം.

പട്ടാമ്പിയിലെ നുണ

2008-06-21T14:47:00.000-07:00

കാലിനടിയില് കല്ലാണി തറച്ചിട്ട് കനലിലൂടെ ഓടിക്കോടാ എന്ന് പറഞ്ഞപോലിരുന്ന ഒരവസ്ഥയിലാണ് എങ്കിപ്പിന്നെ പട്ടാമ്പിയിലോട്ട് വിട്ടേക്കാം എന്നു വച്ചത്. നേരിയ തണുവോടെ ആ കൊച്ചുവെളുപ്പാങ്കാലത്ത് റേയില്‍വേ സ്റ്റേഷനിലിറങ്ങിയപ്പോ വെല്ക്കം ടൂറിസ്റ്റ് ഹോം കണ്ടുകിട്ടുന്നതിനുള്ള ആധിയാരുന്നു.

മറ്റൊന്നുമല്ല..ദൂരെയെങ്ങും മുറിയെടുക്കാന്‍ വയ്യ. അവിടെവിടേലും ചായണം. നല്ല ക്ഷീണം.

പലപല ഉദ്ദേശങ്ങളുണ്ടാരുന്നു.

വിഷ്ണുമാഷിന്റെ പുസ്തക പ്രകാശനം ഒരു സംഭവമാക്കണം.ഏത് സമ്മേളനത്തിനു പോയാലുമെന്ന പോലെ കസേര പെറുക്കിയിടുന്നത് മുതല് തിരികെ വയ്ക്കുന്നത് വരെ കയ്യ് മെയ് മറന്ന് കൂടേക്കൂടണം.

ഹരിയണ്ണനെ കാണണം..കെട്ടിപ്പിടിക്കണം.. രണ്ട് ലാര്ജിനു കൂട്ടുവാങ്ങണം...സമാന്തര പ്രസിദ്ധീകരണ സം‌വിധാനങ്ങളേക്കുറിച്ച് ജാടയടിയ്ക്കണം.കവിതയിലെ പുത്തന് പ്രവണതകളേപ്പറ്റി താല്‍പ്പര്യമില്ലെങ്കിലും വെറ്തേ ചോദിച്ച് തലകുലുക്കണം...അവസാനം ജാടയെല്ലാമഴിച്ച് പിമ്പിരിയായി വാളുവെക്കണം.അവസാനം നേരത്തേ വാങ്ങിവച്ച കാലിഗ്രാഫി സെറ്റ് കൊടുത്തിട്ട് നിങ്ങളുടെ മീഡിയം അറിയാഞ്ഞാണ് അവസാനം കാലിഗ്രാഫി സെറ്റ് വാങ്ങിയെന്നും മറ്റും വമ്പ് പറയണം.

തുളസിയുടെ കുഞ്ഞുങ്ങളുടേതു പോലുള്ള ചിരി അയാളുടെ ചിത്രങ്ങളിലുമുണ്ട് എന്ന് നേരിട്ട് പറയണം.

പച്ചാളം ഞാന് വിചാരിച്ചിരുന്ന പോലെ ഒരു കോലനല്ലന്ന് അത്ഭുതപ്പെടണം.അങ്ങേരുടെ ചിത്രങ്ങളും എഴുത്തും സര്‌വോപരി കമന്റുകളും ഇഷ്ടമായതിന് പ്രതിഫലമായി രണ്ട് ചായ സ്പോണ്സര്‍ ചെയ്യണം.
വെള്ളെഴുത്തല്ല നീ നല്ലെഴുത്താണെന്ന് പൊന്നപ്പനല്ലടാ തങ്കപ്പന് എന്ന മട്ടില് പറയണം.

പേരു പേരക്കയുടെ ഡിസൈനിംഗ് വര അറിവ് കഴിവുകളില് അത്ഭുതപ്പെടണം.

കുഴൂര് വില്സണ് വന്നാല് മസിലു വിട് കവീ..വാ വന്ന് രണ്ട് വീശ് എന്ന് കളിയാക്കണം.

ദേവദാസ് ഏലിയാസ് ലോനപ്പനെ കൂട്ടുകൂട്ടണം. അറിയാവുന്ന ഓഷോ കെട്ടഴിയ്ക്കണം.
കൈഷാകുവായവന്റെ അനുഭവം പറയണം.

സങ്കുചിതനെന്ന മൂന്നമിടത്തിന്റെ തൊഴിലാളിയെ കണ്ടപ്പൊ ലാത്സലാം പറയണം.

അനില്‍കുമാറിന്റെ മാലയില്‍ തൊട്ടുനോക്കണം.

അപ്പൂനേം അമ്മൂനേം തോര്‍ത്ത് വച്ച് മൊയലിനെയുണ്ടാക്കുന്ന വിദ്യ പഠിപ്പിയ്ക്കണം. ഒരു കൈമുന്നോട്ടും മറ്റേ കൈ പിന്നോട്ടും കറക്കി അവരെ അത്ഭുതപ്പെടുത്തണം. വയറ്റത്ത് തടവി തലയിലടിയ്ക്കുന്ന വിദ്യ പരിശീലിപ്പിച്ച് അബദ്ധങ്ങളില്‍ പൊട്ടിച്ചിരിയ്ക്കണം.

വിഷ്ണുമാഷിന്റെ കുറേ പുസ്തകം വാങ്ങണം. എല്ലാര്‍ക്കും കൊടുക്കണം.അങ്ങേരെ ബ്ലോഗ് കവി എന്ന് മാര്‍ജിനലൈസ് ചെയ്യുന്നവനെയെല്ലാം കള്ളുമ്പുറത്ത് ചീത്ത പറയണം..

സര്‍വോപരി എന്റെ മസിലു വിടണം.....

ഒന്നും നടന്നില്ല........

നടന്നത്..

തുളസി ചിത്രമെടുക്കുന്നത് ഒരു സിനിമ പോലെ നോക്കിയിരുന്നു.

ഹരിയണ്ണനുമായി കള്ള് കുടിയ്ക്കാതെ വര്‍ത്തമാനം പറഞ്ഞു.
ദേവദാസിനും പച്ചാളത്തിനും കൈകൊടുത്തു.

സ്റ്റീവന്‍ മക്കറിയുടെ കവിതകള്‍ കണ്ടു.

പി. രാമനോട് മാഷിന്റെ പേരെന്താ ന്ന് ചോദിച്ചു. ഇത് അറിയില്ലേ പീ രാമന്‍ എന്ന് വിഷ്ണുമാഷ് പരിചയപ്പെടുത്തിയപ്പോ മാഷിന്റെ ജോലി എന്താ എന്ന് ചോദിച്ചു.

ഇദ്ദേഹം ആത്മീയതയില്‍ താല്‍പ്പര്യമുള്ളയാളേന്ന് പറഞ്ഞ് കാവിയും ജൂബയും രണ്ട് മാലയുമൊക്കെയിട്ട ഒരു ചെറുപ്പക്കാരനെ വിഷ്ണുമാഷ് പരിചയപ്പെടുത്തിയപ്പോ ഞാന്‍ ആത്മീയതയുമായി യാതൊരു താല്‍പ്പര്യവുമില്ലാത്തയാളെന്ന് ചൊറിഞ്ഞ് ചിരിച്ച് കൈകൊടുത്തു..

വിഷ്ണുമാഷിന്റെ കവിതകള്‍ ഒരു പുസ്തകമായി കണ്ടമാത്രയില്‍ തന്നെ അത് ഇന്നലെയുടെ സാങ്കേതികത ..സ്ക്രീന്‍ വായന മതി എന്ന എന്റെ തിയറി ശൂറ്റിപ്പോയി.

പി. പി. രാമചന്ദ്രന്‍ മാഷിന്റെ ചെറുപ്രസംഗം കേട്ട് ബോറടിച്ചു. അരസികനായ എന്റെ പിഴയാവും എന്ന് മനസാ പരിതപിച്ചു ചടങ്ങിനിടയില്‍ വേറൊരിടത്തേയ്ക്ക് പോയി രാത്രി തിരികെ വന്നപ്പോ ആരുമില്ലായിരുന്നു..എല്ലാരും പോയി. ഇടയ്ക്കെപ്പോഴോ തളര്‍ന്ന് തൂങ്ങി കയറിവന്ന ഹരിയണ്ണനോട് ഉറക്കപ്പിച്ചില്‍ എന്തൊക്കെയോ പറഞ്ഞു.ചേച്ചിയുമായി സംസാരിച്ചു.

ഒരു മുഴുവന്‍ കോഴി തിന്നാന്‍ പൊന്നപ്പനെ സഹായിച്ചു.

രാത്രിയില്‍ വെറുമൊരു ടൂറിസ്റ്റ് ഹോമായ അവിടെ മേശപ്പുറത്ത് പൊന്നപ്പന്‍ എനിയ്ക്ക് സമ്മാനിച്ച ഒരു കുളം+പ്രാന്തത്തിയിരുന്ന് ചിരിയ്ക്കുന്നു. വെള്ളമടിയ്ക്കാന്‍ മാത്രമെന്ന് വിചാരിച്ച് എടുത്ത ആ മുറിയിലിരുന്ന് ഒരു തുള്ളി തൊടാതെ ഞാനാ ലഹരിയെടുത്തു.

“എത്ര ഏറു കൊണ്ടാലും പഠിയ്ക്കില്ല
എല്ലാ വര്‍ഷവും കായ്ക്കും
മിണ്ടാതെ നിന്ന് ഏറുകൊള്ളും”

പൊന്നപ്പനെടുത്ത ചിത്രങ്ങളുമായി, മിണ്ടാതെ ഒരു കള്ളനെപ്പോലെ മുങ്ങിയിട്ട് നാടുവിട്ടിവിടെ വന്നു. ഇന്നിത് കണ്ടപ്പോള്‍ മാത്രമാണ് ഈ ചിത്രങ്ങളുടെ കാര്യമോര്‍ത്തത്.

ഇതെഴുതുമ്പോള്‍ ഹരിയണ്ണന്‍ പറഞ്ഞ , ആ കൂടുതല്‍ മാരകമായ ആഭിചാരക്രീയ മുന്നിലിരിയ്ക്കുന്നു. എത്രതവണ അതിലൂടെപ്പോയെന്നറിയില്ല. എത്ര തവണ പടം നോക്കിയിരുന്നതെന്നറിയില്ല.

കവിതവായിച്ച് കമന്റ്ബോക്സിലേക്കോടണ്ട കാര്യമില്ല.. ഓരോ വരിയും വായിച്ച് ജനലിലൂടെ നോക്കിയിരുന്ന് ദിവാസ്വപ്നം കാണാം. വാക്കുകളുടെ ചിത്രം വരയ്ക്കാം.

ഓരോ വാക്കിലും വെളുക്കെ ചിരിയ്ക്കുന്ന ആ കഷണ്ടി താടിക്കാരനെ കാണാം..അതേക്കാള്‍ ഞാന്‍ കണ്ടത് “ചെറുപ്പത്തിലേ ഞാന്‍ ധാരാളം കുപ്പിപ്പാലു കുടിയ്ക്കുമായിരുന്നു. അതോണ്ട് പല്ലെല്ലാം പോയി “ എന്ന് പറഞ്ഞ് പാലുപോലെ ചിരിച്ച അപ്പുവിനെയായിരുന്നു.

കോലുപോലെയുള്ള പാത്തുമ്മച്ചേച്ചിയെ, നാണക്കാരിയായ അമ്മുവിനെ, ഞങ്ങള്‍ കൊല്ലംകാരായ ഹരിയണ്ണനെ, ദേവദാസിനെ, തുളസിയെ, ആള്‍ക്കൂട്ടത്തിനിടയില്‍ നിവര്‍ന്ന് നിന്ന വെള്ളെഴുത്തിനെ,ഉമ്പാച്ചിമാരെ,സിഗരറ്റ് പോലത്തെ ദസ്തക്കീറിനെ, പേരറിയാത്ത ചിരികളെ...........കാമറയുമായി ചരിഞ്ഞ പടങ്ങളേടുത്ത് കൂട്ടിയ പൊന്നപ്പനെ...പങ്കുവച്ച സിഗററ്റിനെ..പിറ്റേന്ന് പത്ത് കൊല്ലത്തിനു ശേഷം കണ്ട കൂട്ടുകാരിയെ, ആദ്യമായി കണ്ട അവളുടെ ഭര്‍ത്താവിനെ , കുട്ടിയെ..പട്ടാമ്പിയെ..പുഴയെ..കാറ്റിനെ കാറിനെ.......

വെല്‍ക്കം ടൂറിസ്റ്റ് ഹോമില്‍ വച്ച് പരസ്പരം പലരും അത്ഭുതത്തോടെ ചോദിച്ച ചോദ്യമുണ്ട്
“നിങ്ങള്‍ ആദ്യമായാണോ കാണുന്നത്“?

...എങ്കിലും,
പോയവരെക്കുറിച്ചോ
വന്നവരെക്കുറിച്ചോ
ഒരൊര്‍മ്മയുമില്ലെന്ന്
എല്ലാ വഴികളും
നുണപറയും.

ഇതേപ്പറ്റി മര്യാദയ്ക്ക് എഴുതിയിരിയ്ക്കുന്നത് ഇവിടേയും ഇവിടെയും വായിയ്ക്കാം.

പുസ്തകം ഇവിടെ നിന്ന് വാങ്ങാം.

ഒരു വഴിയ്ക്ക് പോകുന്നതല്ലേ

2008-05-03T04:14:00.000-07:00

(ഒരു ബ്ലോഗിലിട്ട കമന്റാണ് .അതെന്തായാലും ഇവിടെയും കിടക്കട്ടേ എന്നൊരു ചിന്ത.ചുമ്മാ ഓരോരോ ചിന്തകള്‍ തന്നെ കാര്യം. അക്ഷരത്തെറ്റ് ഒരു ഹൃസ്വദൃഷ്ടി കണ്ടത് പോലൊക്കെ തിരുത്തിയിരിയ്ക്കുന്നു.:) തിരുത്തി വന്ന വഴിയ്ക്ക് കൂടുതല്‍ തോന്നിയത് ചേര്‍ക്കുകയും ചെയ്തു. പടങ്ങളൊക്കെ അനിയച്ചാരുടെ വകയാണ്. എന്തായാലും ഒരു വഴിയ്ക്ക് പോകുന്നതല്ലേ)

ഇതിനിടയില്‍ ഇനിയെന്തിനു ഞാനും എന്നെപ്പോഴും കരുതും. എന്തു ചെയ്യാം..മനസ്സിനു നിയന്ത്രണം വരണമെങ്കില്‍ അതാഗ്രഹിയ്ക്കണാമല്ലോ?

ആത്മാന്വേഷീ, അങ്ങ് എന്തിനെയാണ് അന്വേഷിയ്ക്കുന്നത്? ഇവിടെ പല പോസ്റ്റുകളിലായി അങ്ങ് അന്വേഷിച്ചിരിയ്ക്കുന്നതിനും പറഞ്ഞിരിയ്ക്കുന്നതിനുമൊക്കെ പല കാലങ്ങളിലാ‍യി മനുഷ്യവംശത്തിലെ പലരും വിശദീകരണം നല്‍കിയിട്ടുണ്ട്. വസ്തുനിഷ്ഠമായിത്തന്നെ. യുക്തിയ്ക്ക് ചേര്‍ന്ന രീതിയില്‍ തന്നെ.

താങ്കള്‍ പറയുന്ന വൈദ്യുത കാന്തിക തരംഗ സ്പെക്ട്രത്തിലെ എല്ലാ ആവൃത്തികളിലും ഉണ്ടാകുന്ന ഊര്‍ജ്ജവികിരണങ്ങള്‍ ജീവജാലങ്ങളിലുണ്ടാക്കുന്ന വ്യതിയാനങ്ങളെപ്പറ്റി കൂലങ്കഷമായി ശാസ്ത്രലോകം പഠിച്ചിട്ടുണ്ട്. കാന്തികതയും ശബ്ദവും ശരീരത്തിലുണ്ടാക്കുന്ന വ്യതിയാനങ്ങളെപ്പറ്റിയും തര്‍ക്കമറ്റ രീതിയില്‍ പഠിച്ചിരിയ്ക്കുന്നു.അതിലൊന്നും താങ്കള്‍ ഈ പറഞ്ഞിരിയ്ക്കുന്ന മാതിരി വ്യതിയാനങ്ങള്‍ ഉണ്ടാക്കുന്നതായി പറഞ്ഞു കാണുന്നില്ല.

വൈദ്യുതകാന്തിക തരംഗങ്ങളൊ, മറ്റേതെങ്കിലും തരത്തിലുള്ള ഊര്‍ജ്ജ വികിരണമോ ആണ് അമ്പലങ്ങളില്‍ നിന്നും വിഗ്രഹങ്ങളില്‍ നിന്നും ഉണ്ടാകുന്നതെങ്കില്‍ എന്തുകൊണ്ട് അതേപോലെയുള്ള വികിരണങ്ങള്‍ ഉണ്ടാക്കാന്‍ കഴിവുള്ള ട്രാന്‍സ് ഡ്യൂസറുകളെ വച്ച് കൂടാ? ഇനി ഇനിയെന്തെങ്കിലും വികിരണങ്ങളോ ഊര്‍ജ്ജമോ ഒക്കെ ഉണ്ടാവുന്നുവെന്നിരിയ്ക്കട്ടേ, അത് കൊണ്ടെന്താണ് ശരാശരി മനുഷ്യനുള്ള ഉപയോഗം? നമ്മുടെ നാട്ടില്‍..- അതും കേരളത്തിലെ നമ്പൂതിരിമാരുടേ ആരാധനാ മാര്‍ഗ്ഗത്തെപ്പറ്റി മാത്രമാണ് താങ്കള്‍ ഇവിടെ പറഞ്ഞിരിയ്യ്ക്കുന്നത്. ഹിമാലയത്തില്‍ അമരനാഥത്തും ബദരീനാഥത്തും ഒക്കെ പല കട്ടിയുള്ള സ്വെറ്ററുകളണിഞ്ഞാണ് ആള്‍ക്കാര്‍ അമ്പലത്തില്‍ പോകുന്നത്.(അവിടെ നമ്പൂതിരിയാണ് പൂജ എന്നു വന്നാലും ചടങ്ങുകളൊക്കെ വേറേ തന്നെ.).

ഹരിദ്വാരത്തും റിഷികേശത്തും തന്നെ പൂജാരിമാരും പൂജ കൈകൊള്ളുന്നവരും ഒക്കെ പലവിധ അടുക്കുകളുള്ള ഉടുപ്പുകളോ സ്വെറ്റര്‍, മങ്കി ക്യാപ്പ് ഒക്കെ ഉപയോഗിച്ചാണ് അമ്പലത്തിലിരിയ്ക്കുന്നത്. അവര്‍ക്കെന്ത് ഗുണം ഉണ്ടാകുന്നു? താങ്കളുടെ അറിവിന്റെ വെളിച്ചത്തിലാണെങ്കില്‍ അവരൊക്കെ അവിടെയിരിയ്ക്കുന്നതിനു യാ‍തൊരു ഉപയോഗവുമില്ലല്ലോ? നമ്മുടെ നാട്ടില്‍ ഉള്ളതിനേക്കാള്‍ എന്തെങ്കിലും കുറവ് അവരുടെ ജീവിതത്തിലോ ആത്മീയ യാത്രയിലോ ഉണ്ടാകുന്നുണ്ടോ?

ലോകത്തില്‍ ഭാരതം എന്ന ചെറിയ ദേശം വിട്ടാല്‍ യൂറോപ്പിലും, അമേരിയ്ക്ക , ആസ്ട്രേലിയയിലും, ഒക്കെയുള്ളവര്‍ ഇത്തരം ആരാധനാ രീതികളൊന്നും പിന്തുടരുന്നില്ല എന്നു കാണാം. അത്തരം ആരാധന ചെയ്യുന്നവരേയും ചെയ്യാത്തവരേയും പൊതുവേ എടുത്ത് നോക്കിയാല്‍ ഇവിടെയുള്ളവരൊക്കെ വളരെ കൂടുതല്‍ കാലം ജീവിയ്ക്കുന്നതായാണ് കാണുന്നത്. ശരാശരി ആയുര്‍ദൈര്‍ഖ്യവും ജീവിത നിലവാരവും വളരെ കൂടുതലാണ് യൂറോപ്പിലും മറ്റും. താങ്കള്‍ പറഞ്ഞ എല്ലാ ആരാധനാ വിധികളും ചെയ്തിട്ടും നമ്മുടെ നാട്ടുകാര്‍ വളരെ വിഷമിച്ചും കഷ്ടപ്പെട്ടും ദൈനം ദിന ജീവിതം തള്ളിനീക്കുമ്പോള്‍ അതൊന്നും ചെയ്യാഞ്ഞിട്ടും ഇവരൊക്കെ സുഖമായി ജീവിയ്ക്കുന്നു.

അത് ഭൌതികമായ സാമ്പത്തിക കാര്യം. ഇനി മനസ്സിന്റെ സന്തോഷത്തിന്റെ കാര്യമാണെങ്കില്‍ നമ്മുടെ നാട്ടിലുള്ളതിനേക്കാള്‍ വളരെ സന്തോഷമായിട്ടാണ് ഇവിടങ്ങളിലൊക്കെ ജനങ്ങള്‍ ജീവിയ്ക്കുന്നത്. അക്രമവും ഒട്ടു വളരെ കുറവ്. ഇനി ആത്മീയ ഉണര്‍വാണ് വിഗ്രഹാരാധന കൊണ്ടുണ്ടാകുന്നതെങ്കില്‍ പാശ്ചാത്യലോകത്തും ഒട്ട് വളരെ വലിയ ആത്മീയ ആചാര്യന്മാരുണ്ടായിട്ടുണ്ട്. അവരൊന്നും വിഗ്രഹാരാധന ചെയ്യുന്നവരല്ല. ഹൈന്ദവരെപ്പോലെതന്നെ ഉയര്‍ന്ന ആത്മീയ ബോധമുള്ള ഇസ്ലാമുകള്‍ (ഇനി സന്യാസിമാരാണെങ്കില്‍ സൂഫികള്‍) ഒന്നും വിഗ്രഹത്തില്‍ വിശ്വസിയ്ക്കുന്നവരല്ല. ആരും കേരളത്തിലെ അമ്പലങ്ങളില്‍ ആരാധിച്ചിട്ടുള്ളവരല്ല.കേരള തന്ത്രം ഉപയോഗിച്ചുള്ള പൂജ ചെയ്തവരോ കൈക്കൊണ്ടിട്ടുള്ളവരോ അല്ല.

ബുദ്ധമതക്കാര്‍ വലിയൊരു വിഭാഗം ഇത്തരം ആരാധന ചെയ്യുന്നവരല്ല. ആരാധന ചെയ്യുന്നവരാണെങ്കില്‍ കൂടി പല രീതിയിലാണത് ചെയ്യുന്നത്.കേരള തന്ത്രം ആരും ഉപയോഗിയ്ക്കുന്നില്ല. പിന്നെ എന്ത് ഉപയോഗമാണ് താങ്കള്‍ പറഞ്ഞ പോലെ തന്ത്രി പ്രാണശക്തി പകര്‍ന്ന് നല്‍കിയ വിഗ്രഹങ്ങള്‍ക്കുള്ളത്? താങ്കള്‍ തന്നെ പറഞ്ഞ പോലെ സഗുണോപാസനയാണ് വിഗ്രഹാരാധനയെങ്കില്‍ (അമ്പലത്തിലെ വിഗ്രഹാരാധനയും സഗുണോപാസന എന്ന രീതിയും തമ്മില്‍ അജഗജാന്ത‌രമുണ്ട്, ചുരുങ്ങിയ പക്ഷം സമുദ്ര, ജലാന്തരമെങ്കിലുമുണ്ട് :) എന്നാണെന്റെ പക്ഷം. അറിവ് വളരെ പരിമിതമെങ്കിലും) കേരള തന്ത്രത്തിനു യാതൊരു പ്രസക്തിയുമില്ല അവിടെ എന്നു വരുന്നു. അത് ക്രൂശിത രൂപമായാലും ക-അബയായാലും, ബുദ്ധപ്രതിമയായാലും, ശിവലിംഗമായാലും ഒന്നുമില്ല. അവനവന്റെ യുക്തിക്കനുസരിച്ച് എന്തുമാകാം എന്നു വരുന്നു.അപ്പോഴും തന്ത്രി പ്രാണശക്തി നല്‍കുന്നതിനും ഇലക്ട്രോ മാഗ്നറ്റിക് ഫീല്‍ഡിനും ഒന്നിനും പ്രക്തിയില്ലാതെ വരുന്നു. കാരണം ക്രൂശിത രൂപത്തിന് കമ്പിയും ആരൂഡവും നവ പാഷാണങ്ങളും ഒന്നുമില്ലല്ലോ?

നാം മേല്‍പ്പറഞ്ഞ ഉപയോഗവാദം അനുസരിച്ചാണെങ്കില്‍ അതെല്ലാം വ്യഥാവ്യായാമങ്ങളാണെന്നും കാണാം.മന്ത്ര ശക്തിയെപ്പറ്റിയും അതുതന്നെയേ പറയാനുള്ളൂ.ശരീരത്തിനോ മനസ്സിനോ സൌഖ്യമുണ്ടാക്കാനാണെങ്കില്‍ അതൊന്നുമറിയാത്ത എത്രയോ പേര്‍ ഭാരതത്തിലും പുറത്തുമായി ശരീര മനോ സുഖങ്ങളോടു കൂടി കാലാകാലം ജീവിയ്ക്കുന്നു.? ഒരുപാട് തൊണ്ണൂറ്- നൂറ് വയസാ‍യ അപ്പൂപ്പന്മാരെ ഞാന്‍ ഇവിടെ കണ്ടിരിയ്ക്കുന്നു. അവരൊന്നും മൃത്യുഞ്ജയ മന്ത്രമെന്നൊന്നും കേട്ടിട്ടു പോലുമില്ലാത്തവരാണ്.

താങ്കള്‍ ആത്മാന്വേഷി എന്നാണ് സ്വയം വിളിയ്ക്കുന്നത്. എന്തിനെയാണ് സത്യം പറഞ്ഞാല്‍ അങ്ങ് അന്വേഷിയ്ക്കുന്നത്? ശരീരത്തിലും മനസ്സിലും ഉള്ള എന്തിനെയെങ്കിലുമാണെങ്കില്‍ അങ്ങ് തീര്‍ച്ചയായും നിരാശപ്പെടെണ്ടിവരും. കാരണം ശരീരം (അതിന്റെ ഒരു ഉപോല്‍പ്പന്നമായ മനസ്സും )നശിച്ചു പോകുന്നതാണ് .യാതൊരു സംശയവുമില്ലാ.നൂറുശതമാനം എനിയ്ക്കുറപ്പുണ്ട്. ലോകത്ത് ജനിച്ച എല്ലാവരും മരിച്ചുപോയിട്ടുണ്ട് .കേട്ടുകേള്‍വിയാണെങ്കില്‍ യോഗവിദ്യ കൊണ്ട് അറുനൂറ് കൊല്ലമൊക്കെ ജീവിച്ചിരുന്നു എന്ന് ആള്‍ക്കാര്‍ വിശ്വസിയ്ക്കുന്ന യോഗിവര്യന്മാരുണ്ട്. അവരും അറുനൂറൊ ആയിരമോ ഒക്കെ കൊല്ലം കഴിഞ്ഞപ്പോള്‍ ആ ശരീരം ഉപേക്ഷിച്ചു എന്നാണ് കഥകളൊക്കെ പറയുന്നത്. ചൈനയില്‍ ചില തന്ത്രവിദ്യയൊക്കെ ചെയ്ത് സൂക്ഷിച്ചിരുന്ന ഏതോ കേടാകാത്ത ശവശരീരമൊക്കെ കിട്ടിയിട്ടുണ്ടെന്ന് ചില പുസ്തകങ്ങളില്‍ വായിച്ചിട്ടുണ്ട്. ആ ശവങ്ങളിലും യാതൊരു കേടുമില്ലാതെ അപ്പൊ മരിച്ച പോലെയിരിയ്ക്കുന്നു എന്ന് പറഞ്ഞിരിയ്ക്കുന്നതല്ലാതെ ജീവന്റെ എന്തെങ്കിലും അംശം ഉണ്ട് എന്ന് പറഞ്ഞിട്ടില്ല.

ജീവനില്ലേ? ഉണ്ട്. കോടാനുകോടിസൂക്ഷ്മാണുക്കള്‍ അതിനുള്ളിലല്ലേ ജീവിയ്ക്കുന്നത്? തീര്‍ച്ചയായും ജീവനുണ്ട്. (ചൈനയിലും റഷ്യയിലും ഹിറ്റ്ലറിന്റെ ജര്‍മ്മനിയിലും ഇത്തരം ഒക്കള്‍ട്ട് വിദ്യകളിലെ ഗവേഷണം നടക്കുന്നു എന്നാണ് അതിന്റെ പ്രചാരകര്‍ പണ്ടുമുതലേ പറഞ്ഞ് കൊണ്ടിരിയ്ക്കുന്നത്. കാരണമായി എനിയ്ക്ക് തോന്നുന്നത് അവിടങ്ങളിലെ മാധ്യമ സ്വാതന്ത്ര്യമില്ലായ്മയാണ്. അങ്ങനെ പറഞ്ഞാലും നിഷേധിയ്ക്കാന്‍ ഒരു സ്വതന്ത്ര മാധ്യമവും അവിടങ്ങളിലില്ലല്ലോ. ഇനി സ്വേച്ഛാധിപതി ഗവണ്മെന്റ് നിഷേധിച്ചാല്‍ അത് പ്രൊപ്പഗാണ്ടാ എന്ന് പറഞ്ഞ് തള്ളുകയും ചെയ്യാം.)

യോഗവിദ്യയുടെ പരമാചാര്യനായിരുന്ന ചട്ടമ്പിസ്വാമികള്‍ സമാധിയായി ശരീരം കളഞ്ഞിട്ടുണ്ട്. രാമകൃഷ്ണദേവന്‍, ശ്രീനാരായണ ഗുരു, രമണ മഹര്‍ഷി, സ്വാമി വിവേകാനന്ദന്‍,മുഹമ്മദ് റൂമി, യേശുകൃസ്തു,ജ്ഞാനേശ്വര്‍,മുത്തുനബി, കബീര്‍, ഗുരു നാനാക്ക്,ജിദ്ദു കൃഷ്ണമൂര്‍ത്തി, ലവോ റ്റ്സു,ബുദ്ധന്‍, നിസംഗദത്ത മഹാരാജ്, ശങ്കരാ‍ചാര്യര്‍....ഒക്കെ ഇന്നീ ഭൂമിയില്‍ ഇല്ല.അടുത്ത കാലത്ത് മരിച്ചുപോയവരെയൊക്കെപ്പറ്റി നമുക്ക് നല്ലവണ്ണം അറിയാവുന്നതാണ്. ജീവിച്ചിരിയ്ക്കുന്നവരും മഹാ യോഗികളെങ്കില്‍ കൂടി ജരാനരകളില്‍ നിന്ന് ഒഴിവായി ജീവിയ്ക്കുന്നില്ല. രമണ മഹര്‍ഷി കാന്‍സര്‍ വന്നിട്ടാണ് മരിച്ചത്. ശ്രീരാമകൃഷ്ണദേവനും അതുപോലെ തന്നെ. എന്റെ അപ്പൂപ്പന്‍ പറഞ്ഞത് പ്രകാരം നാരായണ ഗുരുവിന് വയറുവേദനയായിരുന്നു അവസാന കാലത്ത്. അവര്‍ക്കെല്ല്ലാവര്‍ക്കും തന്നെ മനുഷ്യനുണ്ടാകുന്ന അസുഖങ്ങളും ശരീരവേദനയും എല്ലാം വന്നിട്ടുണ്ട്.

ഇനി മനസ്സിന്റെ കാര്യം. നമ്മള്‍ മനസ്സ് എന്ന് ഇന്ന് വിചാരിയ്ക്കുന്ന/വിളിയ്ക്കുന്ന സാ‍ധനം കുറെയേറെ തലച്ചോറിന്റെ ഒരു ഉപോല്‍പ്പന്നമാണെന്ന് തെളിയിച്ചിട്ടുണ്ട്. ബുദ്ധിശക്തി, ഓര്‍മ്മശക്തി , വികാരങ്ങള്‍, ലൈംഗികത...എല്ലാം തലച്ചോറിന്റെ ചില പ്രത്യേക പ്രവൃത്തികളാണെന്ന് നമുക്കറിയാം. അതുകൊണ്ട് തന്നെ ആ രാസവൈദ്യുത പ്രക്രിയകളെ വൈദ്യശാസ്ത്രം ഇന്ന് നിയന്ത്രിയ്ക്കുന്നുമുണ്ട്. (അതിന്റേതായ രീതിയിലും പരിമിതിയിലും).സംഗീതം സാഹിത്യം (ലളിതകലകള്‍), കലനശേഷി, വികാരമൂര്‍ച്ഛ, വിശപ്പ്, ഓര്‍മ്മ..... ഒക്കെ തലച്ചോരിന്റെ ചില പ്രത്യേകഭാഗങ്ങളുടെ ഉദ്ദീപനങ്ങളാല്‍ ഉണ്ടാകുന്നതാണെന്നോ (*അല്ലെങ്കില്‍ അവയൊക്കെ ഉണ്ടാകുമ്പോള്‍ തലച്ചോറിന്റെ ചില പ്രത്യേകഭാഗങ്ങള്‍ ഉദ്ദീപിക്കപ്പെടുമെന്നോ:) ഗവേഷണങ്ങള്‍ പൂര്‍ണ്ണമായും തെളിയിച്ചിരിയ്ക്കുന്നു.(ഇതൊക്കെ ചെറിയ ഗൂഗിള്‍ സെര്‍ച്ച് വഴി കാണാം.പല ജേര്‍ണലുകളും സൌജന്യമാണ്.)

ആ ഗവേഷണങ്ങള്‍ ഇന്ന് പോകുന്ന രീതി വച്ചാണെങ്കില്‍ മനസ്സ് പൂര്‍ണ്ണമായും തലച്ചോറിന്റെ ഉപോല്‍പ്പന്നമെന്ന് തെളിയിയ്ക്കാന്‍ അധികകാലമൊന്നും വേണ്ടിവരില്ല.തലച്ചോറ് നശിച്ചാല്‍ മനസ്സും നശിയ്ക്കും. പക്ഷാഖാതം വന്ന് തലച്ചോറിന്റെ ഭാഗങ്ങള്‍ നശിച്ചുപോയവരെ നോക്കൂ..എന്റെ ഒരു സുഹൃത്തിന്റെ അച്ഛന്‍ വലിയ കവിതാ പ്രേമിയായിരുന്നു. അദ്ദേഹം പഠിച്ച കവിതകളൊക്കെ പക്ഷാഖാതം വന്നപ്പോള്‍ മറന്ന് പോയി. ഗുരു നിത്യ ചൈതന്യ യതിയും അങ്ങനത്തെ അവസ്ഥയെപ്പറ്റി എഴുതിയിട്ടുണ്ട്. നടരാജഗുരുവിനും പക്ഷാഖാതം വന്നിരുന്നു. എന്റെ അമ്മയുടെ അച്ഛന് തലച്ചോറില്‍ രക്തസ്രാവം വന്നപ്പോള്‍ അദ്ദേഹം സാമൂഹ്യ മര്യാദകളൊക്കെ മറന്ന് പെരുമാറിയിരുന്നു. ഭ്രാന്താണെന്നാണ് ആദ്യം വിചാരിച്ചത്. ശരിയായ ചികിത്സ കിട്ടാതെ അപസ്മാരം മൂലം തലച്ചോറിന്റെ ചില ഭാഗങ്ങള്‍ക്ക് കേടുപറ്റുമ്പോള്‍ പല കുട്ടികളും ബുദ്ധിമാന്ദ്യമുള്ളവരായിട്ട് തീരും. ഇതൊക്കെ നമുക്ക് ചുറ്റും നടക്കുന്നതാണ് .സയന്‍സ് ജേണലുകള്‍ വായിച്ചതല്ല..അതുകൊണ്ടാണ് ഇങ്ങനെയെഴുതുന്നത് .

ആത്ഷിമേഴ്സ് അസുഖം വന്നവര്‍ താനാരാണെന്നുവരെ മറന്നുപോകും. ഭക്ഷണം കഴിയ്ക്കാനും വിസര്‍ജ്ജിയ്ക്കാനും വരെ മനക്കുഴച്ചിലുകളുണ്ടാവാം.താന്‍ സ്നേഹിച്ചിരുന്നവര്‍, സ്വപ്നങ്ങള്‍ , (ഉറക്കത്തിലെ സ്വപ്നങ്ങളല്ല:)) വികാരങ്ങള്‍, , ഒക്കെ മറന്ന് പോകും. മറന്ന്പോകും എന്ന് പറയുന്നത് പൂര്‍ണ്ണമായി ശരിയാവില്ല......അതൊക്കെയങ്ങ് ഇല്ലാതാവും.

ഇനി അത്ഭുതങ്ങളുടെ കാര്യം.സാധാരണ നമ്മള്‍ കണ്ടു വരുന്ന പ്രാപഞ്ചിക നിയമങ്ങളെ അനുസരിയ്ക്കാത്ത സംഭവങ്ങളാണല്ലോ അത്ഭുതങ്ങള്‍. ഉദാഹരണമായി ഞാനൊരു കുട്ടിയെ ചികിത്സിച്ചിട്ടുണ്ട്. അമൃതാ ആശുപത്രിയില്‍. തലച്ചോരില്‍ ട്യൂമറായിരുന്നു. കയ്യും കാലും തളര്‍ന്ന് പോയി. എതോ കൃസ്ത്യന്‍ ധ്യാനകെന്ദ്രത്തില്‍ ധ്യാനം കൂടിയപ്പോ അത്യത്ഭുതമായി ആ കുട്ടിയ്ക്ക് ചലനശേഷി തിരിച്ച് കിട്ടി. ഞാന്‍ കാണുമ്പോ ആ കുട്ടി ഒരു സാധാരണ കുട്ടിയെപ്പോലെ തന്നെയായിരുന്നു. അത്രയും വലിയ ട്യൂമറ് തലച്ചോറിലുണ്ടായിട്ട് യാതൊരു വിധ ലക്ഷണങ്ങളും കാണിയ്ക്കുന്നില്ല..സാധാരണ പോലെ നടക്കാനും സംസാരിയ്ക്കാനും ഒക്കെ കഴിയും.അതൊക്കെ ആ ധ്യാനകേന്ദ്രത്തില്‍ വച്ച് തിരിച്ച് കിട്ടിയതാണ്. ഞാന്‍ കണ്ടതില്‍ പല അത്ഭുതങ്ങളിലൊന്നാണത്. എങ്കിലെന്ത്? ആ കുട്ടിയും ചികിത്സയെടുത്തു. കുറെ നാള്‍ കഴിഞ്ഞ് അത് ചിലപ്പോ അഞ്ചോ പത്തോ അമ്പതോ നൂറോ കൊല്ലമെന്നില്ല ..ആ കുട്ടിയും മരിയ്ക്കും. ഭക്ഷണം കഴിയ്ക്കാതെയിരുന്നാലും കഴിച്ചാലും ഹീരാദത്തന്‍ മനേകും മരിയ്ക്കും.തലകുത്തി മുള്ളില്‍ കിടക്കുന്ന സ്വാമിയാരും ഒരുദിനം മരിയ്ക്കും. പോപ്പും മരിയ്ക്കും.മുല്ലാ നാസറുദ്ദീനും മരിയ്ക്കും. ദേ ഞാനിന്ന് ചികിക്സിച്ച് വിട്ട ഹേന്രി ബാര്‍ബറും മരിയ്ക്കും. രണ്ട് ലോകമഹാ യുദ്ധങ്ങളും കഴിഞ്ഞ നൂറ് വയസ്സുകാരനാണ്. ഇപ്പൊ ചെറിയ മാരകമല്ലാത്ത ഒരു കാന്‍സര്‍ വന്നു. പൂര്‍ണ്ണമായും ചികിക്സിച്ചു മാറ്റി. എന്നാലും മരിയ്ക്കും.

എന്നെങ്കിലുമൊരിയ്ക്കല്‍.ഇപ്പൊഴാവാം ..നാളെയാവാം.. ഈയെഴുതുന്ന ഞാനും മരിയ്ക്കും മരിച്ചാല്‍ ശരീരവും മനസ്സും ഒക്കെ ജീര്‍ണ്ണിയ്ക്കും യാതൊരു സംശയവുമില്ല.

അപ്പൊ മനസ്സും നിലനില്‍ക്കുന്നതോ ശാശ്വതമോ അല്ല എന്ന് ഉറപ്പായി.ഇനിയെന്ത്?

എനിയ്ക്കറിയില്ല. ഇവിടെ വച്ച് എന്റെ മുന്നില്‍ രണ്ട് വഴികളുണ്ട്. ഒന്നുകില്‍ കോവൂരും സനല്‍ ഇടമറുകും കൂട്ടരും പറയുന്നത് ശരിയെന്ന് സമര്‍ഥിയ്ക്കാം.ഇതെല്ലാം ഭൌതികവസ്തുവാണ്.അതല്ലാതെ മറ്റൊന്നുമില്ല. അവര്‍ ഉറപ്പിച്ച് പറയുന്നു.എന്റെ അവസ്ഥയും അതുതന്നെ. ലോകത്തിന്നുവരെ കണ്ടിട്ടുള്ളതില്‍ എല്ലാം മനുഷ്യ ബുദ്ധിയ്ക്ക് ഗോചരമാണ്. ഇന്നല്ലെങ്കില്‍ നാളെ എല്ലാം ശാസ്ത്രത്തിനു വിശദീകരിയ്ക്കാന്‍ സാധിയ്ക്കും. പുറമേ കാണുന്ന എന്ത് വിഷയങ്ങളായാലും അതിനു ചില നിയമങ്ങളുണ്ട്. ഊര്‍ജ്ജ, ദ്രവ്യ സംരക്ഷണ നിയമമൊക്കെപ്പോലെ. ദേശ കാലങ്ങളിലാണ് അതൊക്കെ നടക്കുന്നത്. (ഞാനൊരു ഉദാഹരണം പറഞ്ഞതാണ്). ഓരോ‍ന്നോരോന്നായി ഇങ്ങനെ വിഷയങ്ങള്‍ വന്നുകൊണ്ടിരിയ്ക്കും. തിരമാലകളെപ്പോലെ.

രമണമഹര്‍ഷിയോട് ചോദിച്ചാല്‍ അതൊക്കെ, ഈ ചിന്തകളൊക്കെ എവിടെനിന്ന് പൊന്തുന്നു എന്നന്വേഷിയ്ക്കാന്‍ പറയും.

യേശുദേവനാണെങ്കിലോ “ Neither shall they say, Lo here! or, lo there! for, behold, the kingdom of God is within you.“ എന്നു പറയും.

ദൈവമുണ്ടോ എന്നു ചോദിച്ചാല്‍ ദൈവമേ ഉള്ളൂ എന്ന് ഗുരു നിത്യ പറഞ്ഞ് തരും.

നാരായണ ഗുരു പറഞ്ഞിരിയ്ക്കുന്നു.

“ദൈവമേ കാത്തുകൊള്‍കങ്ങ് കൈവിടാതിങ്ങു ഞങ്ങളേ
നാവികന്‍ നീ ഭവാബ്ധിക്കൊരാവി തന്‍ തോണി നിന്‍ പദം
ഒന്നൊന്നായെണ്ണിയെണ്ണി തൊട്ടെണ്ണും പൊരുളോടുങ്ങിയാല്‍
നിന്നിടും ദൃക്ക് പോലുള്ളം നിന്നില സ്പന്ദമാകണം“

എന്ന്. ഇവിടെ ഞാന്‍ തെരഞ്ഞെടുക്കാന്‍ ഇഷ്ടപ്പെടുന്നത് ഗുരുവരുളുകളാണ്. (അതെന്താണെന്നാല്‍ ഒരു സൌന്ദര്യാത്മകമായ തിരഞ്ഞെടുപ്പെന്ന് കൂട്ടിയാല്‍ മതി. വലിയ കാര്യമൊന്നുമുണ്ടായിട്ടല്ല.ചിലര്‍ക്ക് ചോക്കോബാര്‍ ഇഷ്ടം ചിലര്‍ക്ക് ഡയറി മില്‍ക്ക് ഇഷ്ടം അത്രേള്ളൂ)

അപ്പൊ ആരാണ് ദൈവം എന്ന് ചോദ്യം വരും. എന്നിട്ടല്ലേ ‘കാത്ത്കൊള്‍കങ്ങ്‘ എന്ന് കാര്യം വരുന്നത്.

ആ ചോദ്യത്തിന് ബാലകൃഷ്ണഗുരു ഇങ്ങനെ പറഞ്ഞ് തന്നു.” കാണപ്പെടുന്ന എല്ലാ പ്രപഞ്ച ഘടകങ്ങളും ഇല്ലാതിരുന്നിട്ട് എങ്ങുനിന്നോ പൊന്തി വരുന്നതാണ്. അവ അല്‍പ്പകാലം ഏതിലോ നിലനിന്നിട്ട് എങ്ങോ തിരിച്ച് മറയുന്നു. ഈ പ്രപഞ്ച സ്വഭാവം ഇന്ന് സകലര്‍ക്കും ബോധ്യപ്പെട്ടിട്ടുള്ളതാണ്.അങ്ങനെയാണെങ്കില്‍ ഇവ ഏതില്‍ നിന്നും പൊന്തിവന്നുവോ ഏതില്‍ നിലനില്‍ക്കുന്നുവോ ഏതില്‍ തിരിച്ച് മറയുന്നുവോ അതാണ് ദൈവം.“

(സൂരജ് പണ്ട് പറഞ്ഞ പോലെ ശാസ്ത്രം ഒരുനാള്‍ ഇതിനെ ഡീമിസ്റ്റിഫൈ ചെയ്തുതരുമായിരിയ്ക്കും. ആകട്ടേ.ഒരു കുഴപ്പവുമില്ല.സത്യമെന്തോ അത് അറിയണം.അല്ലേ.)

അപ്പൊ ആ ദൈവത്തിന്റെ പദങ്ങള്‍ ഈ സംസാരസമുദ്രത്തില്‍ ഒരു ആവിക്കപ്പലാണ്. വന്‍‌തോണി. നാവികനും അവന്‍ തന്നെ. ഓരോന്നോരോന്നായി വരുന്ന ദൃശ്യങ്ങള്‍ അവസാനിയ്ക്കുമ്പോള്‍ അവയുടെ കണ്ണായിനിന്ന വസ്തു തെളിയും.സ്പന്ദനങ്ങളില്ലാതാകണം - ചലനം നിലച്ച് ഏകീഭവിയ്ക്കുമാറാകണം. എന്നും ഗുരു പറയുന്നു.

ജനനീ നവരത്ന മഞ്ജരിയില്‍ നാരായണഗുരു ഇങ്ങനേയും പറഞ്ഞിരിയ്ക്കുന്നു.

“മീനായതും ഭവതി, മാനായതും ജനനി നീ നാഗവും നഗഖഗം
താനായതും ധരനദീനാരിയും നരനും ആ നാകവും നരകവും
നീ നാമ രൂപമതില്‍ നാനാവിധപ്രകൃതി മാനായി നിന്നറിയുമീ
ഞാനായതും ഭവതി..ഹേ..നാദരീപിണി ...അഹോ നാടകം നിഖിലവും....“

(മീനായും മാനായും പാമ്പായും പര്‍വതമായും പക്ഷിയായും ഒക്കെ രൂപം കൊണ്ടിരിയ്ക്കുന്നത് ബ്രഹ്മശക്തിയായ മായ തന്നെ. ഭൂമിയും നദിയും സ്ത്രീയും പുരുഷനും സ്വര്‍ഗ്ഗവും നരകവും ഒക്കെ മായയുടെ ദര്‍ശനങ്ങള്‍ മാത്രം.ഇങ്ങനെ കാണപ്പെടുന്ന നിരവധി നാമരൂപങ്ങളില്‍ ചുറ്റിത്തിരിഞ്ഞ് കാമക്രോധാദി എണ്ണമറ്റ വികാരങ്ങള്‍ക്കു വശപ്പെട്ട് എല്ലാറ്റിനേയും അറിഞ്ഞനുഭവിച്ചു കൊണ്ട് നില്‍ക്കുന്ന അഹംകാരവും ശക്തിയുടെ സൃഷ്ടി തന്നെ. അങ്ങനെയുള്ള അമ്മേ! നീ അനാഹത ധ്വനികളില്‍ കൂടിയാണ്‍ ഒരു യോഗിയ്ക്ക് അനുഭവ ഗോചരയാകുന്നത്. അഥവാ ആദികാരണസത്തയില്‍ ശബ്ദരൂപത്തില്‍ പൊന്തിയ നീയാണ്‍ ഇതെല്ലാം കാട്ടിക്കൂട്ടുന്നവള്‍. പ്രപഞ്ചം മുഴുവന്‍ നീ നടിയ്ക്കുന്ന ഒരു നാടകം മാത്രം (വിവ; ബാലകൃഷ്ണഗുരുദേവന്‍.) )

അഹോ നാടകം നിഖിലവും.!!!!

: കണ്ണിന്നു കണ്ണ് മനമാകുന്ന കണ്ണതിനു
കണ്ണായിടുന്ന പൊരുള്‍ താന്‍ എന്നുറയ്ക്കുമലവാനന്ദമെന്ത്?
ഹരീ..നാരായണായ നമഃ “:

എന്ന് തുഞ്ചത്തച്ഛനും പറയുന്നു.

......മഹാകവികള്‍ ..അല്ലാതെന്താണിത്??

ഒരു കോപ്പ ബിയര്‍

2007-10-13T20:32:00.000-07:00

ഒരു കൂട്ടം പരീക്ഷാ കടലാസുകള്‍ക്കിടയില്‍ ഒരു വെള്ളക്കടലാസു കണ്ടപ്പോള്‍ പ്രൊഫ. ടൊ‍ക്കിന് ഇങ്ങനെ എഴുതാനാണ് തോന്നിയത്.
"In a hole in the ground there lived a hobbit."

പോള്‍ ഹാരിസണെ ആദ്യം കണ്ടപ്പോള്‍ ഒരു വിമുക്തഭടനാണെന്നാണ് എനിയ്ക്ക് തോന്നിയത്. ഏതാണ്ട് അമ്പത് - അമ്പത്തഞ്ച് വയസ്സ് ..ആറരയടി ഉയരം, ഹക്‌ഹോഗന്റേതുപോലുള്ള ശരീരം. സാധാരണ ഞങ്ങളിടുന്ന ജോലിക്കുപ്പായങ്ങള്‍ക്ക് പകരം ഒരു വെള്ള പോളോ ടീഷര്‍ട്ടും ട്രൗസറും വേഷം. ടീഷര്‍ട്ടിന്റെ പോക്കറ്റിനു മുകളില്‍ മെഡലുകള്‍...

"താങ്കള്‍ പട്ടാളത്തിലായിരുന്നോ? "

പരിചയപ്പെടലുകളുടെ വിരസതയൊഴിഞ്ഞൊരു ദിവസം ഞാന്‍ ചോദിച്ചു..

"വെല്‍...ആഗ്രഹമുണ്ടായിരുന്നു..ഞാനൊരു മക്മില്ലന്‍ റേഡിയോഗ്രാഫറാണ്.." പോളിന്റേതായ ഒരു ചിരി ചിരിച്ചു ..

ഒരു ദിവസം കമ്പ്യൂട്ടറുമായി മല്ലിടുന്നതിനിടയില്‍ പോള്‍ പറഞ്ഞു..
"നിനക്കറിയുമോ ഞാനീ ജോലി വെറുക്കുന്നു" ..

സോഫ്റ്റ്വേര്‍ ശരിയാക്കേണ്ടുന്ന ഫിസിക്സിലെ ആളുകള്‍ , "പോള്‍ ചൂടാണപ്പാ " എന്ന് അന്ന ഫോണ്‍ വിളിച്ച് പറഞ്ഞത് കേട്ട് മുകളിലത്തെ നിലയില്‍ നിന്ന് ഓടിവരുന്ന ശബ്ദം പടികളില്‍ മുഴങ്ങുന്നുണ്ടായിരുന്നു അപ്പോള്‍...എല്ലാവര്‍ക്കും പോളിനെ പേടിയായിരുന്നു..പേടിയെന്ന് പറയാനാകില്ല..ഒരുതരം സ്നേഹം കലര്‍ന്ന പേടി..എനിയ്ക്കും..

"ഇതല്ലേല്‍ എന്ത് ജോലി ചെയ്യും..? ഞാന്‍ ചോദിച്ചു

"റിട്ടയര്‍ ചെയ്യുമ്പോള്‍ ഞാന്‍ ചൂണ്ടയിടാന്‍ പോകും ..ഒരു വലിയ തടാകം വാങ്ങി മുഴുവന്‍ സമയവും ചൂണ്ടയിടണം.. ബീറും കുടിയ്ക്കണം ഉറങ്ങണം.."

വ്യാഴാശ്ച വൈകിട്ട് പോള്‍ സന്തോഷവാനാകും.."ഇന്ന് വലിയ സന്തോഷമാണല്ലോ.."

"ഇനി മൂന്ന് ദിവസം എനിയ്ക്ക് ജോലിയില്ല..ചൂണ്ടയിടാന്‍ പോകുന്നു.." പോള്‍ പറഞ്ഞു..
നാലു ദിവസം മാത്രമേ പോള്‍ ജോലിചെയ്യൂ...

"എന്നും ചൂണ്ടയിടക്കം തന്നെ ചൂണ്ടയിടക്കം..പോള്‍.. ഞായറാഴ്ച തിരിച്ച് വന്നോണം.. മകന്‍ നമ്മെ കാണാന്‍ വരുന്നുണ്ട്.." കൂടെത്തന്നെ ജോലിചെയ്യുന്ന ഹെതര്‍ പരാതിപ്പെട്ടി തുറന്നു.

വന്നിട്ട് ഒരാഴ്ച മാത്രമായ എന്നോട് പോള്‍ ചോദിച്ചു..
"ഇവളെന്റെ ഭാര്യയാണെന്ന് നിനക്കറിയുമോ?"

"അറിയാം..വിശേഷങ്ങളെല്ലാം ആദ്യരണ്ട് ദിവസങ്ങള്‍ക്കുള്ളില്‍ തന്നെ അതബീര്‍ പറഞ്ഞിരുന്നു.."

"നിങ്ങളെന്താണാപ്പാ ഈ ചൂണ്ടയിടുമ്പോള്‍ ചെയ്യുന്നത്? " എനിയ്ക്ക് മനസ്സിലായില്ല..

"ഹോ നിനക്കുവല്ലതുമറിയുമോ.. കരയില്‍ കൂടരവുമടിച്ച് ചൂണ്ട വെള്ളത്തിലിട്ട് ഇങ്ങനെയിരിയ്ക്കണം.. സൈറണ്‍ ഓണാക്കിവച്ച് നിനക്ക് ടെന്റില്‍ പോയിക്കിടന്നുറങ്ങാം.. വായിയ്ക്കാം.. ആരുമില്ല കൂടെ..(ശബ്ദം താഴ്ത്തി)..പണ്ടൊക്കെ കിടന്ന് സ്വയംഭോഗം ചെയ്യുമായിരുന്നു..ഹി ഹി..പിന്നെത്ര കാശ് പെണ്ണുങ്ങള്‍ക്ക് പോയി....ഇപ്പൊ ബിയറൊക്കെയടിച്ച് വായിച്ച് അങ്ങനെ തടാകത്തിലും നോക്കി.. എന്ത് സുഖമാണെന്നറിയാമോ? സമാധാനം.."

അത് പോട്ടേ എത്ര മീനിനെ കിട്ടും..? ഞന്‍ ചോദിച്ചു..

"മീനുകള്‍.. ഞാന്‍ കഴിഞ്ഞ രണ്ട് വര്‍ഷമായി നാലു മീനിനെ പിടിച്ചിട്ടുണ്ട്..(എന്തോ കിട്ടിയ മട്ടില്‍ ഒന്നുകൂടെ ഉറപ്പിച്ച് പറഞ്ഞു)..നിനക്കറിയുമോ.. നാലു മീനുകള്‍"

എനിയ്ക്ക് ചിരി പൊട്ടി...നാലു മീനുകളെയ്..രണ്ട് കൊല്ലം..

"കിട്ടുന്ന മീനുകളെ എന്ത് ചെയ്യും?" ചിരിയടക്കി ചോദിച്ചു

" എന്ത് ചെയ്യാന്‍.. വേദനിയ്ക്കാതെ ചൂണ്ട ഊരിയെടുക്കും..വെള്ളത്തില്‍ പിടിച്ച് വച്ച് കുറേ നേരം അതിനോട് വര്‍ത്തമാനം പറയും.. ക്ഷമയൊക്കെ പറഞ്ഞ് അങ്ങ് വിടും..നീന്തി പോകുന്നത് നോക്കി നില്‍ക്കും..ചിലപ്പോ സങ്കടം തോന്നും.." പോള്‍ എന്തോ ആലോചിച്ചിരുന്നു.."എന്നാലും ചൂണ്ടയിടുന്നത് ഭയങ്കര രസം തന്നെ"

ഞാനല്ലാതെ ആരുമില്ല എന്നുറപ്പുവരുത്തിയ ശേഷം പോള്‍ പതുക്കെ കസേരയില്‍ നിന്ന് ചന്തി പൊക്കി ഒരു വളിവിട്ടു..ഉറക്കെ ചിരിച്ചു..എന്നിട്ട് എന്നോട് ഉറക്കെ ചോദിച്ചു..

"ച്ചേ..ച്ചേ..മഡൂ..നീയെന്താ ഇങ്ങനൊക്കെ പരസ്യമായി ചെയ്യുന്നത്..ഹെയ്..നാറുന്നല്ലോ..ഹ ഹ ഹ.."

പോള്‍..അത് നീയാണെന്ന് എനിയ്ക്കറിയാം ..മുറിയിലേക്ക് കടന്ന് വന്ന അന്ന പറഞ്ഞു..

"പോള്‍ നിങ്ങളുടെ സിഗ്നേച്ചര്‍ ആര്‍ക്കും അനുകരിയ്ക്കാനാവും"..ഒരുദിനം ഞാന്‍ പറഞ്ഞു..

"ഒരു രോഗിയെ ചികിത്സിയ്ക്കുന്ന കാര്യത്തില്‍, ജീവന്റെ കാര്യത്തില്‍.. ആര്‍ക്കാണ് എന്റെ സിഗ്നേച്ചര്‍ അനുകരിയ്ക്കേണ്ടത്..ആര്‍ക്ക് അങ്ങനെയൊരു കാര്യം കള്ളം ചെയ്യാനാകും മഡൂ..?"

ഒരുദിവസം വൈകിട്ട് ചായസമയത്ത് അന്നയുമൊത്ത്, പോള്‍ വിശ്രമ മുറിയിലിരിയ്ക്കുകയായിരുന്നു....കടന്ന് ചെന്ന എന്നോട് ചോദിച്ചു..

"നീ ദൈവത്തില്‍ വിശ്വസിയ്ക്കുന്നുണ്ടോ?"
"അത്..ദൈവം..വിശ്വാസം..വെല്‍.."

ഒഴിഞ്ഞു മാറുന്നതായിരിയ്ക്കും ശരീരത്തിനു നല്ലതെന്ന് എനിയ്ക്ക് തോന്നിയത് കൊണ്ട് പറഞ്ഞു..
"ഞാന്‍ ആജ്ഞേയ വാദിയാണ്.."

"നോക്കൂ അന്നാ..ആരും അങ്ങനെ ഉറപ്പിച്ച് പറയുന്നില്ല..ദൈവമൊന്നുമില്ല..മഡൂ നിനക്കറിയാമോ ഞാന്‍ നിരീശ്വരവാദിയാണ്..ദൈവമെങ്ങനെ ഇത്രയും യുദ്ധവും മരണവുമൊക്കെയുണ്ടാകുന്നു..ദൈവം ശരിയ്ക്കും ഇല്ല.."

"പക്ഷേ എനിയ്ക്കറിയാം ദൈവമുണ്ടെന്ന് "..അന്ന ഉറപ്പിച്ച് പറഞ്ഞു..ഈ ലോകമൊക്കെ ആരുണ്ടാക്കി..?

"നിനക്കെങ്ങനെ ഇത്രയും വിദ്യാഭ്യാസം കിട്ടിയിട്ടെന്ത് കാര്യം? പോള്‍ ചോദിച്ചു..സയന്‍സ് ഇതിനൊക്കെ ഉത്തരം തന്നിട്ടുണ്ട്..

"സയന്‍സിനു തരാന്‍ കഴിയാത്ത ഉത്തരങ്ങളൊരുപാടുണ്ട് പോള്‍.."

അപ്പൊ പ്രപഞ്ചമുണ്ടായതിനെപ്പറ്റിയുള്ള തിയറികളും ഇപ്പോ സ്റ്റീഫന്‍ ഹോക്കിന്‍സും ഒക്കെ വെറും മണ്ടന്മാരാണെന്നോ?

വാദം കൈവിട്ട് പോകുന്നു എന്ന് കണ്ട അന്ന വിഷയം മാറ്റി..

"മഡൂ നിനക്കറിയുമോ..പോള്‍ വിഷമിപ്പമ്യ്ക്കുന്ന സിനിമ കണ്ടാല്‍ കരയും..ഹി ഹി ഹി..അല്ലേ ഹെതര്‍?"

"ശരിയാണ്..സന്തോഷം വരുന്ന സിനിമ കണ്ടാലും പോള്‍ കരയും..ഹി ഹി .".ഭാര്യ ഹെതര്‍ കൂട്ടുകാരിയുടെ പക്ഷം പിടിച്ചു..

"അത്....ആ സിനിമയില്‍ അവര്‍ ഒന്നിയ്ക്കുമെന്ന് ഞാന്‍ വിചാരിച്ചില്ല..നീയും കരഞ്ഞിരുന്നു.."

ആ സീന്‍ ആലോചിച്ച് കണ്ണ് നിറഞ്ഞ് പോള്‍ പറഞ്ഞു..

എല്ലാരും പോയപ്പോള്‍ ഞാനും പോളും മാത്രമായി വിശ്രമമുറിയില്‍..

"നിനക്കറിയുമോ രഹസ്യമായി ഞാന്‍ പ്രാര്‍ത്ഥിയ്ക്കാറുണ്ട്..മീനെ കിട്ടാതെ ഒത്തിരി നാളൊക്കെയാകുമ്പോ ഞാന്‍ കാര്‍പ് ഗോഡിനോട് പ്രാര്‍ത്ഥിയ്ക്കും..നിനക്കറിയുമോ ആ ദിവസം അത്ഭുതമെന്നോണം മീനെ കിട്ടും ..എന്നാലും ദൈവത്തില്‍ എനിയ്ക്ക് വിശ്വാസമൊന്നുമില്ല.."..മാസികയിലേയ്ക്ക് മുഖം താഴ്ത്തി പോള്‍ പറഞ്ഞു.

വേറൊരു ദിവസം ഒരു കാരണവുമില്ലാതെ എന്തോ ഓര്‍ത്ത് ഭയങ്കര ഗൗരവത്തില്‍ പോള്‍ എന്നോട് പറഞ്ഞു..

"മഡൂ റേസിസമാണേന്ന് തെറ്റിദ്ധരിയ്ക്കരുത്..ഈ ജപ്പാങ്കാര്‍ ഭയങ്കര ക്രൂരന്മാരാണ്..."

പോളിന്റെ അപ്പോഴത്തെ മുഖഭാവം കണ്ടപ്പോല്‍ എനിയ്ക്കിങ്ങനെ ചോദിയ്ക്കാനാണ് തോന്നിയത്.., പോള്‍ ഇന്നലെയേത് സിനിമ കണ്ടു? ചോദിച്ചില്ല..മ്മടെ ശരീരം നോക്കണമല്ലോ..:)

II)

അന്ന ഗാര്‍ഡ്നര്‍ (അന്നക്കുട്ടി പൂന്തോട്ടത്തില്‍:) ചെന്നയന്ന് മുതലേ എനിയ്ക്കൊരു ചേച്ചിയെപ്പോലെയായിരുന്നു..തടിച്ചി..നാല്പ്പത് വയസ്സ്..എപ്പോഴും എന്നോട് ഇന്‍ഡ്യയെപ്പെറ്റിയൊക്കെ ചോദിയ്ക്കും വിദൂരദേശത്ത് ഇങ്ങനെയൊക്കെ എത്രയെത്ര ആള്‍‍ക്കാര്‍ എന്നൊക്കെയാലോചിച്ച് അമ്പരക്കും..ലോകത്തിന്റെ വൈചിത്ര്യങ്ങളെപ്പറ്റി ആലോചിച്ച് ദൈവത്തെ വിളിയ്ക്കും.

ഭാരതത്തിലെ ഭക്ഷണത്തെപ്പറ്റിയൊക്കെ ചോദിച്ചപ്പോള്‍ ഞാന്‍ തിരിച്ച് ചോദിച്ചു..

"നിങ്ങളെന്താ കഴിയ്ക്കുന്നത്..?

"അത്..ബ്രെഡ്, ജാക്കറ്റ് പൊട്ടറ്റോ, പല പല ഫില്ലിംഗ്സ് വച്ച്, സാന്‍ഡ് വിച്ച്,ഇറച്ചി, കാബേജ്, പംകിന്‍, ചിക്കന്‍ ......പോരിജ്...നിനക്കറിയുമോ എന്റെ തോട്ടത്തില്‍ കുറെ പച്ചക്കറികള്‍ ഞാനുണ്ടാക്കും..എന്റെ ഭര്‍ത്താവിന് അതാണിഷ്ടം."

അന്ന ഒരു തടിച്ചിയാണ്. ഞാനും ഒരു തടിയനായ സ്ഥിതിയ്ക്ക് എന്റെ പുതിയ ഗവേഷണാഫലമായ ഡയറ്റ് കാരണം(ജീവിതകാലമിന്നുവരെ അത്തരം മാറിമാറിയുള്ള ഡയറ്റുകളിലൂടെയാണ് ഞാന്‍ നടന്നിരിയ്ക്കുന്നത്:) അഞ്ച് കിലോ കുറഞ്ഞത് ഞാന്‍ വിശദീകരിച്ചു..

എത്ര സ്റ്റോണ്‍? അന്ന ചോദിച്ചു

അഞ്ച് കിലോ...

ഹൊ കിലോ..അതൊന്നും എനിയ്ക്കറിയില്ല..എത്ര സ്റ്റോണെന്ന് പറയെടാ..

എന്ത് സ്റ്റോണ്‍...? എനിയ്ക്കറിയാമോ..?

"ഒരു സ്റ്റോണ്‍" ഞാന്‍ ചുമ്മാ പറഞ്ഞു..

കൃസ്തുമസ് പാര്‍ട്ടി....

ഗൗട്ടടിച്ച് കാലുവയ്യാതെയാണേങ്കിലും എന്നെ വലിച്ചിഴറച്ച് അന്ന ഡാന്‍സ് ചെയ്യിച്ചു..ഡാന്‍സിന്റെ ചുവടുകള്‍ പഠിപ്പിച്ചു..കള്ള് കുടിച്ച് ഫിറ്റായി ഞങ്ങള്‍ ഡിപ്പാര്‍ട്ട്മെന്റുകാര്‍ മാത്രം ഹോട്ടലിന്റെ ലോഞ്ചിലിരുന്ന് സൊറ പറയുമ്പോള്‍ നിറച്ചൊരു ബയര്‍ കോപ്പയുമായി അന്ന ആടിയാടി വന്നു..എന്നെ കെട്ടിപ്പിടിച്ച് ചെള്ളയ്ക്ക് നാലഞ്ച് ഉമ്മ തന്നു..

"ഇവനെയെനിയ്ക്ക് ഭയങ്കര ഇഷ്ടമാണ്....ഭയങ്കര ഇഷ്ടം..(പോളിന്റെ ചിരി കണ്ട് അയാളോടായി)..അല്ലെടോ ലൈംഗികപരമായ ഇഷ്ടമല്ല..ഒരു മകനെപ്പോലെ ഇഷ്ടം..

അശോകും ചിരിയ്ക്കുന്നുണ്ടായിരുന്നു ..അവന് വിഷമമാകുമോ എന്ന് വിചാരിച്ച് അന്ന പറഞ്ഞു.."നിന്നെയും ഇഷ്ടം തന്നെ..എന്നാലും ഇവനെയാണ് എനിയ്ക്ക് കൂടുതലിഷ്ടമിഷ്ടാ..വെഷമം തോന്നര്‍ത്.."

അവിടെയിരുന്ന എല്ലാവരേയും കൊണ്ട് അന്ന എന്നെ ഉമ്മ വയ്പ്പിച്ചു..മെലനി ഉമ്മവച്ചത് കണ്ട് അവളുടെ ബോയ്ഫ്രണ്ടും എനിയ്ക്ക് ഉമ്മതന്നു...

"അവന്‍ സ്വവര്‍ഭോഗിയൊന്നുമാണെന്ന് തെറ്റിദ്ധരിയ്ക്കരുത് മഡൂ..ഞാന്‍ ഉമ്മവച്ചതിന്റെ അസൂയയാണ്.."

ഞാനും അവനും പൊട്ടിച്ചിരിച്ചു..

പ്രസവിച്ച് നാലുമാസം മാത്രം കഴിഞ്ഞ സാറയുടെ നിറഞ്ഞ മാറുചൂണ്ടി എന്നോട് അന്ന പറഞ്ഞു..

"മഡൂ നിനക്കറിയുമോ ഇവള്‍ക്ക് കുട്ടിയെ പാലൂട്ടാഞ്ഞ് ഓവര്‍ഫ്ലൊ ചെയ്യുന്നു.."

"സാറാ..ഇവള്‍ക്കിനി ബിയര്‍ കൊടുക്കരുത്.." പൊട്ടിച്ചിരികള്‍ക്കിടയില്‍ ഞാന്‍ പറഞ്ഞു..

ഗൌട്ടാണെങ്കിലും രഹസ്യമായി കോക്കില്‍ സ്വല്പ്പം ജിന്നൊഴിച്ച് അകത്താക്കിയിരുന്നു ഞാനപ്പോഴേയ്ക്കും..എങ്കിലും എനിയ്ക്ക് പോലും നാണമായി..
എന്തായാലും അന്നെനിയ്ക്ക് നല്ല ദിവസമായിരുന്നു..എല്ലാവരും നമ്മളെ വല്യകാര്യമെന്ന് പറയുമ്പോള്‍ നമുക്ക് ഇച്ചിരി നല്ല ദിവസമാകുന്നതില്‍ അത്ര കുഴപ്പമൊന്നുമില്ലല്ലോ..ഹേയ് അഹംകാരമൊന്ന്വല്ലന്നേയ്..

III)

എണ്‍പത് വയസായ ‍ ട്രേസീ വില്ല്യംസിനെ കെട്ടിപ്പിടിച്ച്, അവരുടെ കഴുത്തിലെ കാന്‍സര്‍ വൃണത്തിനു മുകളിലൂടെ, ഒരച്ഛന്‍ തന്റെ കുട്ടിയെ തഴുകുന്നത് പോലെ തഴുകി....തന്റെ പഞ്ഞിപോലെയുള്ള വെള്ളത്താടി അവരുടെ കവിളിലുരസി ഡോക്ടര്‍ ബ്രൗണ്‍ ചോദിച്ചു.."ട്രേസ് നീയിന്നെന്ത് കഴിച്ചു..നിന്നെ നല്ല സ്ട്രോ ബെറി മണക്കുന്നല്ലോ..."

" പ്രാതലിനു ശേഷം സ്ട്രോബെറി ക്രീമും ചേര്‍ത്ത് രുചിച്ചിരുന്നു..മകന്‍ കൊണ്ട് വന്നതാണ്.. അവന്റെ തോട്ടത്തില്‍ ഉണ്ടായത്"

"നീയെന്താ എനിയ്ക്ക് കുറച്ച് കൊണ്ട് വരാഞ്ഞത്.. സ്ട്റോബെറിയുടെ സീസണല്ലല്ലോ ഇപ്പോള്‍.." ബ്രൗണ്‍ പരാതി പറഞ്ഞു..

"അടുത്ത തവണയാകട്ടെ ഡോക്ക്.....നിനക്കും കൊണ്ട് വരാംട്ടോ"....എന്നോടായി പറഞ്ഞു..ഞാന്‍ ചിരിച്ചു..

ഡോക്ടര്‍ ബ്രൗണ്‍ എഴുപത് വയസ്സോളമുള്ള ഒരു വയോധികനാണ്..റിട്ടയര്‍ ചെയ്തിട്ടും പാര്‍ട്ട് ടയിം ആയി സേവനം ചെയ്യുന്നു..മാസത്തിലൊന്നോ രണ്ടോ ദിനം മാഞ്ചസ്റ്ററില്‍ നിന്ന് തീവണ്ടിയില്‍ വരും..

ഒരുദിനം പതിനൊന്ന് മണിയായിട്ടും കാണാഞ്ഞ് മൊബൈലില്‍ വിളിച്ചുകൊണ്ടിരിയ്ക്കുമ്പോള്‍ എന്റടുത്തുനിന്ന് മൊബൈല്‍ ചിലച്ചു..തിരിഞ്ഞ് നോക്കിയപ്പോള്‍ വെള്ളപഞ്ഞിത്താടിയും ആട്ടി ചിരിച്ചെന്റെ പിറകില്‍ നില്‍ക്കുന്നു..

"ഇത്രയടുത്ത് നിന്നിട്ടുമെന്നെ വിളിയ്ക്കാന്‍ നിനക്കീ സാങ്കേതികവിദ്യയെന്തിനു മകനേ.." തലയില്‍ തലോടി അപ്പൂപ്പന്‍ ചോദിച്ചു..ഞങ്ങള്‍ ചിരിച്ചു..

പെരുമാറ്റക്കാര്യത്തില്‍ അപ്പൂപ്പന്‍ സാന്റാ അപ്പൂപ്പനെക്കാളും സ്വീറ്റ് ആണ്.. അസുഖമായി വരുന്നവരെ മനുഷ്യന്മാരായി കാണുന്ന ചുരുക്കം ചിലരിരൊരാള്‍..എല്ലാവരേയും പ്രായവും ഗന്ധവും രോഗാവസ്ഥയൊന്നും കാര്യമല്ല..കെട്ടിപ്പിടിയ്ക്കും..അസുഖം വന്നയിടത്ത് പതുക്കെ തലോടും..

"നിനക്കേ ഞാനിത്തിരി റേഡിയേഷന്‍ തരാം..കുറച്ച് വേദനഗുളികകളും..വേദനയൊക്കെ പോകും..എല്ലാം ശരിയാവുമെടോ.."
മിക്കവരും ബ്രൗണപ്പൂപ്പനെ കാണാന്‍ വരുന്നത് പൊട്ടിക്കരയാനാണേന്ന് തോന്നിയിട്ടുണ്ട്..എല്ലാവരുടേയും എല്ലാ പ്രയാസങ്ങളും കേള്‍ക്കും..മക്കള്‍ കാണാന്‍ വരുന്നില്ല..നേഴ്സിംഗ് ഹോം നല്ലതല്ല...

"ഞാന്‍ മരിച്ചുപോവും ബ്രൗണ്‍.."

"ഞാനും മരിച്ചുപോകും കരോള്‍....ഒരു പക്ഷേ നിനക്കും മുന്നേ..ആ..നമുക്കീ വേദനയല്ലേ ഇപ്പൊ പ്രശ്നം..അത് മാറ്റാംടോ..അല്ലേ.." എന്നോടായി ചോദിയ്ക്കും..

ഞാന്‍ ഒന്നും മിണ്ടാതെ ചിരിയ്ക്കും..

"അതേ നിനക്ക് ആരോടെങ്കിലും പറഞ്ഞ് ഇയാള്‍ക്ക് ഇന്നുതന്നെ റേഡിയേഷന്‍ തരാക്കാമോ.?.വേറൊരു ദിവസം വരേണ്ടല്ലോ.." നട്ടെല്ലിലേക്ക് കാന്‍സര്‍ പടര്‍ന്ന ഒരപ്പൂപ്പനു വേണ്ടി ബ്രൗണപ്പൂപ്പന്‍ ചോദിച്ചു..

ശ്രമിയ്ക്കാം..ഞാന്‍ പറഞ്ഞു..

"ഷെഡ്യൂളില്‍ സ്ഥലമില്ല..മൂന്നു ദിവസം കഴിഞ്ഞേ പറ്റൂ.." മറുപടി ഞാന്‍ അതേപോലെ റിപ്പോര്‍ട്ട് ചെയ്തു..
"ഞാനവരോട് റെക്കമന്റ് ചെയ്തു നോക്കാം."

മുറിയ്ക്ക് വെളിയിലിറങ്ങിയപ്പോള്‍ എന്നോട് രഹസ്യമായി പറഞ്ഞു..
"ഞാന്‍ പറഞ്ഞാല്‍ അവള്‍ കേള്‍ക്കാതിരിയ്ക്കില്ല..എനിയ്ക്കറിയാം..ഹ ഹ"

ഒരുദിനം വിശ്രമ മുറിയില്‍, ഗോസിപ്പുകള്‍ക്കിടയില്‍ വെറുതേയിരുന്ന് എന്തോ വായിച്ച് കൊണ്ടിരുന്ന ഞാന്‍ പെട്ടെന്ന് പുസ്തകത്തില്‍ നിന്ന് മുഖമുയര്‍ത്തി ചോദിച്ചു..
"ഈ ആശുപത്രിയിലെ ഏറ്റവും നല്ല മനുഷ്യന്‍ ആരെന്നറിയുമോ?"

ആരും കുറച്ച് നേരത്തേയ്ക്ക് ഒന്നും മിണ്ടിയില്ല..വിദ്വാനു ഭൂഷണമായി മൗനം അങ്ങനെ തൂങ്ങിനിന്നു കുറച്ച് നേരം..ഒപ്പം ഇവനെന്ത് കുടുക്കിലാണപ്പാ നമ്മെക്കൊണ്ടിട്ടിരിയ്ക്കുന്നതെന്ന പറച്ചില്‍ കണ്ണൂകളിലും..

"ഡോക്ടര്‍ ബ്രൗണ്‍.".ഞാന്‍ പറഞ്ഞു..

എസ് എന്‍ കോളേജിലിരിയ്ക്കുന്ന ഞങ്ങളുടേയിടയിലേയ്ക്ക് പെട്ടെന്ന് മാനത്തൂന്ന് മോഹന്‍ലാല്‍ ഇറങ്ങിവന്നാലെന്നപോലെ എല്ലാരുമൊരുമിച്ച് ഓരിയിട്ടു..എക്സാറ്റ്ലീ കള്‍ മുഴങ്ങി..സത്യം സത്യം..

"ഞാന്‍ അദ്ദേഹത്തിനു വയസായാല്‍ - എങ്ങാനും കിടപ്പിലായാല്‍ (ഗോഷ് ..ആകാതിരിയ്ക്കട്ടേ) എന്റെ വീട്ടില്‍ കൊണ്ട് പോയി എന്റെ അച്ഛനെക്കാളും സ്നേഹത്തോടെ നോക്കും.." ജില്‍ പറഞ്ഞു..

എല്ലാരും അത് ശരിവച്ചു..എല്ലാരുടേയും വീട്ടിലേയ്ക്ക് ഒരുദിനമെങ്കിലും ബ്രൗണപ്പൂപ്പനെ കൊണ്ട് ചെല്ലണമെന്ന് പറഞ്ഞ് ആഴ്ചയിലാഴ്ചയില്‍ മാറിമാറി ബ്രൗണപ്പൂപ്പനെ നോക്കാന്‍ ജില്ലിന്റെ സമ്മതം വാങ്ങി ഗോസിപ്പുകള്‍ നിര്‍ത്തി എല്ലാരും മിണ്ടാതെയിരുന്നു..സന്തോഷത്തോടെ............

IV)

ലോര്‍ഡ് ഓഫ് ദ് റിംഗ്സിന്റെ മൂന്നു ഡീ വീ ഡി കളും കൊണ്ട് തരുമ്പോള്‍ ജമ്മ പറഞ്ഞു..
"അറിയുമോ..ഇതെഴുതിയ ജേ ജേ റ്റോക്കീന്‍ ബിര്‍മിംഹാമിലാ ജീവിച്ചിരുന്നത്..എന്റെ സ്കൂളിലാണ് അദ്ദേഹം പഠിച്ചത്.."

"ഇതിലെ ഹോബിറ്റ്സ് ഇന്നാട്ടിലെ ഗ്രാമീണരെ കണ്ട് ഉണ്ടാക്കിയ കഥാപാത്രങ്ങളത്രേ..അവര്‍ വീണ്ടും പറഞ്ഞു..

V)

ഗ്രാമസത്രത്തിലെ മുറ്റത്ത് ചാരുകസേരകളില്‍ അച്ഛനപ്പൂപ്പന്മാരും അമ്മൂമ്മമാരും അമ്മമാരും കുട്ടികളുമൊത്തിരുന്ന് ബിയര്‍ നുണയുന്നുണ്ടായിരുന്നു..ബിയര്‍ നുണയാന്‍ പ്രായമാകാത്ത കുട്ടികള്‍ ഫൂട്സ്ബോള്‍ കളിയ്ക്കുന്നു..മേശകള്‍ക്കിടയിലൂടെ നൂണ്ട് കളിയ്ക്കുന്നു..ഹാലോവീന്‍ ട്രിക്സ് ആന്റ് ട്രീറ്റുമായി ചില കുഞ്ഞുങ്ങള്‍ വന്നു..കുപ്പായക്കീശയില്‍ പ്രതീക്ഷിച്ച് സൂക്ഷിച്ച് വച്ച ചോക്കളേറ്റുകള്‍ ഞങ്ങളവര്‍ക്ക് നല്‍കി..സത്രത്തിനകത്ത് റഗ്ബി വേള്‍ഡ് കപ്പില്‍ ആരോ ജയിച്ചതിന്റെ ബഹളം..എല്ലാരും അവിടേയ്ക്ക് ഓടിച്ചെന്നു.അവരുടെ ടീമാണേന്ന് കണ്ട് നൃത്തം ചെയ്തു.സത്രമുടമയായ സര്‍ദാര്‍ജീ മധുരം വിതരണം ചെയ്തു..

ഗ്രാമസത്രത്തിലെ ചാരുകസേരകളിലൊന്നില്‍ ഓരോ കോപ്പ ബിയറുമായി ഞാനും അശോകനും ഇരുന്നു...

*******************************************

ഡിസ്ക്ലൈമറുകള്‍..

1) സംഭവങ്ങളെല്ലാം അക്ഷരം പ്രതി സത്യം.

2) ബ്രിട്ടണ്‍, നരേന്ദ്രമോഡി, പരന്ത്രീസ്, അമരക്കാ, മേരിക്കാ, ബുഷ്, ബിന്‍ലാദന്‍, സ്വരാജ് പോള്‍ , മുള്‍പ്പടര്‍പ്പ് , ഗോര്‍ദന്‍ ബ്രൌണ്‍, യുദ്ധം, ജോര്‍ജ്, ഇറാക്ക് , അഫ്ഗാനിസ്ഥാന്‍, ശൂലം , ഗര്‍ഭസ്ഥശിശു, ഗാന്ധിജി, മിത്തല്‍, കൂട്ടക്കൊല, വംശഹത്യ, റേസിസം, .....ഒന്നുമായി ഈ ബ്ലൊഗിനോ ബ്ലൊഗനോ യാതൊരു ബന്ധവുമില്ല..മടുത്തു..ചീത്ത വിളിച്ചാല്‍ കരയും..അമ്മ സത്യം

ജാലകത്തിലെ കാഴ്ച

2007-05-19T14:34:00.000-07:00

ജാലകത്തിലെ കാഴ്ചയ്ക്ക് തിരശ്ശീലയുടെ മങ്ങലാണ്

ഉയരെ കറുത്തും പൊടിപിടിച്ചുമുള്ള ആകാശത്തിന്റെ മച്ച്
നേരേ ഇരുണ്ടുറങ്ങുന്ന ഇടനാഴികളിലൂടെ
അരിച്ചിറങ്ങുന്ന വൈദ്യുതവെട്ടവുമായി ഒരു ഭീമന്‍

നടുവിലൂടെ രണ്ടറ്റവുമില്ലാത്ത നീളന്‍ വയറുകള്‍
ഇടയ്ക്കെപ്പൊഴോ മിന്നിമറയുന്ന പ്ലാസ്റ്റിക് കൂടുകള്‍

ചില്ലുകളില്‍ തുള്ളിയുറയുന്ന നിയോണ്‍ വിളക്കുകള്‍
കണ്ണൂകളായ് ചില മഴത്തുള്ളീകള്‍

താഴേയെവിടേയോ പേ പാഞ്ഞു പോയ ഒരു വണ്ടി

മങ്ങലിലൂടേ നടന്നുകയറുന്ന ഒരു രാത്രിഷിഫ്റ്റുകാരന്‍
പടിയിലെവിടേയോ ഉരുണ്ടു വീഴുന്നു

അകത്ത് തണുപ്പ് തന്നെ ..ചെറിയ മൂളല്‍ മാത്രം..

സ്പിരിട്ടില്‍ ചേര്‍ത്ത വിഷം അഥവാ ദൈവത്തിന്റെ ആത്മഹത്യ

2007-05-14T08:09:00.000-07:00

ഇഞ്ചിയേച്ചിയുടെ ബ്ലോഗില്‍ കമന്റായിട്ടത്..കമന്റുകള്‍ ബ്ലോഗുടമയുടെ സ്വന്തമായതിനാല്‍ ഇഞ്ചിയേച്ചിയില്‍ നിന്ന് ഒരു വക്കീലുനോട്ടീസ് പ്രതീക്ഷിയ്ക്കാം..എന്റെ ചെക്കുകേസുകള്‍ നോക്കാന്‍ സ്ഥിരം വക്കീലിനെ നിയമിച്ചതില്‍ പിന്നെ എനിയ്ക്ക് വക്കീലു നോട്ടീസെന്നാല്‍ ഒന്നുമില്ല....ഹും..:)

സ്പിരിട്ടില്‍ ചേര്‍ത്ത വിഷം അഥവാ ദൈവത്തിന്റെ ആത്മഹത്യ

ആദിയില്‍ ദൈവം അമിനോ ആസിഡുകളെ സൃഷ്ടിച്ചു

അവന്മാര്‍ക്ക് പ്രത്യേകിച്ച് യാതൊരു സൂക്കേടുമുണ്ടായിരുന്നില്ല

ദൈവത്തിന് തൃപ്തിയായില്ല.

(പുള്ളിയ്ക്ക് എന്തെങ്കിലും പണി വേണമല്ലോ)

പിന്നീട് അദ്ദേഹം ബാക്റ്റീരിയാകളേയും അമീബകളേയും സൃഷ്ടിച്ചു..

അവ വിഭജിച്ച് പുതിയ തലമുറകളുണ്ടായിഡിഷു നിറഞ്ഞു കോളനികളായി..

ദൈവം സന്തുഷ്ടനായി..വീട്ടില്‍ പോയിക്കെടന്നുറങ്ങി..

അടുത്ത് നോബേലെനിയ്ക്ക്..ആഹാ..

ചെല ക്ണാപ്പന്‍ ബാക്റ്റീരിയമാരുണ്ടായിരുന്നു.

(ആബേലെന്നു പേര്‍ മറ്റവന്‍ കായേനും)

അവന്മാരു ചേര്‍ന്നു നിന്ന് കെട്ടിപ്പിടിച്ചു..

എല്‍റ്റണ്‍ ജോണിന്റെ സന്തതികള്‍..

ദൈവത്തിന് ആകെ കലിപ്പായി..

ഡിഷുകളെല്ലാം പുള്ളി കൊടുംകാറ്റിനെ വിട്ട് തല്ലിപ്പൊട്ടിച്ചു..

മൂന്നുനാലു ദിവസം വെള്ളമടിച്ച് ഫിറ്റായി നടന്നു..

ഒറക്കത്തില്‍ പുള്ളിയൊരു സ്വപ്നം കണ്ടു..

രാവിലെ ദൈവം അമ്പലത്തിപ്പോയി കുളിച്ച് പ്രാര്‍ത്ഥിച്ചു..

"പുതിയ പ്രൊജക്റ്റാണ്..തള്ളെ, വെഷമങ്ങളൊണ്ടാക്കരുത്..അല്ലേ ഞാന്‍ സ്പന്ദമാപിനികളേ നന്ദിയെഴുതും.."

ഒരു ബാക്റ്റീരിയയെ പുള്ളി പെറ്റ്ഡിഷിലെടുത്തു..

കൊഴലിലൂടെ നോക്കി..(സൊയമ്പന്‍ .. കൊള്ളാം..)

അവനെ മുറിച്ച് സര്‍ജറി തുടങ്ങിപാവം പിടഞ്ഞ് പിടഞ്ഞ്..

(പെറ്റ തള്ള സഹിയ്ക്കൂല കേട്ടാ..)*

പറ്റുന്നില്ല കൈവെറ..കൈവെറ...തുന്നിക്കൂട്ടി..

കൊറച്ച് ഡ്രിപ്പ് കൊടുത്ത് അവനെ ഒറക്കിക്കെടത്തി..

ഷിവാസ് റീഗല്‍ അങ്ങോര്‍ക്കന്ന് ഇഷ്ടപ്പെട്ടില്ല..

കത്തിയ്ക്കാന്‍ വച്ചിരിയ്ക്കുന്ന സ്പിരിറ്റ് കണ്ടു..യുറേക്കാ...

നൂറെടുത്ത് സ്വല്പ്പം കുരുമുളകുപൊടി കാന്റിനീന്ന് വരുത്തിനീറ്റായി...

ഹാ..കൈവെറ നിന്ന്..അവനെ വീണ്ടും മുറിച്ച്..

അവന്റെ ഡി എന്‍ എ യില് ചെറിയോരു പണി നടത്തി..

ഒരു ക്രോമസോം അങ്ങോട്ട് ഒരു ക്രോമസോം ഇങ്ങോട്ട്

തുന്നിക്കൂട്ടി അവനൊരുവന്‍ രണ്ടായി..

അവനൊരുവനും അവളൊരുവളും..

പണികൊട്ത്ത്..ദൈവത്തിന് സന്തോഷമായി..

കുറേ നാളുകള്‍ക്ക് ശേഷം..(മനോഗതം പോലെ ഒരു പാട്ടു വേണമെങ്കിലത്..)

കുറ്റാക്കൂരിരുട്ട് ..പ്രേതമില്ലൈ പിശാചില്ലൈ..നടക്കാനിറങ്ങിയ ദൈവം ആ കാഴ്ചകണ്ടു

അവനവളും അവളവനും ..ശ്ശെ എങ്ങനെ ഞാനത് പറയും..?

ദൈവം ഹാപ്പിയായി..ഇന്‍ഫ്രാറെഡ് കാമറയാല്‍ അത് പകര്‍ത്തി..

(പ്രബന്ധത്തിനു തെളിവു വേണ്ടേ)

(പൊര്‍ണോഗ്രാഫി അന്നാണ് തുടങ്ങിയതെന്നും അല്ലെന്നും അഭിപ്രായങ്ങളുണ്ട്)

കളഞ്ഞുപോയ ക്രോമസോം തിരയുകയാണ്..

കൊച്ചു ഗള്ളാ(ള്ളീ)

പരിണാമത്തിന് ദൈവം ഓര്‍ഡര്‍ കൊടുത്തു..

(ചാല്സ് ഡാര്വിന്‍ പുള്ളിയെ ബ്രൈബു ചെയ്തതാണേന്ന് ചെല പാതിരിമാര്‍ പറയുന്നത് വെറുതേ..പുള്ളി നേരിട്ടങ്ങ് ഓര്‍ഡര്‍ കൊടുക്കുവാരുന്നു)

കൊറെനാളു കഴിഞ്ഞു..(വീണ്ടും ഒരു പാട്ടിനൊള്ള സ്കോപ്പ്)

ഒരു തീവണ്ടി..മഞ്ഞുള്ള ഒരു പ്രഭാതത്തില്‍ ..

കറങ്ങുന്ന ചക്രത്തിന്റെ ക്ലോസപ്പ്..

സാരിത്തലപ്പുകൊണ്ട് അവളന്നാദ്യമായി മറച്ചു..

അവളാണവനാ പഴം കൊടുത്തത്..എന്നിട്ടും..

ദൈവത്തിനു പിന്നെയും കലിപ്പായി..

സ്പിരിറ്റില്‍ വെഷം ചേര്‍ത്ത് അങ്ങേരന്ന് ആത്മഹത്യ ചെയ്തു..

(അതിനു ശേഷമാണത്രേ സ്പിരിറ്റില്‍ വെഷം ചേര്‍ക്കാന്‍ തുടങ്ങിയത്..)

ചുള്ളിക്കാടിനൊരു വികാരി കമന്റ്

2007-04-15T05:46:00.001-07:00

ശ്രീമാന്‍ ബാലചന്ദ്രന്‍ ചുള്ളിക്കാ‍ട് ഇങ്ങനെയൊരു പോസ്റ്റിട്ടു..

ദേവേട്ടന്‍ അതിമനോഹരമായും ശാസ്ത്രീയമായും അഭിപ്രായങ്ങള്‍ പറഞ്ഞ് ഇങ്ങനെയൊരു മറുപടിയുമിട്ടു..

എന്റെ മറുപടി വികാരപരം മാത്രമായതു കൊണ്ട് കമന്റ് മോഡറേഷന്‍ നിലനില്‍ക്കുന്നിടത്ത്(അല്ലാത്തിടത്തും) പുല്ലുവിലയായതിനാല്‍..ഈ പോസ്റ്റ്..

സംഭവം വികാരപരം തന്നെ..ആ വികാരം ഇപ്പഴും നിലനില്‍ക്കുന്നതു കൊണ്ട് ..രക്തങ്ങളിങ്ങനെ തെളക്കണത് കൊണ്ട് മുറിക്കകത്തിരുന്നെങ്കിലും ഒന്നു കൂക്കിവിളിയ്ക്കണ്ടേ...അല്ലേ നാളേ എനിയ്ക്ക് വീണ്ടും ഗൌട്ട് കൂടും..
------------------------------------------------------------------------

“കാഷ്മീരിന്റെയും സിക്കിമിന്റെയും സ്വാതന്ത്ര്യം”

ചേട്ടാ.. മലയാളത്താനും തമിഴനുമൊന്നും സ്വാതന്ത്ര്യം വേണ്ടേ..എന്തിന് സിക്കിമനും കാശ്മീരനുമായി നിര്‍ത്തിക്കളഞ്ഞത്?വേണ്ടവനെല്ലാം സ്വാതന്ത്ര്യം വാങ്ങിച്ചോണ്ട് പോട്ട്..എന്തിനാണ് മന്മോഹന ആന്റണി കലാം സാറന്മാരൊക്കെ ഇതിങ്ങനെ കെട്ടിപ്പിടിച്ചിരിയ്ക്കണതോ ആവോ..വരീം സ്വാതന്ത്ര്യം വാങ്ങിച്ച് പോവീം..

കഷ്ടമായിപ്പോയി ആ പാവം രാമസാമിയെ ചെവിമുറിച്ച് കടത്തിയത്..എന്തരായാലും പപ്പനാവദാസന്‍ പരണം നടത്തിയപ്പൊഴൊള്ള വികസനമൊക്കെയേ ജനകീയജനാധിപത്യ ഗോസായി കേന്ദ്രനും ബൂര്‍ഷ്വാ പെറ്റിബൂര്‍ഷ്വാ സംസ്ഥാനനും മാറിമാറി എരന്ന് നെരങ്ങിയിട്ടിവിടേയൊക്കെ ഉണ്ടായിട്ടുള്ളൂ..പിന്നെന്തിനീ കഷ്ടപ്പെട്ട് ഫെഡറല്‍ ജനാധിപത്യത്തിന് ചൂട്ടു പിടിയ്ക്കണത്?

അല്ല ആരാണാവോ ഈ കാശ്മീരന്‍..സ്വാതന്ത്ര്യം വേണ്ടവന്‍? അഫ്ഗാനില്‍നിന്ന് ലോകം ചുട്ടെരിയ്ക്കാന്‍ ബുഷിനോടൊപ്പം കള്ളനും പോലീസും കളിച്ച് മെനക്കെട്ട് നടക്കുന്ന മഹാന്മാരോ..ഹാ..
ആ പണ്ഡിറ്റുകളേവിടേ ..നേരേനിന്ന് അവന്റെ മൊഖത്തുനോക്കിയിതൊന്നു പറയാമോ..പല്ലു നാലെണ്ണം കാണില്ല..നമുക്ക് അവനെ തിരിച്ചു തല്ലാമാരിയ്ക്കും..അത്രേ പറ്റൂ

ഈ മാസത്തെ എക്കണോമിസ്റ്റില്‍ ഒരു ബൂര്‍ഷ്വാ ലേഖനം കണ്ടിരിയ്ക്കണ്.(സംഭവം നല്ല ഒന്നാംക്ലാസ് ബൂര്‍ഷ്വാ ലേഖനം തന്നെ..)ലൈന്‍ ഓഫ് കണ്ട്രോളിനപ്പൊറത്തുള്ള ഏരിയായിലെ ചെല നടപടികളെപ്പറ്റി..അതൊക്കെ ഇങ്ങപ്പുറത്ത് നൂറനാട്ടും കരുനാഗപ്പള്ളിയിലും വരെ കണ്ടിരിയ്ക്കുന്നതുകൊണ്ട് എനിയ്ക്ക് എക്കണോമിസ്റ്റ് സായിപ്പിന്റെ അത്യല്‍ഭുതപരന്ത്രതയൊന്നും വായിച്ചപ്പൊ തോന്നിയില്ല.... . വായിച്ചത് ശരിതന്നേ എന്ന് നിങ്ങള്‍ വായിച്ച് ശരിവച്ച് പറഞ്ഞാല്‍ മതി..

അഭയാര്‍ത്ഥിയെകാണുമ്പോഴും മെറൂണ്‍ കണ്ണാടി..കോള്ളാം ദമ്മയുടെ പുതിയ അവതാരങ്ങള്‍..:)

വിഷാദ തീരം

2007-03-19T16:13:00.000-07:00

കേളി കൊട്ട്..

തിരശ്ശീല ഉയരുന്നു

(ശൂന്യമായ രംഗവേദി..കടും നിറത്തിലുള്ള തിരശ്ശീലകൊണ്ട് വശങ്ങളും തൂവെള്ള തിരശ്ശീല കൊണ്ട് പിന്‍ഭാഗവും മറച്ചിരിയ്ക്കുന്നു..രംഗവേദിയുടെ പിന്‍ഭാഗത്ത് അഗ്നിനാളങ്ങള്‍ വരമ്പിട്ടിരിയ്ക്കുന്നു..
നേരിയ കാറ്റിന്റെ ശബ്ദം..വൃശ്ചിക മാസത്തിലെ സന്ധ്യയ്ക്ക് വരുന്ന പോലെയുള്ള ഉലഞ്ഞ കാറ്റ്....
ഒരു വലിയ ആട്ടവിളക്കു മാത്രം കത്തുന്നുണ്ട്..അതിന്റെ നേരിയ മഞ്ഞ വേളിച്ചം വേദിയ്ക്ക് മുഴുവനുമൊരു പഴകിയ പകര്‍ച്ച തോന്നിയ്ക്കുന്നു..

കാ‍റ്റിന്റെ ശക്തി കൂടി വരുന്നു..

പിടിച്ചുനില്‍ക്കാനാവാതെ ആട്ടവിളക്കിലെ തിരി അണയുന്നു.......കാറ്റിനനുസരിച്ച് ചെണ്ടയുടെ മുറുകിയ താളം..

ഇരുട്ട്...

പതിയെ ...ചെണ്ട അയയുന്നു..നേരിയ ഒരു മര്‍മ്മരമായി ...എവിടേയോ....)

"ഇത് വിഷാദ തീരം..സകല ലോകങ്ങളിലുമുള്ള വിഷാദരുടെ ഏകാന്ത തീരം..ഇവിടെ പുഷ്പങ്ങള്‍ക്ക് ഗന്ധമില്ല, കാറ്റിനു തണുപ്പില്ല, അഗ്നിയ്ക്ക് താപവുമില്ല....ഇവിടെ ഏകാന്തത മാത്രം..അല്‍പ്പം ക്രൂരമെന്നു തോന്നാവുന്നതു തന്നെ..........എന്തുചെയ്യാം..മനസ്സുകളിലേയ്ക്കായിരം ശരങ്ങളെപ്പോലെ....മരവിച്ച ഏകാന്തത...."

തംബുരുവിന്റെ ശ്രുതി.........

കുതിരക്കുളമ്പടികള്‍ ..ശംഖുകള്‍ ഒന്നൊന്നായി മുഴങ്ങുന്നു..ഭേരികള്‍ ..യുദ്ധത്തിന്റേതായ വാദ്യഘോഷം..എല്ലാം പതിഞ്ഞ ശബ്ദത്തില്‍...

അര്‍ജ്ജുനന്‍: "അച്യുതാ..ഇതൊരു മഹായുദ്ധം തന്നെ ...ദുര്യോധനാദികളുടെ പക്ഷത്തുനില്‍ക്കുന്നവരാരൊക്കെയാണ്? നമ്മുടെ പക്ഷത്തും ആരൊക്കെയുണ്ട്?..എല്ലാം വ്യക്തമായി കാണാനൊരു തോന്നല്‍...രഥം ഇരു സൈന്യങ്ങളുടേയും മധ്യത്തിലായി നിര്‍ത്തിയാലും...."
രഥം നീങ്ങുന്ന ശബ്ദം..

കൃഷ്ണന്‍: അര്‍ജ്ജുനാ..ഇതാ കണ്ടുകൊള്ളൂ..

പതിഞ്ഞ ശബ്ദത്തിലായിരുന്ന വാദ്യങ്ങള്‍ ഉച്ചസ്ഥായിയിലാകുന്നു...മുറുകിയ ഡ്രമ്മുകളുടേയും ചെണ്ടയുടേയും താളം...വയലിന്റെ നേരിയ നാദം..
വേദിയിലെ ഇരുട്ടില്‍ പതിയെ ഒരു സ്പോട്ട് ലൈറ്റ് തെളിയുന്നു....അര്‍ജ്ജുന്റെ മുകളില്‍ വെളിച്ചം...പതിയെ തെളിയുന്ന വെളിച്ചം അടുത്ത പറച്ചിലവസാനിയ്ക്കുമ്പോഴേ മുഴുവനായി തെളിയിയ്ക്കുകയുള്ളൂ..

അര്‍ജ്ജുനന്‍:"സര്‍വേശ്വരാ...എന്താണ് ഞാനീ കാണുന്നത്?..(ചുറ്റും നോക്കുന്നു.......)
വിഷാദത്തിന്റെ അഗ്നിയിലേയ്ക്ക് എന്നെത്തന്നെ ദ്രവ്യമായി ആഹൂതി ചെയ്യുവാന്‍ നീ നിശ്ചയിച്ചിരിയ്ക്കുന്നുവോ?..എന്താണിത്?

ഒരുവശത്ത് എങ്ങുമെത്താതെ കിടക്കുന്ന പച്ചപ്പും മറുവശത്ത് അഗ്നികാളുന്ന പെരുവഴിയും..സഖാവേ..വാസുദേവാ..നൈരന്തര്യങ്ങളുടെ പച്ചപ്പോ..ആത്മാഹൂതിയുടെ വഴിപിരിവോ എവിടെയാണ് ഞാന്‍?..ഈ ദശാസന്ധിയില്‍ ഞാനേകനാണല്ലോ...

മാധവാ.....

അങ്ങെവിടെയാണ്?കര്‍മ്മചക്രത്തിലൂടേ മരണത്തിന്റെ വിധി നടപ്പാക്കേണ്ടുന്ന യമദൂതന്മാരുടെ കൂട്ടത്തിലാണോ നീയെന്നെയിരുത്തുന്നത്?

ഹാ...അനശ്വരമെന്നു കരുതി.. നശ്വരമായ രാജ്യത്തിനും കീര്‍ത്തിയ്ക്കും വേണ്ടി ഞാനാരെയൊക്കെ കൊലപ്പെടുത്തണം...? ഭഗവാനേ...

സ്നേഹമയിയായ പിതാമഹന്റെ "മകനേ" എന്ന വിളിയെന്റെ കാതില്‍ മുഴങ്ങുന്നു..ധനുര്‍വിദ്യയുടെ മര്‍മ്മമെന്നെയറിയിച്ച ഗുരുവരന്റെ നേര്‍ക്കു തന്നെ ഞാന്‍ ശരങ്ങളെയ്യണമോ...

ഞാനശക്തന്‍.....

അവരുടെ കണ്ണുകളിലിപ്പോഴും എന്നെച്ചൊല്ലി കാരുണ്യം മാത്രം..എന്തിനീ ഭ്രാതൃഹത്യ..?
ലോകമെന്നെ പഴിയ്ക്കും...കൊലയാളിയെന്ന് മുദ്രചാര്‍ത്തും..ഞാനിതു ചെയ്താല്‍ ഒരുപക്ഷേ ധര്‍മ്മം തന്നെ ലോകം വിട്ടുപോകും..സമൂഹം നാശത്തിലേയ്ക്ക് കൂപ്പുകുത്തും..
എന്തു സുഖം നേടാനാണിത്?

സുഖം ദുഖത്തിലവസാനിയ്ക്കുന്നു..കീര്‍ത്തി മരണത്തിലും...

രക്തപങ്കിലമായ ഈ രാജ്യം എനിയ്ക്കു വേണ്ടാ.....പ്രഭോ....

എന്റെ കയ്യുകള്‍ തളരുന്നു..ദേഹമാസകലം എരിയുന്നു..ഇതിലും നല്ലത് മരണമാണ്..മരണം....

(ആവനാഴിയില്‍ നിന്ന് അമ്പുകള്‍ താഴെ വീഴുന്നു...വില്ലില്‍കുത്തി അര്‍ജ്ജുനന്‍ തറയിലിരിയ്ക്കുന്നു....
കാറ്റടിയ്ക്കുന്നതിനോടൊപ്പം വേദിയ്ക്ക് പിറകിലുള്ള അഗ്നിനാളങ്ങള്‍ നിറഭേദത്തോടെ ആളുന്നു..വേദിയുടെ മറുവശത്ത് ചെറിയെ വെളിച്ചം തെളിയുന്നു
സിംഹാസനാരൂഢനായ സിദ്ധാര്‍ത്ഥന്‍ ...മുഖം കുനിച്ച് വിഷാദഗ്രസ്ഥനായിരിയ്ക്കുകയാണ്..ഇരുവരും പരസ്പരം കാണുന്നു..വെളിച്ചം വേദിമുഴുവന്‍ വ്യാപിയ്ക്കുന്നു...)

അര്‍ജ്ജുനന്‍: അങ്ങാരാണ് ? എന്റെ സുഹൃത്ത് വാസുദേവന്റേതുപോലെ തേജോമയമായ മുഖം....ഈ ഏകാന്തതയില്‍ എനിയ്ക്കല്‍പ്പം ആശ്വാസം തോന്നുന്നു...

സിദ്ധാര്‍ത്ഥന്‍: ഞാന്‍ ലിച്ചാവിയിലെ ശുദ്ധോധനമഹാരാജാവിന്റെ പുത്രന്‍..സിദ്ധാര്‍ത്ഥന്‍.
.
അര്‍ജ്ജുനന്‍: ലിച്ചാവിയോ?..അതെവിടെയാണ്?

സിദ്ധാര്‍ത്ഥന്‍: ഏകാന്തതയുടെ ഈ വിഷാദ തീരത്തില്‍ കാലദേശങ്ങളില്ല പാര്‍ത്ഥാ....അതൊക്കെ തുഴഞ്ഞുകടന്നാണ് നാവിവിടെയെത്തുന്നത്..ഏകാന്തതയുടെ തടവിലാണ് നാമിവിടെ..അറവുമാടുകളുടെ ചാപ്പ പോലെ വ്യര്‍ത്ഥമായ നാമങ്ങളുമായി നാമിവിടെ സഞ്ചരിയ്ക്കുന്നു...എന്നും സഞ്ചരിയ്ക്കാം...ഇവിടുന്ന് രക്ഷപെടാന്‍ ശ്രമിയ്ക്കാതിരുന്നാല്‍...

അര്‍ജ്ജുനന്‍:രക്ഷപെടേണ്ടെനിയ്ക്കിവുടുന്ന്..ആയുധങ്ങളുടെയിടയില്‍ ബുദ്ധിയെ ആയുധപ്പുരയാക്കിയവനാണ് ഞാന്‍...ധര്‍മ്മം ധര്‍മ്മപുത്രര്‍ക്ക് ചൂതുകളിയ്ക്കാന്‍ തീറെഴുതിക്കൊടുത്ത ഷണ്ഡന്‍....വയ്യ....രക്ഷപെടേണ്ടെനിയ്ക്കിവുടുന്ന്...

സിദ്ധാര്‍ത്ഥന്‍: ആയുധങ്ങളുടേ ലക്ഷ്യം തന്നെ മുറിവേല്‍പ്പിയ്ക്കുകയാണ്..എടുക്കുന്നവനും കൊള്ളുന്നവനും മുറിവേല്‍ക്കും...

(ആത്മഗതമായി) പണ്ടേ ഞാനിതു മനസ്സിലാക്കിയിരുന്നു...രാജ്യഭാരവും സുഖലോലുപതയുമെല്ലാം ഒരുതരം ആയുധങ്ങള്‍...യശോധരയുടെ മിഴികളും രാഹുലന്റെ പുഞ്ചിരിയുമെല്ലാം..എല്ലാം..(അര്‍ജ്ജുനനോടായി)

ആയുധങ്ങളുപേക്ഷിയ്ക്കാന്‍ കഴിയുന്നതൊരു ഭാഗ്യമാണര്‍ജ്ജുനാ....

അര്‍ജ്ജുനന്‍:ഭാഗ്യം തന്നെ...വാസുദേവകൃഷ്ണന്‍ ആയുധങ്ങളുപേക്ഷിച്ചവനാണ് സിദ്ധാര്‍ത്ഥാ...എന്നെ ഈ തീരത്തിലൊറ്റയ്ക്കാക്കി എവിടേയോ മറഞ്ഞിരിയ്ക്കുകയാണാവന്‍...അവനെന്നുമങ്ങനെതന്നെയാണ്..നമുക്കെന്നും അവന്‍ മായാവിയാണ്...
എല്ലാം എന്റെ തെറ്റുകള്‍ മൂലമാണ്....

സിദ്ധാര്‍ത്ഥന്‍: തെറ്റും ശരിയുമെല്ലാം ആപേക്ഷികമായ ചില സങ്കല്‍പ്പങ്ങളല്ലേ പാര്‍ത്ഥാ.........തെറ്റ്.......ശരി..

(അല്‍പ്പ നേരം വിദൂരതയിലേക്ക് നോക്കി..നിശബ്ദത...പിന്നീട്..ഒട്ടൊന്ന് ചിന്തിച്ച് )

ശരിയും തെറ്റും ധര്‍മ്മവും അധര്‍മ്മവുമൊക്കെ വിധിയ്ക്കുന്ന വൈദികമതത്തിലല്ലേ ചാതുര്‍വരേണ്യമുള്ളത്....
ചിലര്‍ക്കു ശരിയും ചിലര്‍ക്കു തെറ്റും..കര്‍മ്മം ....കര്‍മ്മഫലം...

ജനിമൃതികളുടെ പരമ്പരയില്‍ചിലര്‍ക്കു മാത്രംസ്വര്‍ണ്ണത്തളികയില്‍ അമൃതേത്തുണ്ണുവാനുള്ള ഭാഗ്യം കൈവന്നതെന്തു ശരി മൂലമാണ്?മണ്‍കുടിലില്‍ മേല്‍ക്കൂരയിലൂടെ ആകാശം കണ്ട് പട്ടിണി കിടക്കുന്നവരുടേ തെറ്റെന്താണ്?ഈ പുരോഹിതരും മഹാപ്രഭുക്കളും സൃഷ്ടിച്ച മതില്‍ക്കെട്ടുകള്‍ നിലനില്‍ക്കുന്നതാരുടെ തെറ്റു മൂലമാണ്?

പ്രകൃതിയ്ക്ക് നീതിബോധമൊന്നുമില്ല അര്‍ജ്ജുനാ...എല്ലാം വെറും തോന്നല്‍ മാത്രം...

(രണ്ടുപേരും അല്‍പ്പനേരം ആ തീരത്തിലെ പാറമേലിരിയ്ക്കുന്നു...വിദൂരതയിലേയ്ക്ക്......ചക്രവാളത്തിലേക്ക് നോക്കിക്കൊണ്ട്..)

സിദ്ധാര്‍ത്ഥന്‍: (ഒരു നെടുശ്വാസത്തോടെ)...നാമിവിടെ ഈ വിഷാദതീരത്തിലെത്തിയത് മനസ്സിനുള്ളിലെ അഗാധമായ ചുഴി കാരണമാണര്‍ജ്ജുനാ..
ഇതിനപ്പുറം പോകണം.നാം ഒറ്റയ്ക്കേ പറ്റുകയുള്ളൂ.....ധനവും സുഖവും പണ്ടേ ത്യജിച്ചതാണ്..പക്ഷേ യശോധരയും രാഹുലനും..ഞാനശക്തനാണ്..

അര്‍ജ്ജുനന്‍:സുഖവും ധനവും ത്യജിയ്ക്കാം സിദ്ധാര്‍ത്ഥാ...പക്ഷേ..കീര്‍ത്തി..എന്നെ എങ്ങോട്ടേയ്ക്കോ പിടിച്ചുവലിയ്ക്കുന്ന ബന്ധങ്ങള്‍..
നോക്കൂ..ഇത് ധര്‍മ്മയുദ്ധ ഭൂമിയാണ്.....
പക്ഷേ കാലങ്ങളിലൂടെ കടന്നുപോകുമ്പോള്‍ ..ശവങ്ങളുടേ കൂമ്പാരം..
യോദ്ധാക്കളും യുദ്ധമൃഗങ്ങളും മാത്രമല്ല...സ്ത്രീകള്‍ ......
ഒന്നുമറിയാത്ത കുഞ്ഞുങ്ങള്‍..
ജനിച്ചിട്ടുപോലുമില്ലാത്ത ഭ്രൂണങ്ങള്‍..
യുദ്ധത്തിന്റെ നീ‍തിശാസ്ത്രവും അര്‍ത്ഥശാസ്ത്രവും അറിയാത്തവര്‍..
ശവങ്ങളെപ്പോലും സുരതത്തിനുപയോഗിയ്ക്കുന്നവര്‍..
പുഴുവാര്‍ക്കുന്ന ശവങ്ങളില്‍ നിന്ന് വരെ ധനവും ആഭരണങ്ങളും തേടുന്നവര്‍....

ഒരിടത്ത് എല്ലാ ധര്‍മ്മവും കളഞ്ഞ് ഭക്ഷണപ്പൊതിയ്ക്കുള്ളില്‍ത്തന്നെ ആയുധങ്ങള്‍ നിറച്ച് ആകാശത്തുനിന്ന് വര്‍ഷിയ്ക്കുന്നു....മാസങ്ങളോളം പട്ടിണിയായവര്‍ ചാകുമെന്നറിഞ്ഞ് തന്നെ അതിനിടയിലെ ഭക്ഷണത്തിനായി കടിപിടി കൂടുന്നു..
.ഇതൊക്കെ കണ്ടിരിയ്ക്കുന്ന ശവംതീനികള്‍..
നീ പറഞ്ഞത് സത്യം തന്നെ സിദ്ധാര്‍ത്ഥാ..പ്രകൃതിയ്ക്ക് യാതൊരു നീതിബോധവുമില്ല...
വയ്യ എനിയ്ക്കിനി വയ്യ....

സിദ്ധാര്‍ത്ഥന്‍:എന്റെ നഗരയാത്രയില്‍ ഞാനൊരു കാഴ്ചകണ്ടു...വൃണങ്ങള്‍ പുഴുവാര്‍ക്കുന്ന ഒരു പടുവൃദ്ധന്‍..ചണ്ഡാലനാ‍യതു കാരണം നഗരത്തിലെ ആതുരാലയങ്ങളില്‍ അദ്ദേഹത്തിനു പ്രവേശനമില്ലത്രേ...അയാളുടെ ദേഹം പച്ചയ്ക്ക് പക്ഷികള്‍ കൊത്തിവലിയ്ക്കുന്നു..ഒന്നു കൊന്നുതരൂ എന്നാണയാള്‍ നിലവിളിയ്ക്കുന്നത്..മരണം പോലും കരുണയാവുന്ന നിമിഷങ്ങള്‍...ഹൊ......
കാലങ്ങളില്‍ ചണ്ഡാലന്റെ നിര്‍വചനങ്ങള്‍ക്കേ മാറ്റമുള്ളൂ....ഹും..ഹ..ഹ(ചിരിയ്ക്കുന്നു)
ഇല്ലാ‍ത്തവനെന്നും ചണ്ഡാലന്‍..എന്നും.....

എന്റെ കാഴ്ചകളെ മറയ്ക്കുന്ന അധികാരമെന്ന പിതാവുണ്ടായിട്ടുകൂടി ഞാനിതു കണ്ടു...ഇതുമാത്രം..
സത്യമെത്ര ഭീകരമായിരിയ്ക്കും....?എത്ര ദയനീയമായിരിയ്ക്കും?

ചെറുപ്പത്തില്‍ ഞാന്‍ കോട്ടമുകളില്‍ നിന്ന് താഴോട്ട് നഗരത്തിലേയ്ക്ക് നോക്കാറുണ്ടായിരുന്നു...പുഴുക്കളെപ്പോലെ ഞവിയ്ക്കുന്ന കോടാനുകോടി മനുഷ്യര്‍..നാമെന്താണിങ്ങനെ? എവിടേയ്ക്കാണ് നാമീ പായുന്നത്?
എല്ലാം ...എല്ലാം മരണത്തിലവസാനിയ്ക്കുന്നു..നാമതോര്‍ക്കാറുണ്ടോ?ഓര്‍ത്താലും മനസ്സില്‍ അതിനെ അംഗീകരിയ്ക്കില്ല..നാം മാത്രം മരിയ്ക്കില്ല എന്നാണോ?
എല്ലാവരും മരിയ്ക്കും..പിന്നെ എന്തിനു ജനിച്ചു?...ഒന്നിനും ഉത്തരമില്ലാത്തതുപോലെ..
ചോദ്യങ്ങള്‍ ചോദിയ്ക്കാതിരുന്നാലുത്തരമെന്തിന്...പക്ഷേ..ചോദിച്ചു പോകുന്നു..
അത് ..ചോദ്യം ചോദിയ്ക്കല്‍ മനുഷ്യപ്രകൃതിയാണ്...

അര്‍ജ്ജുനന്‍: മനുഷ്യപ്രകൃതി വളരെയേറെ വിചിത്രമാണ് ശുദ്ധോദനപുത്രാ..എല്ലാവരുടേയും പ്രകൃതം ഒന്നിനൊന്ന് വ്യത്യാസം..എന്നാലും പൊതുവായൊരു കെട്ടുപാടുള്ളതുപോലെ..എന്തോ..ഈ ലോകം വളരെയേറെ വിചിത്രം..
സിദ്ധാര്‍ത്ഥന്‍:വിചിത്രം മാത്രമല്ല..വ്യര്‍ത്ഥവും കൂടെയാണ്..എല്ലാം വ്യര്‍ത്ഥം..ഞാന്‍ യാത്രയാവുകയാണ്..ജനിമൃതികള്‍ക്കുത്തരം തേടി..ശരിതെറ്റുകള്‍ക്കുത്തരം തേടി..സുഖദുഖങ്ങള്‍ക്കുത്തരം തേടി..ഇനിയൊരു തിരിഞ്ഞ് നോക്കില്ല...
പാര്‍ത്ഥാ..ചോദ്യങ്ങളില്ലാത്ത ഉത്തരങ്ങള്‍ നമ്മെ കാത്തിരിയ്ക്കുന്നു..അവനവനുള്ള വഴി അവനവന്‍ തന്നെ കണ്ടെത്തേണ്ടിയിരിയ്ക്കുന്നു...

അര്‍ജ്ജുനന്‍: ഹേ..യോഗീശ്വരാ..മാധവാ...അവനെവിടേയോ പോയിമറഞ്ഞു നില്‍ക്കുന്നുവല്ലോ...കൃഷ്ണാ..ഈ തീരത്ത് ഞാനേകനാവുകയാണല്ലോ....മഹാഗുരോ..എനിയ്ക്കു ഭ്രാന്തു പിടിയ്ക്കുന്നു..പ്രാണനാഥാ..മുരഹരേ..നീയെവിടെ..(കരയുന്നു....)പരമാത്മസ്വരൂപനേ...എനിയ്ക്കിനി ഒരു നിമിഷം പോലുമീ നരകത്തില്‍ വയ്യ...നീയില്ലെങ്കില്‍ ഈ ജന്മം വ്യര്‍ത്ഥം.....(ഭ്രാന്തനെപ്പോലെ)..ഹാ...രാമാ...ഹരേരാമാ...നാരായണാ...നാരായണാ..(.ആ നാമത്തിലെന്തോ സുഖം വന്നപോലെ കണ്ണടച്ച് ) നാരായണാ..നാരായണാ......

തംബുരു.....ഓംകാരധ്വനിയോടെ ശ്രുതിയിലിഴചേര്‍ന്ന്.....

അര്‍ജ്ജുനന്‍.:ഹാ...അവനെത്തി..അതേ..അതവന്‍ തന്നെ..സിദ്ധാര്‍ത്ഥാ..കാലദേശങ്ങള്‍ക്കക്കരെനിന്ന് കുരുക്ഷേത്രഭൂമിയിലേയ്ക്ക് അവനെന്നെ തിരിച്ചെത്തിയ്ക്കും..സിദ്ധാര്‍ത്ഥാ..അവന്‍ അവതാര പുരുഷനാണ്..അവനെന്നെ കൊണ്ടുപോകും....ഉത്തരങ്ങളുടേ പ്രവാഹത്തിലേയ്ക്ക്....ഗീതയിലേയ്ക്ക്...

പിന്നണിയില്‍ നിന്ന്

കൃഷ്ണന്‍:

"കുതസ്ത്വാ കശ്മലമിദം
വിഷമേ സമുപസ്തിതം
അനാര്യജുഷ്ടമസ്വര്‍ഗ്ഗ
മകീര്‍ത്തികരമര്‍ജ്ജുനാ"

(അര്‍ജ്ജുനന്‍ പരമ സന്തോഷവും ആകാംക്ഷയും കലര്‍ന്ന മുഖഭാവം..ശബ്ദത്തിലേയ്ക്ക് ശ്രദ്ധിയ്ക്കുന്നു..സിദ്ധാര്‍ത്ഥന് പുഞ്ചിരി..)

"ക്ലൈഭ്യം മാ സ്മ ഗമ പാര്‍ത്ഥഃ
നൈതത്വയുപപദ്യതേ
ക്ഷുദ്രം ഹൃദയ ദൌര്‍ബല്യം
ത്യക്തോത്തിഷ്ധ പരന്തപാ"

അര്‍ജ്ജുനന്‍ കൈകള്‍ വിടര്‍ത്തി ആകാശത്തിലേയ്ക്ക് നോക്കി നില്‍ക്കുന്നു..പതിഞ്ഞ ശബ്ദത്തില്‍ തുടങ്ങുന്ന ഇടയ്ക്കയുടെ ശബ്ദം..ഒപ്പം മോഹന മുരളിയുടെ മനോഹര നാദം...വിളക്കിന്റെ തെളിച്ചം വാദ്യത്തിനനുസരിച്ച് കുറയുന്നു...വേദിയില്‍ പൂര്‍ണ്ണാന്ധകാരം...പിന്‍ തിരശ്ശീലയില്‍ സ്നേഹമോടെ പുണര്‍ന്നു നില്‍ക്കുന്ന അര്‍ജ്ജുനന്റേയും കൃഷ്ണന്റേയും നിഴലുകള്‍..പതിയെ വേദിയിലെ വെളിച്ചം കൂടുന്നതിനനുസ്സരിച്ച് നിഴലുകള്‍ക്കുമുന്നില്‍ ഒരു ആട്ടത്തിരശ്ശീല പതിയെ ഉയരുന്നു...
സംഗീതാത്മകമായി....

"യത്ര യോഗേശ്വര കൃഷ്ണോ..
യത്ര പാര്‍ത്ഥോ ധനുര്‍ധരഃ
തത്ര ശ്രീര്‍ വിജയോ ഭൂതിര്‍
ധ്രുവഃ നീതിര്‍ മതിര്‍ മമഃ"

വേദിയില്‍ വെളിച്ചം...സിദ്ധാര്‍ത്ഥന്‍ അവിടെ നില്‍പ്പുണ്ട്...സിദ്ധാര്‍ത്ഥന്‍ മാത്രം....

സിദ്ധാര്‍ത്ഥന്‍ :ഈതീരത്തുനിന്ന് ഒരുപാട് യാത്ര ചെയ്താലേ സത്യത്തിലേയ്ക്കുള്ള വഴിയിലെത്തൂ‍..ധര്‍മ്മാധര്‍മ്മങ്ങളുടെ ഉരകല്ല് കണ്ടുകിട്ടൂ...

എന്റെ സാരഥി അവതാര പുരുഷനല്ലാത്തിടത്തോളം അവതാരപുരുഷനാകാനുള്ള ചരിത്രനിയോഗം എനിയ്ക്കുള്ളതാണ്....

കാലങ്ങളുടെ കണക്കുപുസ്തകത്തില്‍ കര്‍മ്മബന്ധങ്ങളുടെ കടമായി യശോധരയെ വിഷാദതീരത്തിലെ ഈ മരവിച്ച കാറ്റിന് ഞാന്‍
വിട്ടുകൊടുക്കുന്നു...

യാത്രയാകുവാന്‍ സമയമായി....

(ഷെഹനായിയുടെ നേര്‍ത്ത തേങ്ങല്‍..യശോധരയുടേതുപോലെ...
പതിയെ മംഗളകരമായ യാത്രയെസൂചിപ്പിയ്ക്കുന്ന തബലയുടേ നേര്‍ത്ത പശ്ചാത്തലം..........)

"ഏകാന്തവേദനയുടേ ഈ തീരം സത്യത്തിന്റെ കാലത്തിലേയ്ക്കുള്ള തോണിയാണ്..എന്നും ഒരുപാട് പരീക്ഷകളാവര്‍ത്തിയ്ക്കാനൊരുപാടവതാരങ്ങള്‍ ഈ അരങ്ങിലെത്തും....കല്‍പ്പാന്ത കാലത്തോളം....അപ്പൊഴും ഈ കടവില്‍ ഇതേ ശാന്തതയോടെ കാറ്റ് വീശിക്കൊണ്ടേയിരിയ്ക്കും......."

തിരശ്ശീല..

********ശിവം**************.

ആള്‍ ദൈവങ്ങള്‍ തുടര്‍ച്ച

2006-11-29T09:44:00.000-08:00

ഇതിന്റെ തുടര്‍ച്ചയാണ്

“പലമതസാരവുമേകമെന്നു പാരാ-
തുലകിലൊരാനയെയന്ധരെന്നപോലെ
പലവിധ യുക്തി പറഞ്ഞു പാമരന്മാ-
രലവതു കണ്ടലയാതമര്‍ന്നിടേണം.

ഒരു മതമന്യനു നിന്ദ്യമൊന്നിലോതും
കരുവപരന്റെ കണക്കിനൂനമാകും;
ധരയിലിതിന്റെ രഹസ്യമൊന്നുതാനെ-
ന്നറിവളവും ഭ്രമമെന്നറിഞ്ഞിടേണം.

പൊരുതു ജയിപ്പതസാദ്ധ്യമൊന്നിനോടൊ-
ന്നൊരു മതവും പൊരുതലൊടുങ്ങുവീല
പരമതവാദിയിതോര്‍ത്തിടാതെ പാഴേ
പൊരുതു പൊലിഞ്ഞിടുമെന്ന ബുദ്ധി വേണം.

ഒരു മതമാകുവതിന്നുരപ്പതെല്ലാ-
വരുമിതു വാദികളാരുമോര്‍ക്കുവീല;
പരമതവാദമൊഴിഞ്ഞ പണ്ഡിതന്മാ-
രറിയുമിതിന്റെ രഹസ്യമിങ്ങശേഷം. “

(ആത്മോപദേശ ശതകം, 44-47 ശ്ലോകങ്ങള്‍) തത്തമ്മയോട് കടപ്പാട്

ഇവിടെ ഗുരു മതം എന്നു പറയുന്നതിന് അഭിപ്രായം എന്ന അര്‍ത്ഥമാണ് അന്ധനായ ഞാന്‍ കൊടുക്കുക. 49 ആമത്തെ ശ്ലോകത്തില്‍ ഗുരു ഇങ്ങനെ പറയുന്നു

“അഖിലരുമാത്മസുഖത്തിനായ് പ്രയത്നം
സകലവുമിങ്ങു സദാപി ചെയ്തിടുന്നു;
ജഗതിയിലിമ്മതമേകമെന്നു ചിന്തി-
ച്ചഘമണയാതകതാരമര്‍ത്തിടേണം “
---------------------------------------------------

ഇനി ഒരു ചെറിയ കഥ..

എന്റെയൊരു സുഹൃത്ത് എനിയ്ക്ക് പറഞ്ഞ് തന്നതാണ്

ഒരു സത്യാന്വേഷി..
അദ്ദേഹം മണ്ണില്‍ നിന്നും വായുവില്‍ നിന്നും ജലത്തില്‍ നിന്നും അഗ്നിയാകാശങ്ങളില്‍ നിന്നുമെല്ലാം പഠിച്ചു..
പൂര്‍ണ്ണമായ അറിവ് കിട്ടിയിട്ടില്ല എന്ന തോന്നല്‍
ഗുരുവിനെ വേണം..

ആ തോന്നലൊരു വികടം പിടിച്ചതാണ്..
ഒന്നും വേണ്ടാതെവരും, ഒന്നിലും മനസ്സുറയ്ക്കില്ല..
ഒരേ യാത്ര,.. രാവും പകലുമെല്ലാം..

വഴിയരികില്‍ കണ്ട മനുഷ്യരോടും മൃഗങ്ങളോടുമെല്ലാം ചോദിച്ചു
"എനിയ്ക്കൊരു ഗുരുവിനെ കാണിച്ചു തരാനാകുമോ?"
ആര്‍ക്കുമറിയില്ലായിരുന്നു ഗുരുവെവിടെയെന്ന്..

ഓരോരുത്തരും ഓരോരുത്തരുടെ പേരു പറഞ്ഞു
അവരാരും അദ്ദേഹത്തിന് ഗുരുവായില്ല...

അറിഞ്ഞവര്‍ ചിലപ്പോ പറഞ്ഞു..
"നിനക്ക് വേറേ ഗുരുവുണ്ട്..തിരയുക.."
"എന്റെ ഗുരു എങ്ങനേയിരിയ്ക്കും?"
"അതൊന്നും ഞങ്ങള്‍ക്കറിയില്ല..തിരയുക.."

തിരഞ്ഞു..കുറേ കൊല്ലങ്ങള്‍ തിരഞ്ഞു..
തളര്‍ന്ന് ഒരു ആല്‍ച്ചുവട്ടിലിരുന്നു
അവിടെ ഒരു ഭിക്ഷക്കാരനുണ്ടായിരുന്നു..

അദ്ദേഹം ചോദിച്ചു
"എന്താ ചങ്ങാതീ നിങ്ങള്‍ ഒത്തിരി ക്ഷീണിച്ചിരിയ്ക്കുന്നുവല്ലോ?"
എത്രയെത്ര മഠങ്ങളിലും ആശ്രമങ്ങളിലും തിരക്കി..എത്രയെത്ര അറിഞ്ഞവരെ കണ്ടു..ഇനിയീ പിച്ചക്കാരനോടും പറഞ്ഞുകളയാം.
.
"എന്തു പറയാനാണ്..കൊല്ലങ്ങളായി ഞാന്‍ ഗുരുവിനെ തിരക്കിയുള്ള യാത്രയിലാണ് മാഷേ"

അത്രേയുള്ളോ..ഇന്നലെ രാത്രി ചില കിളികള്‍ കൂട്ടിലിരുന്ന് പറയുന്നത് കേട്ടു..കുറെ കൊല്ലങ്ങളായി ഒറ്റയിരുപ്പല്ലേ എനിയ്ക്കീ കിളികള് പറയുന്നത് കുറേയൊക്കെ മനസ്സിലാകും..

എന്താണ് കിളികള്‍ പറഞ്ഞത്? അന്വേഷിയ്ക്ക് ആകാംക്ഷ അടക്കാനായില്ല..

ഒന്നുമില്ല ഇത്രയേ പറഞ്ഞുള്ളൂ

"മഴവില്ലിന്റെ നിറങ്ങള്‍ കണ്ണുകളില്‍ നിറച്ചു വച്ചിരിയ്ക്കുന്ന....ചിരിയ്ക്കുമ്പോള്‍ പ്രപഞ്ചം നൃത്തം ചെയ്യുന്ന ഗുരുവിനെത്തേടി ഒരാള്‍ ഇന്നിവിടെ വരുമെന്ന്"

"ഉവ്വോ..നന്ദി സുഹൃത്തേ നന്ദി..ഇനി ഞാന്‍ കണ്ടു പിടിച്ചോളാം..ഇത്രയും അടയാളങ്ങള്‍ മതി..
എന്നാലും നിങ്ങളൊരു സിദ്ധന്‍ തന്നെ..കിളികളുടേ ഭാഷയൊക്കെ മനസ്സിലാക്കിക്കഴിഞ്ഞല്ലോ.."

അദ്ദേഹം അവിടേനിന്നും യാത്രപുറപ്പെട്ടു..വിശപ്പും ദാഹവുമൊന്നും അറിഞ്ഞില്ല..പത്ത് കൊല്ലങ്ങള്‍ പെട്ടെന്ന് പോയി.

വീണ്ടും ആശ്രമങ്ങള്‍ അമ്പലങ്ങള്‍ ....വായനശാലകള്‍, സത്രങ്ങള്‍, വേശ്യാലയങ്ങള്‍, മദ്യശാലകള്‍ ..കടലുകള്‍ കടന്നു .....

അവസാനം തിരിച്ച് നമ്മുടെ പഴയ ആലിഞ്ചുവട്ടില്‍ തന്നെ വന്നു..
തളര്‍ന്നിരുന്നു..
ആ ഭിക്ഷക്കാരന്‍ അവിടെത്തന്നെ കണ്ണടച്ചിരിയ്ക്കുന്നുണ്ടായിരുന്നു.

അന്വേഷി പറഞ്ഞു.
"ഒരുപക്ഷേ ആ പക്ഷികള്‍ ചുമ്മാ പറഞ്ഞതായിരിയ്ക്കുമെന്റെ ചങ്ങാതീ..എനിയ്ക്കാരേയും കണ്ടെത്താന്‍ കഴിഞ്ഞില്ല
അല്ലെങ്കില്‍ ഒരു മനുഷ്യന്‍ തന്നെയാകണം ഈ ഗുരു എന്നെന്താണ് നിര്‍ബന്ധം..അല്ലേ ..
..
നിങ്ങള്‍ ഉറങ്ങുകയല്ലല്ലോ സുഹൃത്തേ..എന്തായാലും ഞാന്‍ യാത്ര മതിയാക്കി..നിങ്ങളോടോപ്പം ഈ മരച്ചുവട്ടിലിരിയ്ക്കാം..
ഗുരു എനിയ്ക്കുള്ളതെങ്കില്‍ എന്നെത്തേടി വരും അല്ലേ.."

ആ ഭിക്ഷക്കാരന്‍ കണ്ണു തുറന്നു..

ആ കണ്ണുകളില്‍ മാരിവില്ലിന്റെ നിറങ്ങളുണ്ടായിരുന്നു

അവര്‍ മന്ദഹസിച്ചപ്പോള്‍ പ്രപഞ്ചം മുഴുവന്‍ നൃത്തം ചെയ്തു.
------------------------------------------------------------------------------------------

ഇനി കാര്യം

ഒരിയ്ക്കലും ഗുരുക്കന്മാരും ആശ്രമമൃഗങ്ങളുമൊന്നും വിമര്‍ശനത്തിനതീതരല്ല പരാജിയണ്ണാ..എന്റെ അഭിപ്രായത്തില്‍, തോന്നുന്നുണ്ടെങ്കില്‍, അവരെ കൂടുതല്‍ വിമര്‍ശിയ്ക്കുകയാണ് വേണ്ടത്.

കപട വാസുദേവന്മാര്‍ ഒത്തിരിയുണ്ട് ..എന്നും.

ദൈവത്തെപറ്റിയുള്ള ശ്രീജിത്തിന്റെ അറിവ് മഹത്തരം എന്നേ പറയാന്‍ പറ്റൂ.

ആ അറിവ് അറിവായിരിയ്ക്കുമ്പോള്‍
അറിവുമറിഞ്ഞിടുമര്‍ത്ഥവും പുമാന്‍ തന്നറിവുമൊരാദി മഹസ്സു മാത്രമാകും
വിരളതവിട്ടു വിളങ്ങുമമ്മഹത്താമറിവിലമര്‍ന്നതു മാത്രമായിടേണം

എന്നു ഗുരു വാക്യം.

ഇനി യോഗയുടെ കാര്യം

ഗുരു സ്വാമി ആനന്ദനാദയോഗി(മനു ഏട്ടന്‍) ആസനങ്ങള്‍ പഠിപ്പിയ്ക്കും മുന്‍പ് പറഞ്ഞ് തന്നത് പറയാം.
(ഗുരു നിത്യ ചൈതന്യ യതി സന്ന്യാസ ദീക്ഷ നല്‍കി,ഋഷികേശത്തിലെ ശിവാനന്ദാശ്രമത്തില്‍ സ്വാമി ചിദാനന്ദ ജിയില്‍ നിന്ന് യോഗം അഭ്യസിച്ചു.
വയലിനില്‍ ലാല്‍ഗുഡി ജയരാമന്‍ സാറിന്റെ ശിഷ്യന്‍.)

ഓരോ ആസനങ്ങളും ഓരോരോ ധ്യാനാത്മകമായ അവസ്ഥയില്‍ മുനിമാരില്‍ സ്വാഭാവികമായി ശരീരം എത്തിച്ചേര്‍ന്ന ചില ഇരുപ്പുകളാണ്.
നാം ഒരു ഫീഡ് ബാക്ക് പോലെ ആ ആസനങ്ങളില്‍ ഇരുന്നുകൊണ്ട് അതത് ധ്യാനാത്മകമായ അവസ്ഥകളില്‍ എത്തിച്ചേരാന്‍ ശ്രമിയ്ക്കുന്നു

(എന്റെ വാക്കുകളാണ്..ഓര്‍മ്മയില്‍ നിന്ന്)

ഇനി ശ്രീ നാരായണ ഗുരുവിനെ പറ്റിയുള്ള ചില പരാമര്‍ശങ്ങളാണ്.

എന്നെ സംബന്ധിച്ചിടത്തോളം ഗുരുവെന്നത് എന്റെ അപ്പൂപ്പന്‍ പറഞ്ഞു തന്ന ചില നിത്യമായ കഥകളും,ഗുരു നിത്യ, മുനി നാരായണ പ്രസാദ്, നടരാജ ഗുരു പുസ്തകങ്ങളിലെ വാക്കുകളും, ഒക്കെയാണ്.

അദ്ദേഹം ജാതിയും മതവും ഇല്ല എന്നു പറഞ്ഞതു പോലെ തന്നെ സത്യം തന്നെയണ് ചിദംബരാഷ്ടകവും, ഭദ്രകാളീസ്തവവും,ഷണ്മുകാഷ്ടകവും, ആത്മോപദേശശതകവും, ജനനീ നവരത്ന മഞ്ജരിയുമൊക്കെ.

ആള്‍ ദൈവത്തെപ്പറ്റി പറഞ്ഞത് തെറ്റിദ്ധരിയ്ക്കാന്‍ ഇടയുള്ളതു തന്നെയായിരുന്നു..ദൈവം എന്നു പറഞ്ഞത് അവരെ എന്റെ മുറിയുടെ ചുവരിലൊട്ടിച്ചു വച്ചിട്ടുണ്ടെന്നോ..മാലയിട്ട് പൂജിയ്ക്കുന്നെന്നോ അര്‍ത്ഥമാക്കേണ്ടതില്ല.

ഞാന്‍ അങ്ങനെ ചെയ്തിട്ടുണ്ട് താനും.

(പണ്ട് കൊച്ചിയില്‍ ഞാന്‍ താമസിച്ചിരുന്ന മുറിയില്‍ മാതൃഭൂമിയില്‍ വന്ന, മദനന്‍ വരച്ച, ഗുരുവിന്റെ ഒരു മനോഹര ചിത്രം ഞാന്‍ ചുവരിലൊട്ടിച്ചിരുന്നു..ഭഗവതിയുടെ ചിത്രവും രമണ മഹര്‍ഷിയുടെ ചിത്രവും കൂട്ടിന്:)...

എന്റെ സഹ വീടന്മാര്‍ കുറെക്കാലം ഞാന്‍ എസ് എന്‍ ഡീ പ്പീ യുടെ ആരോ മുന്തിയ ആളെന്നു വിചാരിച്ചിട്ടുണ്ട്..നല്ല തമാശ ഞാനും കളിച്ചിട്ടുമുണ്ട്..

പിന്നെ രമണ മഹര്‍ഷിയുടെ ചിത്രം കണ്ട് അത് എന്റെ അപ്പൂപ്പനാണോ എന്നൊരു ചോദ്യം വന്നതും ഓര്‍ക്കുന്നു..തമാശയായിട്ട് ചോദിച്ചതല്ല സീരിയസ്സായിത്തന്നെ ചോദിച്ചതാണ്.:)

ഇളയരാജയുടെ രമണ മഹര്‍ഷിയെപ്പറ്റിയുള്ള ഒരു ആല്‍ബത്തില്‍ ‘അരുണാചല ശിവ‘ എന്ന പാട്ടിന് മുന്‍പൊരു സംഭാഷണമുണ്ട്..

ഒരു കുട്ടി "റമണനാ..അത് യാറ്?
രാജ.."റമണായാറെന്നാ?..അത് എന്‍ തന്തൈ"..

അപ്പൂപ്പനുമല്ല തന്ത..

ഓരോരുത്തരും അവരവരുടെ മാനസിക അവസ്ഥയ്ക്ക് യോജിച്ച രീതിയില്‍ ബഹുമാനിയ്ക്കും അതിനേയാണ് പൂജയെന്നോ ഹോമമെന്നോ ഒക്കെ വിളിയ്ക്കേണ്ടത്..

വിനോദ് മാഷിന്റെ മറുപടി വന്നതോട് കൂടി അതിന് ഞാനായിട്ടിനി ഒന്നും പറയേണ്ടതില്ല..ഇടിയേട്ടാ..ഒരിയ്ക്കലും ഓഫല്ല...അനുഭവത്തില്‍നിന്നല്ലാതെ ഒരിയ്ക്കലും സത്യം അറിയാനൊക്കുകയുമില്ല..(എന്നു തോന്നുന്നു)

ജിദ്ദു കൃഷ്ണമൂര്‍ത്തിയെപ്പറ്റി..

അതൊരു ഭയങ്കര ഓര്‍മ്മയാണ്...നന്ദി

മഹാത്മാ ഗാന്ധി യൂണിവേഴ്സിറ്റിയില്‍ , ലൈബ്രറിയാണ് ഏറ്റവും സുന്ദരം..
ആ മലയുടെ ഉച്ചിയില്‍
ചെറിയ ഇടിയും മാനം നിറയേ ഇരുണ്ടതുമായ ഒരു ഉച്ചമയക്കത്തിന് ആ ലൈബ്രറിയില്‍ ഈയുള്ളവനെത്തുന്നു.

(സബ്ജക്റ്റിലുള്ള പുസ്തകങ്ങള്‍ ഒരുപാട് സ്വന്തം സ്കൂളില്‍ നിരന്നിരുപ്പോണ്ട്..പീ ജീ ആര്‍ സാര്‍ ഒന്നിനും ലുബ്ധം കാണിച്ചിട്ടില്ല.സ്വയം പൊക്കിപ്പറയുന്നതിലും കോക്കസ്സില്‍ കളിയ്ക്കുന്നതിലുമൊഴിച്ച്.)

പെണ്ണുങ്ങളുടെ മുന്‍പില്‍ പിടിച്ചു നില്‍ക്കാന്‍ ഒരേയൊരായുധം ഫിലോസഫിയും തര്‍ക്കവുമായതിനാല്‍ എപ്പോഴും ഫിലോസഫിയിലേയ്ക്കൊരു ചായ്‌വുണ്ട്
(ഈട്ടിക്കാതല്‍ വര്‍ണ്ണം, ഹൃസ്വ ദൃഷ്ടി, മന്ദത:) പിന്നതൊക്കെത്തന്നെ രക്ഷ.)

കയ്യില്‍ കിട്ടിയത് മരണത്തേയും പേടിയേയും പറ്റിപ്പറയുന്ന ആ പ്രശസ്തമായ പുസ്തകം

ചുമ്മാ വായിച്ചു തുടങ്ങി.
മൂന്ന് മൂന്നര മണി..മാനം നല്ലോണമിരുണ്ടു..

ആ ഇരുണ്ട ലൈബ്രറിയില്‍ ലൈറ്റിടാതെ പുസ്തകങ്ങള്‍ക്കിടയില്‍ നിന്ന്, തിയോസഫിയ്ക്കല്‍ സൊസൈറ്റിയില്‍ നിന്നിറങ്ങിപ്പോയ ആ പ്രവാചകന്റെ തിരുവെഴുത്തുകള്‍ക്ക് ഇടിനാദവും കോരിച്ചൊരിയുന്ന മഴയും അകമ്പടി..പിന്നെ ഒന്നും പറയാനില്ല..

ജിദ്ദുവിനേപ്പറ്റിയുള്ള നല്ലവാക്കുകളാണ് ഓഷോ വായിയ്ക്കാനും കേള്‍ക്കാനും കാരണം.
ഇടയ്ക്ക് ഒന്നു പറഞ്ഞോട്ടേ..ഓഷോയെ ശരിയ്ക്കും ശ്രീമാന്‍ ശിശു അറിഞ്ഞോ എന്നൊരു സംശയം..

ധൂര്‍ത്തിനെപ്പറ്റിയൊക്കെ എപ്പോഴും ഓഷോ പറഞ്ഞിട്ടുണ്ട്..പുള്ളിയും വാക്കുകളിലൂടേയും കേള്‍വിയിലൂടേയും മാത്രം എനിയ്ക്കറിയാവുന്നയാളാണ്.എന്നാലും പറയുന്നതും ജീവിതവും തമ്മില്‍ഉള്ള ബന്ധം, ജീവിതം കൊണ്ട് തന്നെ കാണിച്ച് തന്ന ഭയങ്കര കള്ളനായിരുന്നു ഓഷോ അമ്മാവന്‍..:)

അദ്ദേഹത്തിന്റെ പുസ്തകങ്ങള്‍ കുറേയെങ്കിലും വായിച്ചാല്‍ സംശയമില്ലാതെ കാണാമത്..

ഒരു കഥ കൂടി ഇന്നെന്നില്‍ കഥ പ്രേതം കൂടിയിരിയ്ക്കുന്നു:)

ചട്ടമ്പി സ്വാമി ശ്രീനാരായണ ഗുരുവിനോട് ചോദിച്ചത്രേ
"ഇപ്പം പ്രവര്‍ത്തിയാരുടെ പണിയാണല്ലേ"
ഗുരു ചിരിച്ച് ഒണ്ട് മറുപടി പറഞ്ഞു
"പ്രവര്‍ത്തിയുണ്ട്..ആരില്ല.".

മറ്റൊന്ന്

ശ്രീനാരായണ ഗുരുവിന് ഫോട്ടോ എടുക്കുന്നതിനോട് അത്ര ഇഷ്ടമൊന്നുമില്ലായിരുന്നു
"രസപ്പടം എടുക്കാന്‍ സാധിയ്ക്കുമോ " എന്നു ചോദിയ്ക്കുമായിരുന്നത്രേ

ഇപ്പം മുക്കിന് മുക്കിനുള്ള രസപ്പടങ്ങളും രസപ്രതിമകളും നല്ല തമാശ
ഇതുരണ്ടും സത്യമാണൊ എന്നറിയില്ല..എവിടേയോ കേട്ടതാണ്..

വള്ളിക്കാവിലമ്മയെ കണ്ടിട്ടുണ്ട്.അവരുടെ പ്രസ്ഥാനത്തില്‍ ജോലി ചെയ്തിട്ടുണ്ട്..
ആറു മാസം മുന്‍പ് അവിടേ നിന്ന് അവസാനം പോരും മുന്‍പ് അഭിപ്രായമെഴുതാന്‍ തന്ന പേപ്പറില് ആവശ്യത്തിലധികം എഴുതിക്കൊടുത്ത് സര്‍ട്ടിഫിക്കറ്റും വാങ്ങിയ്ക്കാതെ അവിടെ നിന്നിറങ്ങിപ്പോന്നു.

സായിപ്പ് സര്‍ട്ടിഫിക്കറ്റിലൊന്നും വിശ്വാസമില്ലാത്തയാളാണ്..അയാള് തലവനെ വിളിച്ച് നേരിട്ട് തിരക്കിക്കോളുകയോ കത്തയച്ച് റഫറല്‍ എഴുത്ത് നേരിട്ട് വാങ്ങുകയോ ചെയ്തോളുമെന്നതു കൊണ്ട് അത് വലിയ കാര്യമായില്ല .

പക്ഷേ വള്ളിക്കാവിലമ്മ വള്ളിക്കാവിലമ്മയും ആശുപത്രി ആശുപത്രിയുമാണേനിക്ക്..അത് അടുത്ത തവണ അഭിപ്രായങ്ങള്‍ക്കനുസരിച്ചെഴുതാം..

ഇപ്പം എനിയ്ക്ക് കാലുവേദന.ലീവെടുത്തിരിപ്പാണ്.
ഒരു സ്റ്റെപ്പ് കണ്ടില്ല..:)

ആള്‍ ദൈവങ്ങളും സുദര്‍ശനക്രീയയും

2006-11-28T08:45:00.000-08:00

ശ്രീമാന്‍ ചിത്രകാരന്‍ മനുഷ്യദൈവങ്ങളേപ്പറ്റിയൊരു തപാലിട്ടു കണ്ടു.

അതിനൊരു മറുപടി അവിടെയിടാന്‍ കഴിയാത്തവണ്ണം വലുതായിപ്പോകുമോ എന്നൊരു ഭയം..

ആ ചര്‍ച്ചയില്‍ രണ്ടുമൂന്നു കാര്യങ്ങള്‍ പ്രധാനമായി ഉയര്‍ന്നു വന്നു.

1) ശ്രീ ശ്രീ രവിശങ്കറും മറ്റു മനുഷ്യദൈവങ്ങളും പൊതുവേ മുഖം മൂടികളുള്ളവരാണ്
2) കേരളത്തിലെ ഇടതുപക്ഷ പ്രസ്ഥാനങ്ങളുടെ ജീര്‍ണ്ണതയാണ് ഇതിനെയൊന്നും എതിര്‍ക്കാത്തതിന് കാരണം.
3) അവര്‍ കാര്യമായൊന്നും ചെയ്യുന്നില്ല ..അഥവാ ചെയ്താല്‍ അത് അവരുടെ കച്ചവടം കൂട്ടാനുള്ള കള്ളത്തരങ്ങള്‍ മാത്രം.

ഇതിലൊക്കെ എല്ലാത്തിലും അഭിപ്രായം പറയാനായി ഞാന്‍ അവരുടേയാരുടേയും ശിഷ്യഗണങ്ങളില്‍ പെട്ടയാളല്ല. പക്ഷേ സത്യം മനസ്സിലാക്കിത്തരുന്നവനാണ് ഗുരുവെന്നും അവന്‍ ദൈവമാണെന്നും തന്നെ വിശ്വസിയ്ക്കുന്നവനാണ്.

അതിനി ഹിന്ദുവോ, കൃസ്ത്യാനിയോ , മുസ്ലീമോ, മനുഷ്യനോ, മനുഷ്യന്‍ തന്നെയോ ആയിരിയ്ക്കണമെന്നില്ല.

ആദ്യമായി മനുഷ്യദൈവം എന്നുള്ളതിന് എനിയ്ക്കു തോന്നുന്ന ഉത്തരം ശ്രീമാന്‍ ജോണ്‍ ബ്രിട്ടാസ് വള്ളിക്കാവിലമ്മയുമായി നടത്തിയ കൈരളി ടീവിയില്‍ വന്ന അഭിമുഖത്തിലുണ്ടായിരുന്നു..

“ദൈവം എന്നാല്‍ ആകാശത്തിരുന്ന് നമ്മളേയെല്ലാം നോക്കുന്ന ആളെന്നാണോ മോനേ വിചാരിയ്ക്കുന്നതെന്ന്? “
വാക്കുകള്‍ ഓര്‍മ്മയില്‍ നിന്ന്.. തെറ്റുണ്ടാവാം..
നാമെന്തു വിചാരിയ്ക്കുന്നു?

അതിനേക്കാള്‍ പുരോഗമനപരമായി അതിനൊരു വിശദീകരണം എന്താണുള്ളത്?

വള്ളിക്കാവിലമ്മ , ശ്രീനാരായണഗുരു, ബാലകൃഷ്ണന്‍ നായര്‍ സാറ്, ചട്ടമ്പിസ്വാമികള്‍, രമണമഹര്‍ഷി, യേശു കൃസ്തു, മുല്ല നാസറുദ്ദീന്‍, ഷംസി തബ്രീശ്,.കൃഷ്ണന്‍..രാമന്‍,ലാഹിരിമഹാശയ, എം,..എഴുതാനാണെങ്കില്‍ കൈകഴയ്ക്കും..

ഇവരൊക്കെ ദൈവങ്ങള്‍ തന്നെ..മനുഷ്യരും..
അപ്പം നമ്മളൊക്കെ മനുഷ്യരല്ലേ?..അവരും നമ്മളും തമ്മിലെന്താണ് വ്യത്യാസം.. എന്നൊരു ചോദ്യം വരും..

അതിനുത്തരം ഓഷോ പറഞ്ഞിട്ടുണ്ട്
‘നാം മനുഷ്യരല്ല..മനുഷ്യരാകാനുള്ള സാധ്യതകള്‍ മാത്രം" എന്ന്..

അപ്പോ ലോകം മുഴുവന്‍ നിറഞ്ഞു നില്‍ക്കുന്ന ദൈവസങ്കല്‍പ്പം..മഹാ വാക്യങ്ങള്‍ ...അതിന്റെയൊക്കെ അര്‍ത്ഥം..

(സ്ഥാനത്തും അസ്ഥാനത്തുമൊക്കെ നമുക്ക് ഉരുക്കഴിയ്ക്കാനുള്ളതല്ലേ)

സത്യമെന്താണെന്ന് മനസ്സിലാകുന്നതുവരെ അതനുഭവിച്ചിട്ടുള്ളവന്‍ തന്നെ ദൈവം.അതാണ് ഗുരുര്‍ ബ്രഹ്മാ..എന്നു പറയുന്നത്..അതുവരെ ബ്രഹ്മം ഗുരു..

അതറിഞ്ഞാല്‍ ഞാനും നീയും ചിത്രകാരനും പൊന്നപ്പനും കമ്പ്യൂട്ടറും, മേശയും , നായയുമെല്ലാം ദൈവസ്വരൂപം..അതറിഞ്ഞാലല്ലേ പറയാന്‍ പറ്റൂ..

"I am the way and the truth and the life. No one comes to the Father except through me.
ഞാനെഴുതിയതൊന്നുമല്ല..ഗുരുവും ദൈവവും തമ്മിലുള്ള ബന്ധം ഇതിലും നന്നായി എങ്ങനേയാണ് പറയുക

സുദര്‍ശന ക്രീയയെപ്പറ്റി..
ഞാനത് പഠിച്ചിട്ടില്ല..ആരോ ദേശാഭിമാനിയിലൊരു ലേഖനം പൊക്കിക്കോണ്ടു വന്നത് കൊണ്ട് അറിയാവുന്നതൊന്ന് പറയാതെ വയ്യ..

മധുരയില്‍ മീനാക്ഷീ മിഷന്‍(Meenakshi Mission Hospital and Research Centre pvt ltd) എന്നൊരു ആശുപത്രിയുണ്ട്..

അവിടെ എന്റെയൊരു അധ്യാപകനുണ്ടായിരുന്നു..ന്യൂക്ലിയാര്‍ മെഡിസിന്‍ ടെക്നോളജിസ്റ്റാണ്..പേര് ..ജീ എസ് മുത്തു.(ബിരുദങ്ങള്‍-BSc App Sc, DMRIT(BARC) MIE, C Engg എന്നിവയാണ്..അദ്ദേഹം ഒരിയ്ക്കലും ബിരുദങ്ങള്‍ പേരിനു പിറകില്‍ വച്ചു കണ്ടിട്ടില്ല...ഗമയും അധികാരികതയും ഞാനായിട്ട് കുറയ്ക്കേണ്ടാ എന്നു വിചാരിച്ചാണ്.) ബയോ മെഡിയ്ക്കല്‍ സാങ്കേതിക വിദ്യയിലും ഗവേഷണത്തിലും അദ്ദേഹമൊരു അത്ഭുതം തന്നെയായാണ് എനിയ്ക്ക് തോന്നുന്നത്..കിഡ്നി മാറ്റിവയ്ക്കുന്നതിലെ കോശ മാച്ചിങ്ങിനെപ്പറ്റി മുതല്‍ റേഡിയോ ഇമ്മ്യൂണോ അസ്സേയെപ്പറ്റി വരെ ധാരാളം പേപ്പറുകളുണ്ടായിട്ടുണ്ട് അദ്ദേഹത്തിന്റേതായി..

എന്റെ ഡെസ്സെര്‍ട്ടേഷന്റെ ഗൈഡായിരുന്നു. ഇപ്പൊ ഭിലായിയിലെ ടാറ്റാ ആശുപത്രിയില്‍ മുതിര്‍ന്ന ശാസ്ത്രഞ്ജനായി ജോലി ചെയ്യുന്നു.

അദ്ദേഹവും മധുരയിലെത്തന്നെ ഡിപ്പാര്‍ട്ടുമെന്റ് മേധാവിയായ ലെഫ്. കേണല്‍ വൈ .എന്‍. ഐ ആനന്ദും(MD(Radiology), MD(Nuclear Medicine)) കൂടി ഒരു പൈലറ്റ് പഠനം സുദര്‍ശന ക്രീയയെപ്പറ്റി നടത്തുമ്പോള്‍ ഞാനും അവിടെയുണ്ടായിരുന്നു.ആ പഠനം തുടങ്ങിയത് യാദൃശ്ചികമായാണ് .ഹൃദയ പേശികളുടെ മര്‍മ്മ വികിരണ സ്കാനിങ്ങ് നടത്താനായൊരു സ്ത്രീ വന്നു.അവരുടെ ഹൃദയ പേശികള്‍ വളരേയേറെ നശിച്ചിരുന്നു.ഹൃദയ പേശികളുടെ നാശം രണ്ട് തരത്തിലുണ്ട്..തിരിച്ചു വരാനാകാത്തതും , തിരിച്ചു വരാനാകുന്നതും. തിരിച്ചു വരാനാകാത്തത് എന്നു പറഞ്ഞാല്‍ ആ പേശികള്‍ മരിച്ചു എന്നാണ്. തിരിച്ചു വരാനാകുന്നത് എന്നതാണെങ്കില്‍ ആ പേശികള്‍ പൂര്‍ണ്ണമായും നശിച്ചിട്ടില്ല..രക്തയോട്ടം കുറവായതു കാരണം മരണത്തിന്റെ വക്കിലാണ്. രക്തയോട്ടം പുനസ്ഥാപിച്ചാല്‍ പൂര്‍വ്വ സ്ഥിതിയിലാകാം.ഇത്തരം പേശികളുടെ ഉപകാരത്തിനായാണ് പ്രധാനമായും ബൈപ്പാസ് ശസ്ത്രക്രീയ ചെയ്യുന്നത്.
മേല്‍പ്പറഞ്ഞ സ്ത്രീയെ ബൈപ്പാസ് ശസ്ത്രക്രീയ ചെയ്യാന്‍ വേണ്ടി പറാഞ്ഞയച്ചു. നാളുകള്‍ കഴിഞ്ഞ് അവര്‍ തിരിച്ചു വരികയും സ്കാന്‍ വീണ്ടുമെടുക്കുകയും ചെയ്തു.
ആ സ്ത്രീയില്‍ തിരിച്ചു വരാനാകുന്ന തരത്തിലുള്ള ഹൃദയ പേശികള്‍ ഏതാണ്ട് മുഴുവനും പൂര്‍വ ആരോഗ്യത്തിലാകുകയും ബൈപ്പാസ് ആവശ്യമില്ലാതെയാകുകയും ചെയ്തിരിയ്ക്കുന്നു.അവര്‍ വേറെയൊരു ചികിത്സയോ വ്യായാമം പോലുമോ നടത്തിയിട്ടില്ല..ആരോ പറഞ്ഞതനുസ്സരിച്ച് സുദര്‍ശന ക്രീയ ചെയ്തു.
മുത്തുവും ആനന്ദുമൊത്ത് ഒരു പൈലറ്റ് സ്റ്റഡി ഇതിനേപ്പറ്റി നടത്തുകയും അത് വിവിധ ദേശീയ അന്തര്‍ദേശീയ സിമ്പോസിയങ്ങളിലും ജേര്‍ണലുകളിലും പ്രസിദ്ധീകരിയ്ക്കുകയും ചെയ്തു. പഠനം തുടരുന്നുണ്ടോ എന്നെനിയ്ക്കറിയില്ല.

മുത്തു, ആനന്ദ് മാര്‍ അങ്ങനെ അന്ധവിശ്വാസികളൊന്നുമല്ല.വളരേ ശാസ്ത്രീയമായി ചിന്തിയ്ക്കുന്നവരാണ്.

ഈ ഗവേഷണത്തില്‍ രണ്ട് കാര്യങ്ങളെപ്പറ്റി നമ്മളാലോചിയ്ക്കെണ്ടതുണ്ട്.
ഒന്ന് പ്ലാസിബോ എഫെക്റ്റ് ആണൊ എന്നത്..
രണ്ട് യാദൃശ്ചികം ആണൊ എന്നത്..(അറിയാത്ത കാരണങ്ങള്‍ ഒക്കെയാവാം)

അതിനായി മെഡിയ്ക്കല്‍ ഭാഷയില്‍ പറഞ്ഞാല്‍ ഒരു മള്‍ട്ടി സെന്റര്‍ കണ്ട്രോള്‍ഡ് രാന്‍ഡം പഠനം നടത്തേണ്ടിയിരിയ്ക്കുന്നു.

ഗൂഗിളില്‍ Y. N. I. Anand, T. R. Rajini, R. Shankar, G. S. Muthu എന്നുപയോഗിച്ച് തപ്പിയാല്‍ ഏതോ കൊണ്‍ഫറന്‍സില്‍ അവരത് പ്രസിദ്ധപ്പെടുത്തിയതിന്റെ വിവരങ്ങള്‍ (അബ്സ്ട്രാക്റ്റ്) ഇന്റെര്‍നെറ്റിലും ലഭ്യമാണ്.

ഇനി ദേശാഭിമാനിയിലെ ലേഖനം..അതൊരു കഴമ്പില്ലാത്തതാണ്.യാതൊരു പഠനത്തിന്റേയും ബലമില്ലാതെ നടത്തുന്ന ദ്വേഷപ്രകടനങ്ങള്‍ എന്നു മാത്രമേ പറയുവാനാകൂ..
(ദേശാഭിമാനിയ്ക്കീ സ്വഭാവം പണ്ടേ ഉള്ളതാണ്..ഏതോ സന്യാസിയെ വള്ളിക്കാവിലമ്മയ്ക്കെതിരേ ലേഖനമെഴുതാന്‍ പണ്ട് പൊക്കിക്കൊണ്ട് വന്നതോര്‍ക്കുന്നു. അവസാനം പഴി മുഴുവന്‍ എഴുതിയയാള്‍ക്കും പണം മുഴുവന്‍ അഭിമാനിയ്ക്കും എന്നൊരു സ്ഥിതി വന്നു അവസാനം..(വായിച്ചവര്‍ ഓര്‍ക്കുന്നുണ്ടാകും))

എന്തായാലും സുദര്‍ശന ക്രീയയെ പറ്റിയുള്ള ലേഖനത്തില്‍ കുറേ ശരീര ധര്‍മ്മ ശാസ്ത്രമൊക്കെ പറഞ്ഞിട്ട് ഇങ്ങനെ പറഞ്ഞിരിയ്ക്കുന്നു
"ശ്വസന വേഗം നമ്മുടേ വ്യാമോഹങ്ങള്‍ക്കൊ സങ്കല്‍പ്പങ്ങള്‍ക്കോ അനുസരിച്ച് കൂട്ടുന്നത് പ്രാണശക്തിയുടെ ദുര്‍വിനിയോഗമാണ്"
എന്താണീ ശരീര ശാസ്ത്രവും പ്രാണശക്തിയും ദേശാഭിമാനിയുമായുള്ള ബന്ധം?

അതിനു ശേഷം ലേഖനകാരന്‍

"സുദര്‍ശനക്രീയ ആസ്മാ രോഗത്തിന് ഫലപ്രദമാണെന്നാണ് പ്രചാരണം..അസ്മാ യദാര്‍ത്ഥത്തില്‍ രോഗമല്ല“

എന്നു പറഞ്ഞിരിയ്ക്കുന്നു.പിന്നെയെന്താണാവോ ....എവിടുന്നാണ് ആസ്മാ രോഗമല്ല എന്നൊരു വിവരം അദ്ദേഹത്തിനു കിട്ടിയത്?

WHO പറയുന്നത്
Asthma is a chronic disease characterized by recurrent attacks of breathlessness and wheezing, which vary in severity and frequency from person to person. Symptoms may occur several times in a day or week in affected individuals, and for some people become worse during physical activity or at night.

എന്നാണ്..ഇനി വേറേ വല്ലവരും ഇതു രോഗമല്ല എന്ന വാദവുമായി വന്നിട്ടുണ്ടോ എന്നറിയില്ല..

(പാത്തോളജിയുടെ അംഗീകൃതമായ ടെക്സ്റ്റ് ബുക്കായ റോബിന്‍സിലും ഞാന്‍ പരതി..അതിലും വ്യത്യാസമായൊന്നുമല്ല പറഞ്ഞിരിയ്ക്കുന്നത്..)

ദേശാഭിമാനിയിലെ ലേഖനത്തിലെ അവസാനത്തെ പാരഗ്രാഫില്‍ പറഞ്ഞിരിയ്ക്കുന്നതിന്റെ സാംഗത്യം ഇവിടെയെന്താണ് എന്നെനിയ്ക്ക് മനസ്സിലയതുമില്ല.

അതായത് ആ ലേഖനം സുദര്‍ശന ക്രീയയേക്കാള്‍ മണ്ടത്തരം തന്നെ സംശയമില്ല.

മറ്റൊന്ന് ഞാന്‍ വ്യക്തിപരമായി സുദര്‍ശനക്രീയ ചെയ്തു നോക്കിയിട്ടില്ല്ല എന്നതാണ് .ആഗ്രഹമുണ്ടായിരുന്നു..

സത്യം പറയാം കാശില്ലായിരുന്നു. എനിയ്ക്ക് നാട്ടില്‍ കൈയില്‍ കിട്ടിയിട്ടുള്ള ഏറ്റവും വലിയ ശമ്പളം 3500 രൂപായാണ്. അതും ആറുമാസം മാത്രമേ അത്രയും കിട്ടിയിട്ടുള്ളൂ..
മൂന്നു കൊല്ലത്തോളം ആയിരം രണ്ടായിരത്തിനകത്ത് കെടന്ന് വട്ടം ചുറ്റിയിട്ടുണ്ട്. അതില്‍ നിന്ന് 500 രൂപാ എന്നതൊരു ആര്‍ഭാടമായിരുന്നെനിയ്ക്ക്.

(കള്ളു കുടിയ്ക്കാനെവിടുന്നാടാ കാശ് ..അതു ഷെയറിട്ടാരുന്നേ:))

http://www.ncbi.nlm.nih.gov/entrez/query.fcgi?CMD=search&DB=pubmed
എന്ന ലിങ്കില്‍ സുദര്‍ശന ക്രീയയുടെ മറ്റൊരു ഗുണഫലത്തെപ്പറ്റിയുള്ള ഗവേഷണപ്പത്രത്തിന്റെ ചുരുക്കെഴുത്തും കിടക്കുന്നു..കാര്യമുണ്ടോ എന്നറിയില്ല..ലേഖനം വന്ന ജേര്‍ണല്‍ നല്ലതാണ്.

ദോഷവശങ്ങളെപ്പറ്റിയും തിരക്കി നോക്കി..ആരും ഒന്നും പറഞ്ഞിട്ടില്ല. ഇതുവരെ..അല്ല അങ്ങനെ വല്ലതുമുണ്ടെങ്കില്‍ അതും വെളിച്ചത്തു കൊണ്ടു വരണം.അല്ലാതെ അതുമിതും പറയുകയല്ല വേണ്ടത്

മറ്റൊന്ന് ഇങ്ങനെയുള്ളവരുടെ ഉത്സാഹക്കമറ്റികളെപ്പറ്റിയാണ്..അവരില്‍ എല്ലാ വിഭാഗത്തില്‍ പെട്ട ആള്‍ക്കാരും വരും.അവരൊക്കെയാണ് ആയിരം രൂപാ പിരിയ്ക്കുന്നതും അമൃതാ മഠവുമായുള്ള ബന്ധവുമൊക്കെ ചോദിയ്ക്കുന്നത്.ഏതെങ്കിലും ഏസ് ഏഫ് ഐ കുരുട്ടുകള്‍ ആരെയെങ്കിലും തല്ലിയതിന് ശ്രീ.അച്യുതാനന്ദനെ പഴിയ്ക്കുന്നതു പോലേയേയുള്ളൂ..അങ്ങേരത് സപ്പോര്‍ട്ട് ചെയ്താല്‍ ശരി..
.........................................................

അഭിപ്രായങ്ങള്‍ക്കനുസരിച്ച് തുടരാം..

രാമ വാനരപ്പാലവും നാസയും-ഒരു കമന്റ്

2006-11-23T20:59:00.000-08:00

സുകുമാര പുത്രനെഴുതിയ ഒരു തപാലിനുള്ള മറുപടി ..നീളമല്‍പ്പം കൂടിയതിനാല്‍ ഇവിടേയും പോസ്റ്റ് ചെയ്യുന്നു.
ആദ്യം ഇവിടെ ഞെക്കി അദ്ദേഹത്തിന്റെ തപാല്‍ വായിയ്ക്കുക

രാമ വാനരപ്പാലവും നാസയും -ഒരു കമന്റ്

ഭാരതത്തിനും ശ്രീലങ്കയ്ക്കുമിടയ്ക്ക് ഇത്തരമൊരു പാലമുള്ളത് ആദ്യമായികിട്ടുന്ന അറിവാണെന്ന് തോന്നുന്നില്ല.

അങ്ങ് കാണിച്ചിരിയ്ക്കുന്ന ചിത്രങ്ങള്‍ ഫോര്‍വേഡഡ് ഈ- എഴുത്തുകളായി കുറേ നാളായി കാണുന്നുണ്ട്.

ശരിയ്ക്കും പറയുകയാണെങ്കില്‍ പാക് കടലിടുക്കില്‍ സ്വാഭാവികമായോ അല്ലാതേയോ ചെറു ചെറു ദ്വീപുകളും പവിഴപ്പുറ്റുകളും ചേര്‍ന്ന ഒരു പാലം പണ്ടു മുതലേ കണ്ടിട്ടുണ്ട്..പണ്ട് മുതലേ എല്ലാവര്‍ക്കും അറിയാവുന്നതാണിത്

(മദ്രാസ് പ്രസിഡന്‍സിയിലെ Robert Palk,(1755-1763 എന്ന ഗവര്‍ണര്‍ ജനറലിന്റെ ഓര്‍മ്മയ്ക്കായാണ് ഈ കടല്ലിടുക്കിന് പാക് കടലിടുക്ക് എന്ന പേരു വന്നത്.).

.ആ ദ്വീപുകളില് രാമേശ്വരം ദ്വീപു മുതല്‍ ആ ദ്വീപിന്റെ മുനമ്പായ ധനുഷ്കോടി വരെ ഭാരതത്തില്‍ ഉള്ളവര്‍ക്ക് പ്രാപ്യമാണ് താനും.രാമേശ്വരം വരെ നാം പാമ്പന്‍ പാലം എന്ന പേരില്‍ റോഡ് ഗതാഗതവും ഉണ്ടാക്കിയിട്ടുണ്ട്.
അവിടുന്നങ്ങോട്ട് ശ്രീലങ്ക വരെ ചെറുചെറു ദ്വീപുകളും ആഴം കുറഞ്ഞ സമുദ്രഭാഗവും പവിഴപ്പുറ്റുകളും ചേര്‍ന്നു കിടക്കുന്ന സമുദ്രഭാഗത്തിനേയാണ് നാം രാമന്റെ പാലമെന്നോ ആഡംസ് പാലമെന്നോ ഒക്കെ പറയുന്നത്.

ഈ പാലം മനുഷ്യനിര്‍മ്മിതമായാലും അല്ലെങ്കിലും ഭാരതത്തിലേയും ശ്രീലങ്കയിലേയും ജീവിതത്തിനെ ഒരുപാട് സ്വാധീനിച്ചിട്ടുണ്ട്.
ബംഗാള്‍ ഉള്‍ക്കടലിലെ മത്സ്യബന്ധനം, കാലാവസ്ഥ, വേലിയേറ്റവും വേലിയിറക്കവും വഴിയുണ്ടാകുന്ന സമുദ്രത്തിലേയും കരയിലേയും വ്യതിയാനങ്ങള്‍ ഇതിനെയൊക്കെ ഈ കടലിടുക്കിലെ പാലം പോലെയുള്ള ആഴം കുറഞ്ഞ ഭാഗം സ്വാധീനിയ്ക്കുന്നു.

വികിപീഡിയയില്‍ നിന്നുള്ള വിവരങ്ങളനുസരിച്ച് ഭാരതീദാസന്‍ സര്‍വകലാശാല ഈ കടലിടുക്കിന് ഏതാണ്ട് 3500 വര്‍ഷത്തെ പഴക്കമെ കാണുന്നുള്ളൂ.അതിനും മുന്നേ ഉള്ളതാണെന്നും അല്ല ഇതു സ്വാഭാവികമായ ആഴം കുറഞ്ഞ കടലിടുക്കാണെന്നുമൊക്കെ വാദങ്ങളുണ്ട്.

ഇതിന് നാസയാണോ ആഡംസ് പാലം എന്നു പേരുകൊടുത്തതെന്ന് നാം ഒന്നുകൂടി ആലോചിയ്ക്കേണ്ടതുണ്ട്.എന്റെ പ്രാഥമിക പഠനകാലം മുതല്‍ക്കേ ഈ ആഡംസ് പാലത്തിനേപറ്റി കേള്‍ക്കുന്നതാണ്.

ഇതിഹാസങ്ങള്‍ക്കും മറ്റും ചരിത്രപരമായ തെളിവുകണ്ടുപിടിയ്ക്കുന്നത് നല്ലതു തന്നെ.പക്ഷേ കിട്ടുന്ന വിവരങ്ങള്‍ ആദ്യം ശരിയാണൊ എന്നു നാം പരിശോധിയ്ക്കേണ്ടതുണ്ട്. മറ്റൊന്ന് ഭാരതീയ ഇതിഹാസങ്ങളോടും ചിന്താരീതിയോടുമൊക്കെ നാം സമരസപ്പെടേണ്ടത് അതിനെ ശരിയായി മനസ്സിലാക്കുക എന്ന ഒരൊറ്റ കാര്യം ചെയ്തുകൊണ്ട് മാത്രമാണ്.പതിനേഴു ലക്ഷം കൊല്ലം മുന്‍പ് നടന്നതെന്നു പറയപ്പെടുന്ന ഒന്നല്ല രാമായണത്തിന്റെ സാംഗത്യം.അതു പ്രേതകഥകള്‍ പറയുന്ന പോലെ പറയാനുള്ള ഒന്നുമല്ല (എന്റെ അഭിപ്രായം.)

ഇതിഹാസങ്ങള്‍, പുരാണങ്ങള്‍ എന്നതൊക്കെ മനസ്സിലാക്കുന്നത് അതിന്റേതായ ഒരു രീതിശാസ്ത്രമുപയോഗിച്ചു വേണം.ആ രീതിശാസ്ത്രം പഠിയ്ക്കേണ്ടത് ഒരു സദ്ഗുരുവിന്റടുത്തുനിന്നും വേണം താനും..അത് ഏതു മതക്കാരനായാലും കുഴപ്പമില്ല.മനുഷ്യന്‍ പോലുമാകണമെന്നില്ല.

അല്ലാതെ പണ്ട് രാമനെന്ന ഒരു രാജകുമാരന്‍ രാവണനെന്ന ഒരു തെമ്മാടിയെ തന്റെ പെണ്ണുമ്പിള്ളയെ തട്ടിക്കൊണ്ടുപോയ ദേഷ്യത്തിന് ചെന്ന് കൊന്ന് കൊലവിളിച്ചതാണീ രാമകഥ എന്നു പറഞ്ഞിരുന്നാലെന്തു ചെയ്യാന്‍?

ഗൂഗിളിലോ,.വിക്കിപീഡിയയിലോ Palk Strait, Rama's Bridge, എന്നുള്ള താക്കോല്‍ വാക്കുകളുപയോഗിച്ച് പരതിയാല്‍ ഇതിനേപ്പറ്റിയുള്‍ല പൂര്‍ണ്ണമായ വിവരങ്ങള്‍ ലഭിയ്ക്കും.

സമയം കിട്ടുമ്പോള്‍ രാമേശ്വരം വരെ പോയി മഹാദേവനെ തൊഴുത്, സമുദ്രത്തിന്റെ തീരത്ത് വച്ച് സകല മറകളും കളയുന്ന ആചാരമായി മനസ്സൊന്ന് മുണ്ഡനം ചെയ്താല്‍ അത്രയുമായി...നേരിട്ട് കാണുകയും ചെയ്യാം.

അതിനല്ലാതെയെന്തിനാണൊരു രാമായണം?

പിന്നെ ഇതിന്റെയൊരു പാരിസ്ഥിതിക വശമുണ്ട്..നേരത്തേ പറഞ്ഞതുപോലെ ഈ രാമ-വാനരപ്പാലം (പേരിന്റെ പേരിലൊരു വഴക്കു വേണ്ടാ) ഇടിച്ചു നിരത്തി ഒരു കപ്പല്‍ച്ചാല് പാക് കടലിടുക്കില്‍ക്കൂടെയുണ്ടാക്കാന്‍ ഒരു പരിപാടി ഉത്ഘാടം ചെയ്തു കഴിഞ്ഞു. സേതുസമുദ്രം കപ്പല്‍ ചാനല്‍ പ്രൊജക്റ്റ്..

അത് കേരളം തമിഴ്നാട് ഉള്‍പ്പേടെയുള്ള തീരദേശത്ത് വമ്പന്‍ പാരിസ്ഥിതിക വ്യതിയാനങ്ങള്‍ക്ക് കാരണമാകുമെന്ന് പറയപ്പെടുന്നു. സുനാമി പോലുള്ള വലിയ സമുദ്രക്കെടുതികളില്‍ നിന്ന് കേരളം ഉള്‍പ്പേടെയുള്ള തീരത്തെ സംരക്ഷിച്ചു നിര്‍ത്തുന്നത് സ്വാഭാവികമായ ആഴം കുറഞ്ഞ ഈ പാലമാണത്രേ.
തൂത്തുക്കുടി മുഖ്യമായും മറ്റു ചെറു തുറമുഖങ്ങളുടേയും വളര്‍ച്ച ലക്ഷ്യമിട്ടുണ്ടാക്കുന്ന ഈ കപ്പല്‍ ചാനല്‍ വന്നാല്‍(പണി തുടങ്ങി എന്നു തോന്നുന്നു?) ഹോങ്ങ് കോങ്ങിലും മറ്റുമടുക്കുന്ന കപ്പലുകളൊക്കെ തൂത്തുക്കുടിയിലടുക്കുമെന്നും ഭാരതത്തിന് വന്‍ സാമ്പത്തിക നേട്ടമാണുണ്ടാകുന്നതെന്നും പറയപ്പെടുന്നു.

പക്ഷേ ഇത് തീരദേശത്തെ വളരേയേറെ പാരിസ്ഥിതികമായി ബാധിയ്ക്കുമെന്ന് ലോകത്തെ വലിയ ശാസ്ത്രജ്ഞന്മാര്‍ വളരെയേറെപ്പേര്‍ മുന്നറിയിപ്പ് തരുന്നുമുണ്ട്.
സത്യമ്പറഞ്ഞാല്‍ ആരെ വിശ്വസിയ്ക്കണമെന്നറിയില്ല. ശാസ്ത്രജ്ഞന്മാര് പറഞ്ഞതാണ് കാര്യമെന്നൊക്കെ വിശ്വസിച്ചിരിയ്ക്കുമ്പോഴായിരിയ്ക്കും ഭാരതത്തിന്റെ വികസനം തടയാനായി സീ ഐ എ കാശു കൊടുത്ത് അവരെക്കൊണ്ട് പറയിപ്പിച്ചതാണെന്ന് അറിയുന്നത്.:)

പക്ഷേ ഒരു നല്ലകാര്യവും ഈ രാഷ്ട്രീയക്കാര് ചെയ്യില്ല എന്നുറപ്പുള്ളത് കൊണ്ട് എനിയ്ക്കീ ശാസ്ത്രജ്ഞര്‍ പറയുന്നത് വിശ്വസിയ്ക്കാനാണിഷ്ടം.കാരണം പട്ടിണിയോ വിദ്യാഭ്യാസമില്ലായ്മയോ ഒന്നും മാറ്റാനില്ലാത്ത തിടുക്കമായിരുന്നു അവര്‍ക്കീ സേതു സമുദ്രം പ്രൊജെക്റ്റ് നടപ്പിലാക്കാനുണ്ടായിരുന്നത്.(പുതിയ സേതുസമുദ്രം പ്രൊജെക്റ്റ്..എന്നു വായിയ്ക്കണം. ചര്‍ച്ചകള്‍ തുടങ്ങിയിട്ട് നൂറ്റമ്പത് കൊല്ലത്തോളമായി..ബ്രട്ടീഷുകാരാണീ വിദ്യ ആദ്യം പറഞ്ഞു തുടങ്ങിയത്..)

ഗൂഗിള്‍ വിക്കിപീഡിയ താക്കോല്‍ വാക്കുകള്‍-Sethusamudram Shipping Canal Project,Palk Strait